Uyghur hey'iti aq partiyening rehberliri bilen körüshti

Behtam sintash
2020-03-06
Élxet
Pikir
Share
Print
Türkiye adalet we tereqqiyat partiyesining tashqi ishlargha mes'ul mu'awin re'isi jewdet yilmaz ependi 7 kishidin terkib tapqan Uyghur hey'itini partiye merkizidiki ishxanisida qobul qildi. 2020-Yili 4-mart, türkiye.
Türkiye adalet we tereqqiyat partiyesining tashqi ishlargha mes'ul mu'awin re'isi jewdet yilmaz ependi 7 kishidin terkib tapqan Uyghur hey'itini partiye merkizidiki ishxanisida qobul qildi. 2020-Yili 4-mart, türkiye.
RFA/Erkin Tarim

Dunya Uyghur qurultiyining mu'awin re'isi doktor erkin ekrem ependi, sherqiy türkistan teshkilatlar birlikining re'isi hidayetulla oghuzxan ependi bashchiliqidiki 7 kishidin terkib tapqan Uyghur hey'iti türkiyediki hakimiyet béshidiki partiye-adalet we tereqqiyat partiyesining wekili numan qurtulmush ependi, partiyening mu'awin re'isi jewdet yilmaz ependiler bilen ayrim-ayrim uchrashti. Körüshüshte Uyghur hey'iti ulargha Uyghur diyarining hazirqi éghir weziyiti toghrisida özliri teyyarlighan doklat bilen türkiye we bezi döletlerdiki Uyghurlarning telepliri bayan qilin'ghan yazmini teqdim qildi.

Doklatta nuqtiliq halda xitayning "Terbiyelesh merkizi" namida Uyghurlarni lagérlargha yighiwélishi, Uyghur ziyaliylirining tutqun qilinishi, "Qoshmaq tughqan" namida xitaylarning Uyghur a'ililirige üsüp kirishi, bolupmu tajsiman öpke yallughi wirusi otturigha chiqqandin kéyinki éghir weziyet hemde yéqindin buyan Uyghur diyaridin yash qiz-oghullarni wirus tarqalghan rayonlargha "Éshincha emgek küchi" namida élip kétiwatqanliqi qatarliq mezmunlar bayan qilin'ghan.

Adalet we tereqqiyat partiyesining wekili numan qurtulmush ependi "Xelqning awazi" partiyesining re'isi bolup wezipe ötewatqan mezgilde, yeni 2009-yili "5-Iyul weqesi" munasiwiti bilen xitaygha qarshi naraziliq namayishi ötküzgen idi. Kéyin adalet we tereqqiyat partiyesige eza bolup, bash ministir mu'awini we ministir bolup wezipe ötewatqan mezgildimu izchil halda türkiyede pa'aliyet élip bériwatqan sherqiy türkistan ammiwi teshkilat mes'ullirini qobul qilip, ularning derdini anglighan idi. Bügünki uchrishishtimu u Uyghur hey'etning derdini anglap, qolidin kelgenni qilidighanliqini éytti.

Arqidin adalet we tereqqiyat partiyesining tashqi ishlargha mes'ul mu'awin re'isi jewdet yilmaz ependi Uyghur hey'etni partiye merkizidiki ishxanisida qobul qildi. Uningghimu Uyghurlarning hazirqi éghir weziyiti bayan qilin'ghan doklat sunulghandin sirt bezi konkrét telepler otturigha qoyuldi.

Aq partiye rehberliri Uyghurlarning hazirqi éghir weziyitige bekla échinidighanliqini, xitay rehberliri bilen élip bérilghan uchrishishlarda izchil halda Uyghur mesilisini otturigha qoyuwatqanliqini, lékin xitay rehberlirining Uyghurlar toghrisida déyiliwatqanlarni izchil halda inkar qiliwatqanliqini bayan qildi.

Hidayetulla oghuzxan bilen d u q ning mu'awin re'isi erkin ekrem bashchiliqidiki hey'etning hakimiyet béshidiki adalet we tereqqiyat partiyesi rehberliri bilen bolghan uchrishishi axirlashqandin kéyin mikrofonimizni ulargha uzattuq.

Hidayetulla oghuzxan ependi aq partiye rehberliri bilen élip barghan uchrishishta partiye rehberlirige Uyghurlarning hazirqi éghir weziyitidin sirt, muhajirettiki Uyghurlarning qiyinchiliqliri toghrisidiki teleplirinimu otturigha qoyghanliqini bayan qildi.

Hidayetulla oghuzxan ependi yene bu uchrishishning burunqi uchrishishlargha oxshimaydighan terepliri toghrisidimu melumat berdi.

Türkiyede pa'aliyet élip bériwatqan sherqiy türkistan ammiwi teshkilatliri we Uyghur ziyaliyliri türkiyediki her qaysi partiyelerge, dölet rehberlirige, ammiwi teshkilatlargha we türk jama'etchilikige Uyghurlarning weziyitini izchil halda anglitip kelmekte. Undaqta, buning Uyghur dewasida emeliy ünümi boluwatamdu? hey'ettin orun alghan d u q ning mu'awin re'isi erkin ekrem ependi bu heqtiki köz-qarishini bayan qilip ötti.

Sherqiy türkistan karxanichilar we tijaretchiler uyushmisining re'isi nizamidin temkini ependi bu uchrishishning wetenning weziyiti künsayin éghirlishiwatqan bir peytte ötküzülgenlikini, uning ünümi bolidighanliqigha ishinidighanliqini bayan qildi.

Adalet we tereqqiyat partiyesi 2002-yili saylam arqiliq türkiyede hakimiyet béshigha kelgen bolup, 2015-yilghiche Uyghurlargha köngül bölüp kelgen idi. Bu partiye 2015-yilidin tartip xitay bilen bolghan munasiwitini kücheytish urunushida bolghachqa, Uyghur mesilisige köp hallarda hallarda süküt qilip kelmekte.

Toluq bet