Qeshqer 2-doxturxanisi doxtur sayithaji qasimning "Öginishte" ikenlikini bildürdi

Muxbirimiz méhriban
2019-08-22
Élxet
Pikir
Share
Print
Qeshqerdiki 2-doxturxanining tashqi késeller doxturi sayit haji(ongda) tonushturulghan, ündidar salonida élan qilin'ghan "Kesipke bolghan hörmet we ishtiyaq" namliq edebiy axbaratqa chiqirilghan süret.
Qeshqerdiki 2-doxturxanining tashqi késeller doxturi sayit haji(ongda) tonushturulghan, ündidar salonida élan qilin'ghan "Kesipke bolghan hörmet we ishtiyaq" namliq edebiy axbaratqa chiqirilghan süret.
Social Media

Qeshqer 2-xelq doxturxanisi süydük yoli we tashqi késeller bölümining mudir wirachi sayithaji qasimning 2017-yildin buyan lagérda ikenliki heqqidiki inkaslardin kéyin biz mezkur doxturxanigha dawamliq téléfon qilip, ehwal igiliduq.

Ilgiri qeshqer wilayetlik 2-xelq doxturxanisigha téléfon qilip, tashqi késeller bölümidiki mutexessislerdin mudir wrach sayithajining ehwalini sürüshtürginimizde téléfonni alghan xitay xadim doxturxanidiki mutexessisler tizimlikide sayithaji qasimning ismining yoqluqini bildürgen idi.

Bügün biz sayithaji qasim ishligen süydük yoli we tashqi késeller bölümige yene qayta téléfon qilip, uning ehwalini sürüshtürduq.

Süydük yoli we tashqi késeller bölümidin télifonimizni alghan xitay ayal mezkur bölümde sayit haji qasim isimlik doxturning yoqluqini bildürdi.

So'al: yaxshimusiz? men sayithaji doxturni izdeyttim.

Jawab: bundaq bir doxtur yoq.

So'al: u ilgiri mushu bölümde ishleyttighu?

Jawab: hazir bundaq bir doxtur yoq.

So'al: u hazir nege ketti?

Jawab: bundaq bir doxtur yoq, men sizning qaysi doxturni dewatqanliqingizni bilelmidim.

So'al: sayithaji qasimni dewatimen, u süydük yoli we tashqi késeller bölümining doxturi idighu?

Jawab: bundaq biri yoq.

Mezkur bölümning bashqa téléfon nomurlirigha dawamliq téléfon qilip sayithaji doxturning ehwalini sürüshtürduq.

Deslep téléfonni alghan ayal xadim doxtur sayithajining öyide aram éliwatqanliqini bildürdi. Uningdin doxtur sayithajining qol téléfonini sorighinimizda bu xadim doxtur sayithajining shexsiy téléfon nomurini xalighanche bashqilargha dep bergili bolmaydighanliqini bildürüp, téléfonni üzüwetti.

Mezkur bölümge qayta téléfon qilghinimizda téléfonni alghan yene bir ayal xadim sayithaji doxturning resmiy ishqa chüshmigenlikini bildürüp, uning "Terbiye" éliwatqini, "Öginishte" bolghini üchün hazirche ishqa kélelmeydighanliqini bildürdi.

Bu xadim yene sayithaji doxturning qachan resmiy ishqa chüshidighanliqidin xewirining yoqluqini tekrarlidi. U yene özi doxturxana bashliqi bolmighini üchün sayithajigha alaqidar bu xil konkrét mesililerge jawab bérelmeydighanliqini tekitlidi. U doxtur sayithajigha munasiwetlik konkrét mesililerni qeshqerning özige bérip sürüshte qilishimizni éytip téléfonni qoyuwetti.

Doxtur sayithajining atalmish "Öginish" tiki ehwaligha munasiwetlik uchurlarni igilesh üchün biz qeshqer 2-doxturxanining tashqi késeller bölümidiki doxturlar we doxturxanining kadirlar bölümige dawamliq téléfon qilghan bolsaqmu, emma bu téléfonlirimiz jawabsiz qaldi.

Doxtur sayithaji qasimning 2017-yili 9-aydin buyan lagérda ikenlik uchurini radiyomizgha inkas qilghan sayithajining chet'eldiki tonushi ziyaritimizni qobul qilip, özining sayithajining teqdiridin qattiq ensirewatqanliqini bildürdi.

U 1996-yilidin buyan qeshqer 2-doxturxanisida ishlep özining kespiy mahariti we xizmet aktipchanliqi bilen zor töhpe yaratqan sayithajidek bir mutexessis tutqun qilin'ghanda doxturxana rehberlirining süküt qilip turuwalghanliqini bildürdi.

Toluq bet