Qirghizistan Uyghurliri bu yilliq roza héytta wetendiki qérindashliri üchün du'a qildi

Ixtiyariy muxbirimiz féruze
2019-06-06
Élxet
Pikir
Share
Print
Qirghizistan Uyghurliri bu yilliq roza héytta wetendiki qérindashliri üchün du'a qildi. 2019-Yili 5-iyun, qirghizistan.
Qirghizistan Uyghurliri bu yilliq roza héytta wetendiki qérindashliri üchün du'a qildi. 2019-Yili 5-iyun, qirghizistan.
RFA/Féruze

Qirghizistan Uyghurliri bu yilliq roza héytta qirghizistanning bishkék, jalal'abad qatarliq jaylirida jem bolup rozi héytni kütüwaldi. Ular héyt namizida we héyt künidiki yighilishlarda wetendiki qérindashliri üchün du'a qildi.

Qirghizistan ottura asiyadiki Uyghurlar bir qeder köp we zich olturaqlashqan memliket bolup, bu eldiki Uyghurlar özlirining milliy we diniy en'enilirini yaxshi saqlap kelmekte. Qirghizistan Uyghurliri memlikette yashawatqan musulman xelqler bilen birlikte 5-iyun küni roza héyt namizini oqudi.

Qirghizistanning jenubidiki jalal'abad wilayitidiki Uyghurlar sheherlik meschitke jem bolup birlikte héyt namizini oqup, Uyghur diyaridiki qérindashliri üchün du'a tilawetler qilishti. Radiyomiz ziyaritimizni qobul qilghan Uyghur aqsaqallar kéngeshining re'isi elishir nasiraxunof ependi jalal'abad Uyghur jama'itining bayramliq pa'aliyetliri we du'a-tilawetliri heqqide pikir bayan qilip ötti.

Uyghurlar eng köp olturaqlashqan nowopokrowka, lébédinowka, wostok we keng bulung qatarliq yézilardiki Uyghurlar öz mehellilerdiki meschitlirige jem bolup, héyt namizini birlikte ötidi.

Nowopokrowka yézisining yigit béshi gheyret jahanuf ependi radiyomiz ziyaritimizni qobul qilip, bu yilliq ramizan éyida nowopokrowka meschitide ottuz kün iptarliq bérilgenlikini, yashlarning diniy étiqadi küchiyip, tarawi namizigha köplep qatnashqanliqini shundaqla sabiq sowétlar ittipaqi dewridiki kommunist réjimida bezi diniy pa'aliyetler cheklen'gen bolsa, bügünki künlerde diniy murasimlar eslige keltürülüwatqanliqini tekitlidi.

Gheyret ependi yene Uyghur diyaridiki éghir weziyitini tilgha élip, dunya jama'itining qollishi bilen Uyghur yashlirining démokratik yol bilen öz wetinining azatliqini qolgha keltüridu dep ishinidighanliqini bildürdi.

Uyghur jama'itining aktip ezasi, wetenperwer zat ablimit hajim ependi özi tughulghan ghulja shehiridiki roza héytlarni eslep közliri nemlen'gen halda ottuz kün ichide wetendiki qérindashliri üchün du'a-tilawet qilghanlirini éytip ötti.

Qirghizistanda roza héytta bir kün dem élish bérildi. Igilishimizche, moskwadiki Uyghurlar bashqa musulmanlar bilen birlikte héyt namizini oqup, bir-birining ayimini tebriklimekte. Radiyomiz ziyaritini qobul qilghan moskwadiki Uyghur jama'etchilikining aktip ezasi yasinjan moskwadiki Uyghurlarning tatar, özbék, qirghiz we qazaq qatarliq türkiy milletler bilen birlikte héyt ötküzgenlikini tekitlidi.

Toluq bet