Қирғизистан уйғурлири бу йиллиқ роза һейтта вәтәндики қериндашлири үчүн дуа қилди

Ихтиярий мухбиримиз ферузә
2019-06-06
Елхәт
Пикир
Share
Принт
Қирғизистан уйғурлири бу йиллиқ роза һейтта вәтәндики қериндашлири үчүн дуа қилди. 2019-Йили 5-июн, қирғизистан.
Қирғизистан уйғурлири бу йиллиқ роза һейтта вәтәндики қериндашлири үчүн дуа қилди. 2019-Йили 5-июн, қирғизистан.
RFA/Féruze

Қирғизистан уйғурлири бу йиллиқ роза һейтта қирғизистанниң бишкек, җалалабад қатарлиқ җайлирида җәм болуп рози һейтни күтүвалди. Улар һейт намизида вә һейт күнидики йиғилишларда вәтәндики қериндашлири үчүн дуа қилди.

Қирғизистан оттура асиядики уйғурлар бир қәдәр көп вә зич олтурақлашқан мәмликәт болуп, бу әлдики уйғурлар өзлириниң миллий вә диний әнәнилирини яхши сақлап кәлмәктә. Қирғизистан уйғурлири мәмликәттә яшаватқан мусулман хәлқләр билән бирликтә 5-июн күни роза һейт намизини оқуди.

Қирғизистанниң җәнубидики җалалабад вилайитидики уйғурлар шәһәрлик мәсчиткә җәм болуп бирликтә һейт намизини оқуп, уйғур дияридики қериндашлири үчүн дуа тилавәтләр қилишти. Радийомиз зияритимизни қобул қилған уйғур ақсақаллар кеңәшиниң рәиси әлишир насирахуноф әпәнди җалалабад уйғур җамаитиниң байрамлиқ паалийәтлири вә дуа-тилавәтлири һәққидә пикир баян қилип өтти.

Уйғурлар әң көп олтурақлашқан новопокровка, лебединовка, восток вә кәң булуң қатарлиқ йезилардики уйғурлар өз мәһәллиләрдики мәсчитлиригә җәм болуп, һейт намизини бирликтә өтиди.

Новопокровка йезисиниң йигит беши ғәйрәт җаһануф әпәнди радийомиз зияритимизни қобул қилип, бу йиллиқ рамизан ейида новопокровка мәсчитидә оттуз күн иптарлиқ берилгәнликини, яшларниң диний етиқади күчийип, тарави намизиға көпләп қатнашқанлиқини шундақла сабиқ советлар иттипақи дәвридики коммунист реҗимида бәзи диний паалийәтләр чәкләнгән болса, бүгүнки күнләрдә диний мурасимлар әслигә кәлтүрүлүватқанлиқини тәкитлиди.

Ғәйрәт әпәнди йәнә уйғур дияридики еғир вәзийитини тилға елип, дуня җамаитиниң қоллиши билән уйғур яшлириниң демократик йол билән өз вәтининиң азатлиқини қолға кәлтүриду дәп ишинидиғанлиқини билдүрди.

Уйғур җамаитиниң актип әзаси, вәтәнпәрвәр зат аблимит һаҗим әпәнди өзи туғулған ғулҗа шәһиридики роза һейтларни әсләп көзлири нәмләнгән һалда оттуз күн ичидә вәтәндики қериндашлири үчүн дуа-тилавәт қилғанлирини ейтип өтти.

Қирғизистанда роза һейтта бир күн дәм елиш берилди. Игилишимизчә, москвадики уйғурлар башқа мусулманлар билән бирликтә һейт намизини оқуп, бир-бириниң айимини тәбриклимәктә. Радийомиз зияритини қобул қилған москвадики уйғур җамаәтчиликиниң актип әзаси ясинҗан москвадики уйғурларниң татар, өзбек, қирғиз вә қазақ қатарлиқ түркий милләтләр билән бирликтә һейт өткүзгәнликини тәкитлиди.

Пикирләр (0)
Share
Толуқ бәт