Елишқу вәқәсидә хитай әскәрлиридин оқ йегән сақчи башлиқи әсқәр қуддус йәнә өстүрүлгән

Мухбиримиз шөһрәт һошур
2017-06-05
Елхәт
Пикир
Share
Принт
Мәмликәтлик тәқдирләш йиғиниға қатнашқан сақчилар, 2017-йили 19-май, үрүмчи
Мәмликәтлик тәқдирләш йиғиниға қатнашқан сақчилар, 2017-йили 19-май, үрүмчи
Photo: RFA

Мукапатланған сақчилар һәққидики илгириләп әһвал ениқлишимиз давамида, аталмиш сақчи қәһриман әсқәр қуддусниң йәкән елишқу вәқәсидә хитай әскәрлири тәрипидин путиға оқ тәгкән вә буниңға наразилиқ билдүрмигәнлики үчүн, униң йәкән наһийиси җ х идарисиниң дөләт аманлиқиға мәсул башлиқлиқ мәртивисигә, җ х идарисиниң партком һәйити мәртивиси қетилғанлиқи ашкариланди. Буни ашкарилиған йәкәндики сақчи хадимлири, униң бу қетим мәмликәтлик нәмуничи сақчи болушиғиму елишқу вәқәсидә оқ йегәнликиниң сәвәб болғанлиқини илгири сүрди.

Мәлум болушичә, хитай даирилири әсқәр қуддусқа оқ тәгкәнлик вәқәсини хитайниң сақчи саһәсидики тәшвиқат материяллиридиму сир тутқан. Шуңа көпинчә сақчилар, әсқәр қуддусқа оқ тәгкәнликини униң сәпдаш вә хизмәтдашлириниң еғизидин аңлиған болсиму, рәсмий һөҗҗәт-материяллардин көрмигән вә униң ениқ қәйиригә оқ тәгкәнликидинму хәвәрсиз қалған. Дөңбағ йезилиқ бир сақчи хадиминиң дейишичә, әсқәр қуддусниң путиға бир пай оқ тәккән. Базар ичидики бир сақчи хадиминиң өз сақчихана башлиқидин аңлишичә, әсқәр қуддусниң зәхмиси техи тәлтөкүс сақаймиған.

Йәнә сақчи хадимлириниң баян қилишичә, әсқәр қуддус вәқәдә оқ тегип яриланған болсиму, буниңға һечқандақ наразилиқ билдүрмигән, әксичә буниң бир қәстәнлик әмәсликини тилға елип, хитай даирилирини мәмнун қилған. Әмма, йәкән елишқу вәқәсидә оқ йегән дөңбағ йеза башлиқи ғулам тохти билән секретар абдуғени турди хитай әскәрлиригә өзиниң кимликини канай билән сөзләп вә пәрқләндүрүшни өтүнүп турупму җенини сақлиялмиған. Бу әһвални уларниң тул қалған аяллири шу йили радийомизға ашкарилиған иди.

Әсқәр қуддус һәққидә дәсләптә мәлумат бәргән аңлиғучимизниң дейишичә, у әслидә йәкән җ х идарисиниң дөләт аманлиқиға мәсул башлиқи болуп, елишқу вәқәсидә әскәрләрдин оқ йегәндин кейин, униң мәвҗут вәзиписигә, партком һәйәт әзаси вәзиписи қетилип, мәртивиси йәнә бир балдақ өскән. Бу учур йәкән наһийә базар ичидики бир сақчи хадими тәрипидинму дәлилләнди.

Әсқәр қуддусниң бу йил немә үчүн мукапатқа еришкәнлики һәққидә 10нәччә сақчиханиға телефон қилған болсақму, уларниң һечқайсиси әсқәр қуддусниң оқ тегип яриланғинидин башқа көзгә көрүнәрлик бир иш-изини дәп берәлмиди.

Әһвалдин хәвәр тапқан муһаҗирәттики уйғур көзәткүчиләр, әсқәр қуддусниң бу йилқи мукапатлинишиғиму, униң хитай сақчилириниң қара-қоюқ оқ чиқиришида зәхмиләнгинигә наразилиқ билдүрмәслики, дәрдини ичигә ютуши, һәтта һадисини хитай тәрәпниң мәнпәитигә мас һалда тәшвиқ қилишип бәргәнликиниң сәвәб болғанлиқини пәрәз қилишмақта.

Пикирләр (0)
Share
Толуқ бәт