Абдурахман төмүр хитайға хизмәт көрсәткән вәқәдә аз дегәндә йәттә киши өлгәнлики мәлум

Мухбиримиз шөһрәт һошур
2017-05-24
Елхәт
Пикир
Share
Принт
Уйғур районида арқа-арқидин йүз бериватқан қаршилиқлардин кейин, хитай қораллиқ қисимлириниң уйғурлар олтурақлашқан районларда чарлаш елип бериватқан көрүнүш. 2013-Йили 29-июн, үрүмчи.
Уйғур районида арқа-арқидин йүз бериватқан қаршилиқлардин кейин, хитай қораллиқ қисимлириниң уйғурлар олтурақлашқан районларда чарлаш елип бериватқан көрүнүш. 2013-Йили 29-июн, үрүмчи.
AFP

Түнүгүнки ениқлишимиз давамида, хитайниң бу йиллиқ мәмликәтлик сақчи қәһримани, гума наһийисиниң чода йезилиқ сақчихана башлиқи абдурахман төмүрниң 2015-йили гумида йүз бәргән «14-феврал» вәқәсидә хизмәт көрсәткәнлики ашкариланған иди. Мухбиримизниң илгириләп телефон зиярити вә тор хәвәр архиплиридин ениқлиши нәтиҗисидә абдурахман төмүр тилға алған мәзкур вәқәниң радийомиз тәрипидин 2015-йили 16-феврал күни хәвәр қилинған гума пиядиләр кочиси вәқәси икәнлики еһтималлиқи ашкариланди. Хитай ахбарати пәқәтла тилға алмиған мәзкур вәқә радийомиз тәрипидин ашкариланған вә вәқәдә аз дегәндә 7 киши өлүп, 7 киши яриланғанлиқи дәлилләнгән иди.

Биз абдурахман төмүр юқирида тилға алған 2015-йили йүз бәргән 14-феврал вәқәсиниң қайси вәқә икәнликини ениқлаш үчүн гумидики һәрқайси сақчиханиларға телефон қилдуқ. Гумида вәқәниң йеқинқи йилларда йүз бәргәнлики вә даириләрниң вәқәләр һәққидики учурни қаттиқ контрол қилғанлиқи сәвәблик, сақчилар мәзкур вәқә һәққидә мәлумат берәлмиди. Радийомизниң хитайчә хәвәр архипидики 2015-йили 16-феврал күни елан қилинған бир хәвәрдә баян қилинишичә, шу ай җүмә йәни 13-феврал күни гума базар ичидә бир қанлиқ вәқә йүз бәргән, вәқәдә аз дегәндә 7 киши өлгән вә 7 киши яриланған. Уйғур бөлүмимизниң әйни күндики бу һәқтики хәвиридә, вәқәниң гума конабазар пиядиләр кочисида йүз бәргәнлики, вәқәдә аз дегәндә йәттә киши өлүп, он нәччә киши яриланғанлиқи дәлилләнгән. Әмма, даириләр әйни күнләрдә учурни қаттиқ қамал қилғанлиқи үчүн вәқәдә өлгән вә яриланған кимлики ашкариланмиған. Бу вәқә әң аввал иҗтимаий таратқуларда тарқалған болуп, вәқәниң

Гума кона базардики пиядиләр кочисида йүз бәргәнлики баян қилинған. Иҗтимаий ахбарат васитилиридики бу учурларниң бәзилиридә, вәқәниң бомбилиқ һуҗум икәнлики вә өлгүчиләрниң һәммисиниң сақчи икәнлики тилға елинған; бәзи учурларда вәқәниң сақчиларниң бихәтәрлик тәкшүрүш давамидики зораванлиқи сәвәбидин келип чиққанлиқи, вәқәдә өлгүчиләрниң бигунаһ амма икәнлики илгири сүрүлгән.

Хитай икки йилдин бери сир тутуп келиватқан гума пиядиләр кочисида йүз бәргән мәзкур қанлиқ вәқә, бу қетим гума чода сақчиханисиниң башлиқи абдурахман төмүрниң мәмликәтлик қәһриман сақчи болуп мукапатлиниши, радийомизниң қайта диққитини тартти. Абдурахман тилға алған 14-феврал вәқәси билән радийомиз шу йили 16-феврал күни хәвәр қилған пиядиләр кочиси вәқәсиниң вақит пәрқи бир күн болсиму, хитай билән америка арисидики вақит пәрқи көздә тутулса, иккисиниң әмәлийәттә бир вәқә икәнлики еһтималлиқи ашкариланмақта. Әгәр иккиси бир вәқә болған тәқдирдә, абдурахман төмүрниң вәқәдә ойниған роли сәвәблик мәмликәтлик қәһриман болуп баһалиниши вәқәниң иҗтимаий ахбаратларда дейилгәндәк чоңлуқи вә җиддийликини ишарәтлимәктә.

Муһаҗирәттики уйғур көзәткүчиләр, хитайниң уйғур районини дуняға тинч район қилип көрситиш вә яки уйғур райондики хитай көчмәнлирини үркүтүп қоймаслиқ үчүн, районда йүз бериватқан қанлиқ вәқәләрниң мутләқ көп қисмини ахбараттин йошуруп келиватқанлиқини баян қилишқан.

Пикирләр (0)
Share
Толуқ бәт