Америкидики уйғур җамаити роза һейтни бирликтә тәбриклиди

Мухбиримиз әзиз
2017-06-26
Елхәт
Пикир
Share
Принт
Роза һейт намизиға кәлгән уйғур җамаити намаздин илгири тәблиғ аңлимақта. 2017-Йили 25-март, вирҗинийә, америка
Роза һейт намизиға кәлгән уйғур җамаити намаздин илгири тәблиғ аңлимақта. 2017-Йили 25-март, вирҗинийә, америка
Photo: RFA

Американиң пайтәхти вашингтон вә униңға қошна җайлардики уйғур җамаити 25-июн күни бир йәргә җәм болуп, 2017-йиллиқ роза һейтни бирликтә күтүвалди һәмдә өз-ара һейтлиқ тиләклирини билдүрүш билән биргә, вәтини ичи вә сиртидики уйғурлар үчүн сәмимий дуа-тилавәт қилишти.

Йеқинқи йиллардин буян, америкиға көчмән болуп келиватқан уйғурлар саниниң ешип беришиға әгишип, уйғур җамаити бирқәдәр мәркәзлик олтурақлашқан районлардин бирнәччиси һасил болушқа башлиди. Американиң шәрқий қирғиқидики вирҗинийә вә марийләнд штатлири әнә шу хилдики асаслиқ мәркәзләрниң биридур. Бу хилдики мәркәзләрниң һасил болуши өз нөвитидә уйғурлардәк иҗтимаийлиққа адәтләнгән, шундақла муһаҗирәттики пәвқуладдә муһитта яшаватқан бир қовмниң әсирләрдин буян давам қилип келиватқан миллий байрамлириға һәрқачан йеңи мәзмунларни қошуп кәлмәктә. Американиң вирҗинийә штатидики фалс чурч шәһиридә өткүзүлгән бу йилқи роза һейтни тәбрикләш паалийитидә бу һал йәнә бир қетим өз ипадисини тапти.

Америка уйғур бирләшмиси мәсул болуп тәшкиллигән бу қетимқи рози һейт тәбрик паалийити 25-июн күни сәһәрдә алди билән һейтлиқ намаздин илгирики тәкбир ейтиш билән башланди. Топ-топ болушуп келиватқан уйғур җамаити хас уйғурлар топланған залға җәм болуп, тезла паалийәт зали намазға кәлгән әрләр вә аяллар билән толди. Арилиқта америка уйғур бирләшмисиниң рәиси елшат һәсән зияритимизни қобул қилип, бу йилқи һейтлиқ намазға кәлгән уйғур җамаитиниң өткән йилқидинму көп икәнликини, буниң бир сәвәби америкиға келиватқан уйғурларниң көпийиватқанлиқи болса, йәнә бири уйғурларниң өзлиригә хас җамаәтчилик ишлириниң барғансери көп уйғур җамаитини өз әтрапиға топлаватқанлиқиниң нәтиҗиси икәнликини билдүрди. Униңчә, бу хилдики йиғилиш паалийәтлири муһаҗирәттики уйғурларниң һазирқи шараитида толиму әһмийәтлик һесаблинидикән.

Һейтлиқ намазға имамлиқ қилған уйғур диний алимлиридин нурдун һаҗим сөз елип, намазға кәлгән уйғур җамаитигә рамизанниң хасийити вә бәрикити һәққидә қисқичә чүшәнчә бәрди. Андин ислам дининиң әһкамлирида алаһидә тәкитлинидиған бирлик вә иттипақлиқ мәзмунлириниң муһаҗирәттики уйғурларниң һазирқи мүшкүл шараитида қандақ зор қиммәткә игә икәнликини, буниң үчүн ортақ мәнпәәт астида барлиқ уйғурларниң зич иттипақлишишиниң уйғур давасиниң ахирқи ғәлибиси үчүн һәл қилғуч әһмийәткә игә икәнликини тәкитлиди. У буниң бир мисали сүпитидә, муһаҗирәттики уйғурларниң имкан бар, башқа уйғурлар билән җамаәт болуп һейт намизи оқушиниң зор әвзәлликләргә игә болидиғанлиқини тилға алди. Намазниң ахирида җамаәт нурдун һаҗимға әгишип, вәтәндики уйғур қериндашларға һәмдә шеһитларға атап халис дуа қилди.

Һейт намизиға кәлгән уйғур җамаитидин учқун әпәнди өзиниң уйғур җамаити билән биргә роза һейтни тәбрикләватқанлиқидин толиму сөйүнидиғанлиқини билдүргәч, мушу пурсәттин пайдилинип вәтинидики зулум астида иңраватқан қериндашлириға дуа қилишниң муһимлиқини тәкитлиди.

Дуня уйғур қурултийиниң рәиси рабийә қадир ханим саламәтлик әһвали түпәйлидин һейт намизиға келәлмигән болсиму, вәтәндики уйғурларға роза һейтлиқ салам йоллашни унтумиди.

Дуня уйғур қурултийиниң сабиқ рәиси, муһаҗирәттики уйғур җамаитиниң мойсипитлиридин әркин алиптекин әпәндиму германийәдин телефон зияритимизни қобул қилип, вәтәндики уйғурларға өзиниң һейтлиқ салимини йәткүзүп қоюшни һавалә қилди. Шуниңдәк вәтәндики уйғурларниң һечқачан үмидсиз болмаслиқи лазимлиқини җекилиди.

Рози һейтлиқ тәбрики үчүн йиғилған уйғур җамаити һейтлиқ намаз вә дуа-тиләкләрдин кейин, биллә нашта қилишти һәмдә қизғин тиләкләр ичидә бир-бириниң һейтини тәбриклиди. Зияритимиз ахирлашқанда болса, җамаәтниң алди аллиқачан өз-ара һейтлишишни башливәткән иди.

Пикирләр (0)
Share
Толуқ бәт