Хоңкоң өктичиләр рәһбири хоңкоң хәлқини намайиш қилип, әркинликни қоғдашқа чақирди

Мухбиримиз әркин
2016-01-08
Елхәт
Пикир
Share
Принт

Хоңкоң өктичиләр гуруһиниң рәһбири, сабиқ мәмури мәһкимә баш катипи ченфаң әншиң хоңкоң хәлқини намайиш қилип, хоңкоң туңливән китабханисиниң башлиқи ли бо қатарлиқ 5 нәпәр китабхана хадиминиң из-дерикини қилишқа чақирған.

Ченфаң әншиң җүмә күни қилған сөзидә: «ли бониң йоқап кетиши нурғун мәсилини, хусусән қанун-түзүм, әркинлик, кишилик бихәтәрлик, бир дөләттә икки хил түзүм қатарлиқ мәсилиләрни оттуриға чиқирип, хәлқни әндишигә салди. Шуңа, биз хоңкоң хәлқини йәкшәнбә күни өткүзүлидиған намайишқа қатнишишқа чақиримиз» дегән

Туңливән китабханиси изчил хитай алий дәриҗилик рәһбәрлириниң аилә турмуши вә мәхпий ишлириға даир китабларни нәшр қилиш билән тонулған нәшрият орни. Лекин өткән йилниң ахири мәзкур китабханиниң башлиқи ли бо вә қалған 4 нәпәр хадими из -дерәксиз йоқап кәткән.

Хитай һөкүмити һазирға қәдәр очуқ ипадә билдүрмигән болсиму, әмма уларни хитай бихәтәрлик хадимлири тутуп кәткән болуши мумкин, дәп гуман қозғалған.

Ченфаң әншиң сөзидә: «бу интайин еғир вәқә. Мәйли хоңкоңниң әдлийә мустәқиллиқи болсун, мәйли хоңкоң хәлқиниң ‹түп қанун' да капаләткә игә сөз әркинлики, нәшрият әркинлики, кишилик әркинликниң дәхли-тәрузсизлиқи яки бир дөләттә икки хил түзүмни әмәлийләштүрүш болсун, бу вәқә 2003‏-йили дөләт бихәтәрлик қанун лайиһәси оттуриға қоюлғандин буян учриған әң еғир хирис» дегән.

Пикирләр (0)
Share
Толуқ бәт