Türkiyediki Uyghur musapiri xitaygha qayturulushtin endishe qilmaqta

Muxbirimiz erkin
2019-08-12
Élxet
Pikir
Share
Print

Türkiye ichki ishlar ministiri héchqandaq Uyghurning xitaygha qayturulmaydighanliqini bildürgen bolsimu, lékin Uyghurlarning yenila xitaygha qayturulush xewpige duch kéliwatqanliqi ilgiri sürülmekte.

Firansiye agéntliqining xewer qilishiche, nöwette türkiyening qirqlar'eli wilayitidiki pehliwanköy qayturush merkizide tutup turuluwatqan Uyghur musapiri exmet shemshidin ene shundaq xewpke duch kéliwatqan Uyghurlarning biri iken. U yéqinda firansiye agéntliqi muxbirining téléfon ziyaritini qobul qilghanda yurtidiki uruq-tughqanlirining özini qayturup kélish heqqidiki bir höjjetke imza qoydurulghanliqini, türkiyening bu höjjetlerni desmaye qilip, özini xitaygha qayturup bérishidin qattiq endishe qiliwatqanliqini bildürgen.

Firansiye agéntliqining xewiride qeyt qilinishiche, bu yil 29 yashliq exmet shemshidinning türkiyede turushluq guwahnamisi we ishlesh ruxsiti bolsimu, lékin u bu yil 30‏-mayda tutqun qilinip, pehliwanköydiki qayturush merkizige solap qoyulghan iken. Nöwette türkiyediki qayturush merkezliride qanchilik Uyghurning tutup turuluwatqanliqi melum emes. Yéqinda türkiye köchmenler idarisining zinnetgül tursun isimlik bir Uyghur ayalni 2 balisi bilen xitaygha qayturuwétishi muhajirettiki Uyghurlarda qattiq ghulghula qozghighan idi.

Melum bolushiche, istanbuldiki aptomobil zapchaslirini ishlepchiqirish séxini mangduruwatqan exmet shemshidin türkiye da'iriliri teripidin "Uyghur milliy herikiti" namliq bir térrorluq teshkilatining "Asasliq pul bilen teminligüchilirining biri" dep eyiblen'gen iken. Halbuki, exmet shemshidin firansiye agéntliqigha özining "Bundaq bir teshkilatni héch anglap baqmighanliqi" ni bildürgen. Uning qeyt qilishiche, u özining zinnetgül tursun'gha oxshash aqiwetke qélishtin endishe qilmaqta iken. Türkiye köchmenler idarisi zinnetgül tursunni "Tajikistan puqrasi" dep tajikistan'gha yolgha séliwetken bolup, u yerdin xitaygha ötküzüp bérilgen idi.

Toluq bet