Сақчи институти оқуғучилири қәшқәр, хотән, ақсу қатарлиқ җайларда чениқтурулидикән

Мухбиримиз үмидвар
2017-07-09
Елхәт
Пикир
Share
Принт

Уйғур аптоном район даирилири 2009-йилидики «5-июл үрүмчи вәқәси» ниң 8 йиллиқи толған күндә үрүмчи шәһиригә җайлашқан шинҗаң сақчи институтида мәзкур институтниң 1800 нәпәр оқуғучисиниң уйғур дияриниң җәнубиға берип, әмәлий хизмәтләргә қатнишиш сәпиригә атлиниш қәсәмяд мурасими өткүзгән.

«Шинҗаң иқтисад гезити» ниң хәвиридин мәлум болушичә, сақчи институтиниң мәзкур 1800 нәпәрдин артуқ оқуғучиси қәшқәр, хотән, ақсу вә қизилсу тәвәсидики җамаәт хәвпсизлик органлириниң һәр түрлүк хизмәтлиригә қатнаштурулуп, чениқтурулидикән. Хәвәрдә илгири сүрүлүшичә, мәзкур оқуғучиларниң бу районларда чениқтурулушидики мәқсәтләр қатарида уларниң кәспи тонуши вә әмәлий җәң қилиш иқтидарини ашуруш орун алған.

Хитай даирилири аталмиш «үч хил күчләр» гә қарши «хәлқ уруши» елип баридиғанлиқини җакарлиғандин буян илгири-кейин үрүмчи, қәшқәр, хотән, ақсу қатарлиқ шәһәрләрдә көп қетим қораллиқ сақчи қисим, җамаәт хәвпсизлик сақчи вә башқа түрдики аманлиқ күчлирини ишқа селип һәрбий һәйвә көрситиш һәм қәсәм бериш мурасимлирини өткүзгән иди.

Көзәткүчиләрниң қаришичә, хитай даирилириниң уйғур дияриниң җәнубини «терроризмға қарши җәң мәйдани» дәп җакарлап, бу районда зор сандики кадирлар әтрәтлири, сақчи күчлирини ишқа селип, йеза-кәнтләргә қаратқан назарәт вә башқурушни изчил ашуруватқанлиқи инкас қилинмақта.

Пикирләр (0)
Share
Толуқ бәт