"Nyu-york waqti" géziti: "Wizisiz rayon'gha saqal bilen emes, hemyan bilen kiring!"

Muxbirimiz eziz
2018-01-09
Élxet
Pikir
Share
Print

Xitay hökümiti sirtqa qarita échiwetken "Alahide iqtisadiy rayon" larning biri bolghan qorghas éghizidiki "Binormal" ré'alliq yéqinda amérikidiki oqurmenliri eng köp bolghan gézitlerdin "Nyu-york waqti géziti" de tepsiliy bayan qilindi.

8-Dékabir élan qilin'ghan bu maqalida, xitay bilen qazaqistan chégrasidiki qorghas alahide rayonida tamozhna xadimliri yaki wiza tekshürüsh nuqtiliri tesis qilinmighan bolsimu xitay qoralliq saqchilirining mexsus saqal qoyghan, yaghliq artqan yaki ay-yultuzluq neqish oyulghan zinnet buyumliri taqighan ayallarni paylaydighanliqi éytilidu. Maqalida éytilishiche, xitay gerche chégradiki köpligen jaylarda alahide iqtisadiy rayonlarni tesis qilghan bolsimu, bu rayonlargha peqet xitay puqraliri hemde pasportida xitay wizisi bolghan chet'elliklerla kireleydiken.

Maqalida körsitilishiche, qorghas alahide iqtisadiy rayonigha saqalliq yaki islamiy libas kiygen kishilerning kirishige bolmaydighanliqi heqqidiki rusche agahlandurushlar ésilghan. Melum bolushiche, yéqinda bomba saqalliq bir amérikiliq bu jaygha sayahetke kelgende xitay qoralliq saqchiliri uni soraq qilghan. U özining térrorchi emeslikini éytip, ularni qayil qilghandin kéyin andin qoyuwétilgen.

Maqalida bayan qilinishiche, qorghas iqtisadiy alahide rayonining qazaqistan tereptiki böliki asasen bosh bolup, anda-sanda dukanlardin bashqa héchnerse yoq iken. Emma xitay kontrolluqidiki terep zich binalar, dukanlar bilen tolghan iken. Her yili ikki milyonche xitay puqrasi bu jaygha kélidiken, emma ular qazaqistan terepke ötmeydiken. Bu xitaylardin biri bu heqte söz qilip, "Bu jayda yurtumdikidin jiq pul tapalaymen" dégen.

Melum bolushiche, xitay hökümiti "Bir belwagh bir yol qurulushi" ni bashlighandin buyan Uyghurlar diyarining jughrapiyelik qimmiti téximu ashqan. Shuningdek bu rayon'gha qaritilghan kontrolluq tedbirlirimu munasip halda kücheygen.

Toluq bet