«Ню-йорк вақти» гезити: «визисиз районға сақал билән әмәс, һәмян билән кириң!»

Мухбиримиз әзиз
2018-01-09
Елхәт
Пикир
Share
Принт

Хитай һөкүмити сиртқа қарита ечивәткән «алаһидә иқтисадий район» ларниң бири болған қорғас еғизидики «бинормал» реаллиқ йеқинда америкидики оқурмәнлири әң көп болған гезитләрдин «ню-йорк вақти гезити» дә тәпсилий баян қилинди.

8-Декабир елан қилинған бу мақалида, хитай билән қазақистан чеграсидики қорғас алаһидә районида таможна хадимлири яки виза тәкшүрүш нуқтилири тәсис қилинмиған болсиму хитай қораллиқ сақчилириниң мәхсус сақал қойған, яғлиқ артқан яки ай-юлтузлуқ нәқиш оюлған зиннәт буюмлири тақиған аялларни пайлайдиғанлиқи ейтилиду. Мақалида ейтилишичә, хитай гәрчә чеградики көплигән җайларда алаһидә иқтисадий районларни тәсис қилған болсиму, бу районларға пәқәт хитай пуқралири һәмдә паспортида хитай визиси болған чәтәлликләрла кирәләйдикән.

Мақалида көрситилишичә, қорғас алаһидә иқтисадий райониға сақаллиқ яки исламий либас кийгән кишиләрниң киришигә болмайдиғанлиқи һәққидики русчә агаһландурушлар есилған. Мәлум болушичә, йеқинда бомба сақаллиқ бир америкилиқ бу җайға саяһәткә кәлгәндә хитай қораллиқ сақчилири уни сорақ қилған. У өзиниң террорчи әмәсликини ейтип, уларни қайил қилғандин кейин андин қоюветилгән.

Мақалида баян қилинишичә, қорғас иқтисадий алаһидә райониниң қазақистан тәрәптики бөлики асасән бош болуп, анда-санда дуканлардин башқа һечнәрсә йоқ икән. Әмма хитай контроллуқидики тәрәп зич биналар, дуканлар билән толған икән. Һәр йили икки милйончә хитай пуқраси бу җайға келидикән, әмма улар қазақистан тәрәпкә өтмәйдикән. Бу хитайлардин бири бу һәқтә сөз қилип, «бу җайда юртумдикидин җиқ пул тапалаймән» дегән.

Мәлум болушичә, хитай һөкүмити «бир бәлвағ бир йол қурулуши» ни башлиғандин буян уйғурлар дияриниң җуғрапийәлик қиммити техиму ашқан. Шуниңдәк бу районға қаритилған контроллуқ тәдбирлириму мунасип һалда күчәйгән.

Пикирләр (0)
Share
Толуқ бәт