«Мусулманлар журнили» да уйғур мусулманлирини қоллаш һәққидә мақалә елан қилинди

Мухбиримиз сада
2019-05-15
Елхәт
Пикир
Share
Принт

Хитайниң миллий вә диний зулумлири астида езиливатқан уйғурларни қоллаш паалийәтлири хәлқарада җиддий түс еливатқан бир мәзгилдә «мусулманлар журнили» ниң бу айлиқ санида «уйғур мусулманлирини қоллаш» темисида бир парчә мақалә елан қилинди.

Мақалидә йеқинқи бир қанчә йилдин буян уйғур дияридики уйғурларниң йилда бир қетим келидиған рамизан ейида роза тутуши, аялларниң яғлиқ артип, әрләрниң сақал қоюши пүтүнләй чәкләнгәнлики, юқириқиларниң бирини қилип қалғанларниң хитай һөкүмити тәрипидин аталмиш «диний ашқунлуқ идийәсиниң тәсиригә учриған» дегән қалпақ билән лагерларға ташлинидиғанлиқи алаһидә тилға елинған.

Униңдин башқа мақалидә йәнә ата-аниси хитайниң йиғивелиш лагерлириға әкетилгән, игә-чақисиз қалған 500 миңдин артуқ уйғур пәрзәнтлириниң тирик йетимға айлинип қалғанлиқидәк ечинишлиқ паҗиәләрму баян қилинған.

Мақалидә қәйт қилинишичә, хитайниң йиғивелиш лагерлириға соланған уйғурлар пәқәт мусулман болғанлиқи үчүнла хитайниң зор көләмлик тутқун қилиш нишаниға айланмақтикән вә инсаний хорлуқларға учримақтикән.

Мақалидә американиң чикаго шәһиридики әл-тәқва мәсчитиниң имами тариқ әл әминниң уйғур мусулманлирини қоллаш һәққидә қилған сөзлири нәқил елинған. У мундақ дегән: «биз силәрниң уйғурларниң вәзийити һәққидә толуқ бир чүшәнчигә игә болушуңларни һәм шулар үчүн аваз чиқиришиңларни үмид қилимиз.»

Көзәткүчиләр уйғурлар мәсилисиниң америкадики «мусулманлар журнили» да елан қилиниши ғәрбтики мусулманлар җамаитиниң бу мәсилини ислам дунясиға йейишида муһим рол ойнайду, дәп қаримақта.

Пикирләр (0)
Share
Толуқ бәт