Қатар хитайниң уйғурларға тутқан сияситини қоллап имза қойған 50 дөләтниң ичидин чекинип чиққан

Мухбиримиз сада
2019-08-21
Елхәт
Пикир
Share
Принт

Өткән айда мусулман әллирини өз ичигә алған 50 дөләт хитайниң уйғур дияридики қаттиққол бастуруш сияситини қоллап, б д т кишилик һоқуқ алий кеңишигә имзалиқ хәт әвәткән иди. Йеқинда оттура-шәрқтики муһим дөләт қатар бу 50 дөләтниң ичидин чекинип чиққан.

«Блумберг» гезитиниң 20-авғусттики хәвиридә дейилишичә, қатар һөкүмити б д т кишилик һоқуқ алий кеңишиниң президенти колий секкә өзлириниң 7-айниң 12-күни хитайниң уйғурларға қаратқан қаттиққол сияситини қоллап имзалиған хетини қайтурувалидиғанлиқи һәққидә мәлумат бәргән. «Блумберг» гезити бу әһвал һәққидә қатар һөкүмитиниң алақә ишханиси вә б д т ниң мунасивәтлик оргини билән алақиләшкән болсиму, һечқандақ җавабқа еришәлмигән.

Қатарниң б д т дики вәкили әли әл-мәнсори 18-июл колий секкә хәт йезип, «бизниң бу бирләшмә имзалиқ мәктупқа имза қоюшимизниң бизниң чәтәл сияситимиздики битәрәплик сияситимизгә вә бу җәһәттики әвзәлликимизгә тоғра кәлмигәнликини һес қилдуқ. Мушу сәвәбтин биз битәрәп болушни халаймиз,» дегән.

Қатар дөлити дунядики әң чоң суюқландурулған тәбиий газ експорт қилидиған дөләтләрниң бири болуп, «блумберг» гезитиниң хәвиридә қатарниң юқириқи қарарни чиқириши униң хитай билән болған сода һәмкарлиқиға мәлум тәсир көрситидиғанлиқидин дерәк беридиғанлиқи қәйт қилинған.

Пикирләр (0)
Share
Толуқ бәт