Sara katér: "Dunya bankisi néme üchün xitayning tutup turush lagérlirigha meblegh salidu?"

Muxbirimiz sada
2019-08-28
Élxet
Pikir
Share
Print

Uyghur diyaridiki jaza lagérliri mesilisi izchil mewjut boluwatqan bir peytte dunya bankisining xitayning Uyghur diyarida tesis qilghan tutup turush lagérlirigha 50 milyon dollar meblegh salghanliqi heqqide xewerler tarqilishqa bashlidi.

27-Awghust amérikadiki dangliq muxbir sara kartérning shexsiy tor bétige élan qilin'ghan "Dunya bankisi néme üchün xitayning tutup turush lagérlirigha meblegh salidu?" serlewhilik maqalining bashlanmisida aptor dunya bankisi meblegh salghan xitay hökümitining atalmish "Kespiy terbiyilesh programmisi" diki tepsiliy mezmunlar üstide toxtalghan. Melum bolushiche, bu programma ikki chong bölektin terkib tapqan iken. 1-Bölikide besh kichik mezmun bar bolup, ular: mektep we zawutning baghlinishini kücheytish؛ derslik, oqutush mitodi we bahalashni yéngilash؛ yuqiri sewiyidiki oqutush we bashqurush qoshunini qurup chiqish؛ bashqa mektep we yerlik jama'etlerge bolghan qollashni kücheytish؛ mu'essese we üskünilerni yéngilash qatarliqlarni öz ichige alidiken. 

Mezkur programmining 2-bölikide ölke derijilik siyasetning tereqqiyati, mektepler ara hemkarliq munasiwiti qatarliq bir qanche mezmundin teshkil tapqan iken. 

Uyghur diyarida milyonlighan Uyghurning tutup turush lagérlirigha qamilishi xelq'araning küchlük bésimigha duch kéliwatqan peytte xitay hökümiti bu yil iyulda "Uyghurlar türkiy millet emes" dégen sepsetisini teshwiq qilidighan aq tashliq kitabni élan qilghan. Aptor maqaliside mushu nuqta üstide analiz yürgüzüp, "Dunya bankisigha oxshash dangliq pul-mu'amile orginining xitaygha oxshash bir döletke zor sommiliq meblegh sélishi we uning aqiwitini qandaqmu tesewwur qilghili bolidu?" dégen so'alni qoyghan. 

27-Awghust küni dunya bankisi özliri üstide élan qilin'ghan yuqiriqi xewer heqqide radiyomiz muxbirigha bayanat bérip, özlirining Uyghur diyaridiki "Kespiy téxnika programmisi" gha 50 milyon dollar qerz pul bergenlikini aqlighan idi.

Toluq bet