ຣະດັບນ້ຳຄານແຫ້ງຜິດປົກກະຕິ

ພູວົງສ໌
2019-10-30
ອີແມວລ໌
ຄໍາເຫັນ
Share
ພິມ
ນ້ຳ​ຖ້ວມ​ເມືອງ​ນາ​ຊາຍ​ທອງ
ນ້ຳ​ຖ້ວມ​ເມືອງ​ນາ​ຊາຍ​ທອງ
RFA/PV

ໃນ​ປີນີ້, ຣະ​ດັບ​ນ້ຳ​ຄານ​ຢູ່​ເຂດ​ເມືອງ​ຊຽງເງິນ, ແຂວງຫຼວງ​ພ​ຣະ​ບາງ ບົກ​ແຫ້ງ​ຜິດ​ປົກ​ກະ​ຕິ​ ສົ່ງຜົ​ລ​ກະ​ທົບ​ຕໍ່​ວິ​ຖີ​ຊີ​ວິ​ຕ​ຂອງ​ຊາວ​ບ້ານ​ ທີ່​ອາ​ໃສ​ຢູ່​ລຽບແຄມ​ຄານ. ຄົນ​ຫາ​ປາບໍ່​ສາ​ມາດ​ຫາ​ປາ​ໄດ້ ຂ​ນະ​ທີ່ຜົ​ລ​ຜ​ລິ​ຕ​ດ້ານ​ການ​ກະ​ເສ​ຕ​ຕາມ​ແຄມ​ຄານ​ຂອງ​ຊາວສວນ ກໍ​ລົ້ມ​ຕາຍຫຼາຍ 10 ເຮັກ​ຕ້າ ຍ້ອນ​ຂາດ​ນ້ຳ. ດັ່ງຄວາມ​ເວົ້າ​ຂອງຊາວ​ບ້ານ ບ້ານ​ໜອງ​ດີ, ເມືອງຊຽງ​ເງິນ ແຂວງຫຼວງ​ພ​ຣະ​ບາງ ໄດ້ກ່າວຕໍ່ຜູ້​ສື່ຂ່າວວິທຍຸເອເຊັຽເສຣີ ໃນວັນທີ 24 ຕຸລາ ນີ້ວ່າ:

LSB191024TP1: “ຕາຍ​ຜູ້​ເລັກ​ຜູ້​ນ້ອຍ​ໄປນ່າ, ເຂົ້າ​ຕາຍ ຂອງ​ປະ​ຊາ​ຊົນ​ນີ້​ແຫຼະ, ມັນ​ແຫ້ງ​ແລ້ງ​ກາຍ. ຫຼາຍ​ບ້ານ​ຢູ່​ຂົງ​ເຂດນີ້​ນ່າ, ມັນ​ນ້ຳແຫ້ງ ແຫ້ງ​ແລ້ງ. ຝົນ​ຫວ່າງ​ແລ້ວນີ້ ເຂດ​ເຮົາ​ບໍ່​ຕົກ, ແລ້ງຫຼາຍ, ນ້ຳ​ກໍ​ບໍ່​ມີ.”

ທ່ານ​ກ່າວ​ຕື່ມ​ວ່າ ບັນ​ຫາ​ນ້ຳ​ຄານ​ບົກ​ແຫ້ງ​ຢູ່​ເຂດ​ເມືອງ​ຊຽງ​ເງິນ​ໃນ​ປະ​ຈຸ​ບັນ​ນີ້, ໄດ້​ສົ່ງ​ຜົ​ລ​ກະ​ທົບ​ຕໍ່​ຊາວ​ບ້ານ​ແຄມ​ຄານ​ທັງ​ໝົດ. ໂດຍ​ສ​ະ​ເພາະ​ບ້າ​ນ​ພູ​ຊ້າງ, ບ້ານ​ສົບ​ຄູນ ແລະ ບ້ານ​ໜອງ​ດີ ມີ​ປະ​ຊາ​ຊົນ​ໄດ້​ຮັບ​ຜົ​ລ​ກະ​ທົບ​ຈາກ​ນ້ຳ​ຄານ​ແຫ້ງ ບໍ່​ຕ່ຳ​ກວ່າ 100 ຄອ​ບ​ຄົວ. ເຂົ້າໃນ​ນາ​ເສັຽ​ຫາຍ​ປະ​ມານ 40 ເຮັກ​ຕ້າ ແລະ ​ພືດ​ລົ້ມ​ລຸກແຄມ​ນ້ຳ​ອີກ​ຈຳ​ນວນ​ນຶ່ງ.

ສ່ວນ​ສາ​ເຫ​ຕ​ທີ່​ເຮັດ​ໃຫ້​ນ້ຳ​ຄານ​ແຫ້ງນັ້ນ, ປະ​ຊາ​ຊົນ​ຄາດ​ວ່າ ໜ້າ​ຈະ​ເປັນ​ຍ້ອນ​ຝົ​ນ​ຕົກ​ໜ້ອຍ ແລະ ບໍ່​ແມ່ນ​ຜົ​ລ​ກະ​ທົບ​ຈາກ​ເຂື່ອນ​ນ້ຳ​ຄານ ຍ້ອນ​ວ່າ​ຕາມ​ທີ່​ເຂົາ​ເຈົ້າ​ໄດ້​ເລາະ​ເບິ່ງ​ທຸກ​ໆເຊົ້າ, ສະ​ພາບ​ນ້ຳ​ພາຍ​ໃນ​ເຂື່ອນ​ນ້ຳ​ຄານ 2 ແລະ 3 ກໍ​ແຫ້ງ​ຄື​ກັນ​.

ກ່ຽວ​ກັບ​ເຣື້ອງນີ້, ເຈົ້າ​ໜ້າ​ທີ່​ກ່ຽວ​ຂ້ອງ​ຜູ້​ບໍ່​ປະ​ສົງ​ອອກ​ຊື່ ແລະ ສຽງ ກໍ​ໄດ້​ກ່າວ​ຕໍ່​ຜູ້​ສື່​ຂ່າວ​ພວກ​ເຮົາ​ໃນ​ມື້​ດຽວ​ກັນ​ວ່າ ໃນ​ປີນີ້, ນ້ຳ​ຄານ​ແຫ້ງຫຼາຍ​ແທ້ ແລະ ປະ​ຊາ​ຊົນ​ກໍ​ໄດ້​ຮັ​ບຜົ​ລ​ກະ​ທົບຫຼາຍ, ໂດຍ​ສະ​ເພາະ​ຜູ້​ຫາ​ປາ ແລະ ຊາວ​ນາ-ຊາວ​ສວນ ທີ່​ເຮັດ​ນາ ແລະ ປູກ​ພືດ​ລົ້ມ​ລຸກຕາມ​ແຄມ​ຄານ ທີ່​ຕ້ອງ​ອາ​ໃສ​ນ້ຳ​ເປັນ​ຫຼັກ. ສາ​ເຫ​ຕ​ນຶ່ງ​ທີ່​ເຮັດ​ໃຫ້​ນ້ຳ​ຄານ​ແຫ້ງຫຼາຍ ກໍ​ເປັນ​ຍ້ອນ​ຝົນ​ບໍ່​ຕົກ ຈຶ່ງ​ເຮັດ​ໃຫ້​ນ້ຳ​ໃນ​ຣະ​ບົບ​ຊົ​ລ​ປະ​ທານ ແລະ ນ້ຳ​ຄານ​ບົກ​ແຫ້ງ​ລົງຫຼາຍ.

ຢ່າງ​ໃດ​ກໍ​ຕາມ, ເຈົ້າ​ໜ້າ​ທີ່​ຫ້ອງ​ການ​ເມືອງ​ຊຽງ​ເງິນ ແຂວງຫຼວງ​ພ​ຣະ​ບາງ ທ່ານ​ນຶ່ງ ກໍ​ເວົ້າ​ວ່າ ປະ​ຈຸ​ບັນ, ພາກ​ສ່ວນ​ກ່ຽວ​ຂ້ອງ​ກໍ​ມີ​ແຜນ​ກຳ​ລັງ​ຈະ​ລົງ​ໄປ​ເບິ່ງ​ບັນ​ຫາ​ໂຕນີ້​ຢູ່.

ຣະດັບນ້ຳຄານແຫ້ງຜິດປົກກະຕິ

LSB191024TP2: “ພວກ​ເຮົາຫາ​ກໍ​ປະ​ຊຸມ​ກັບມານີ້ ບັນ​ຫາ​ນ້ຳ​. ປະ​ຈຸ​ບັນ​ນີ້​ກໍ​ຍັງ​ແກ້ບໍ່​ທັນ​ຕົກ​ເທື່ອ, ດຽວນີ້​ກໍຂາ​ດນ້ຳ​ແລ້ວ. ປີນີ້ຫຼຸດຫຼາຍ, ​ສ​ເນີ​ຂັ້ນ​ເທິງ ກໍ​ສ​ເນີ​ແລ້ວ. ດຽວນີ້​ທາງ​ເມືອງ ຕາມ​ແຜນ​ກໍ​ກຳ​ລັງ​ກະ​ຕ​ຣຽມ​​ຈະລົງ​​ເບິ່ງ​ຢູ່ແຄມ​ນ້ຳ.​”

ອີງ​ຕາມ​ຄວາມ​ເວົ້າ​ຂອງ​ປະ​ຊາ​ຊົນ ແລະ ເຈົ້າ​ໜ້າ​ທີ່​ຂ​ແນງ​ການ​ທີ່​ກ່ຽວ​ຂ້ອງ, ຕາມ​ປົກ​ກະ​ຕິ​ແລ້ວ ນ້ຳ​ຄານ​ໃນ​ໄລ​ຍະ​ເດືອນ​ກັນ​ຍາ ຫາ ເດືອນ​ທັນ​ວາ ຈະ​ບໍ່​ແຫ້ງ​ຄື​ກັບ​ປີນີ້. ໃນ​ປີ​ກ່ອນໆ, ໄລ​ຍະ​ດຽວ​ກັນ ຣະ​ດັບ​ນ້ຳ​ຈະ​ສູງ​ຂຶ້ນ​ເກືອບ​ຮອດ​ດິນ​ປູ​ກ​ຝັງ​ປະ​ຊາ​ຊົນ​ແຄມ​ຄານ, ແຕ່​ມາ​ຮອດ​ປີນີ້ ນ້ຳ​ຄານ​ພັດ​ແຫ້ງ​ມາ​ຕັ້ງ​ແຕ່​ເດືອນ​ກັນ​ຍາ ແລະ ຄາດ​ວ່າ​ຈະ​ແຫ້ງ​ຕື່ມ​ອີກ​ເລື້ອຍໆ.

ຄໍາເຫັນ (0)
Share
ເຕັມຫນ້າ