ຊາວລາວຍັງຖືກຈຳກັດ ສິດທິ ຂັ້ນພື້ນຖານ

ສິດນີ
2017-12-08
ອີແມວລ໌
ຄໍາເຫັນ
Share
ພິມ
ບົດຣາຍງານ ປະຈຳປີ 2016-2017 ຂອງອົງການນິຣະໂທດກັມສາກົນ ຣະບຸວ່າ ສປປລາວ ຍັງຈຳກັດຮັດແຄບ ສິດທິຂັ້ນພື້ນຖານ ປະເພດຕ່າງໆ ຂອງປະຊາຊົນລາວ ຫລາຍຢູ່.
ບົດຣາຍງານ ປະຈຳປີ 2016-2017 ຂອງອົງການນິຣະໂທດກັມສາກົນ ຣະບຸວ່າ ສປປລາວ ຍັງຈຳກັດຮັດແຄບ ສິດທິຂັ້ນພື້ນຖານ ປະເພດຕ່າງໆ ຂອງປະຊາຊົນລາວ ຫລາຍຢູ່.
Public Domain

ອົງການນິຣະໂທດກັມສາກົນ ໄດ້ອອກບົດຣາຍງານ ປະຈຳປີ 2016-17 ຣະບຸ ສປປລາວ ວ່າ ຍັງຈຳກັດສິດເສຣິພາບ ຂອງປະຊາຊົນລາວ ຫຼາຍຢູ່ ເປັນຕົ້ນສິດທິໃນການປາກເວົ້າ ການສະແດງອອກ ການຊຸມນຸມການປະທ້ວງ ແລະສິດທິຂັ້ນພື້ນຖານ ປະເພດຕ່າງໆ ທີ່ປະຊາຊົນ ຈາກຫລາຍປະເທດ ເຂົາມີກັນ.

ຣາຍງານວ່າ ພາກຣັດຍັງສືບຕໍ່ຄວບຄຸມສື່ມວນຊົນ ບໍ່ວ່າໃນກໍຣະນີໃດໆ ເປັນຕົ້ນໃນເຄື່ອຂ່າຍອິນເຕິເນັດ ຫລືໃນຮູບແບບອື່ນໆ ຮ່ວມດ້ວຍ ການຄວບຄຸມ ອົງການຈັດຕັ້ງ ທາງສັງຄົມ ຢ່າງເຂັ້ມງວດ ໂດຍສະເພາະໃນເຫດການມີ ກອງປະຊຸມໃຫຍ່ໆ ທີ່ລາວ ເປັນເຈົ້າພາບ ແລະ ໃນເຫດການ ທົ່ວໄປໃນລາວ ຈະບໍ່ມີການຍົກເວັ້ນ.

ການກົດຂີ່ຂົ່ມເຫັງແລະນາບຂູ່ ຈັບກຸມນັກເຄື່ອນໄຫວ ເພື່ອ ປະຊາທິປະຕັຍ ແລະ ສິດທິມະນຸດ ຍັງສືບຕໍ່ໄປ ນັກໂທດຈິດສານຶກ ສອງຄົນ ຖືກປ່ອຍຕົວ ວ່າງເດືອນມິນາຜ່ານມາ ຫລັງຈາກຖືກຄຸກມາເປັນເວລາ 17 ປີ ນອກຈາກນີ້ ຍັງບໍ່ມີນັກໂທດຈິດສຳນຶກ ຄົນໃດຖືກປ່ອຍຕົວ ແລະບາງຄົນ ກໍເສັຽຊີວິດໃນຄຸກ, ດັ່ງກຸ່ມນັກສຶກສາ ເພື່ອ ປະຊາທິປະຕັຍ ທີ່ຖືກຈັບ ແລະນັກໂທດການເມືອງຫລາຍຄົນ ຮ່ວມທັງນັກໂທດ ຄົນງານລາວສາມຄົນ ທີ່ກັບຈາກໄທ ທີ່ທາງການລາວຕັດສິນຈຳຄຸກ ຍ້ອນລົງຂໍ້ຄວາມ ຂໍຄວາມເປັນທັມ ຈາກຣັຖບານ ໃນເຄືອຂ່າຍ ອິນເຕິເນັດ. ກໍຖືກຄຸກເປັນເວລາຫລາຍປີ ປາສຈາກການອຸທອນ ແລະຕັດສີນຄະດີ ແບບຣະບົບກົດຫມາຍ ແລະຜ່ານຂະບວນການຍຸຕິທັມ. ດັ່ງທີ່ຫລາຍປະເທດ ເຂົາເຮັດກັນ.

ຍັງບໍ່ມີຄວາມຄືບຫນ້າໃນການສືບສວນ ການບັງຄັບໃຫ້ຫາຍສາບສູນ ຂອງທ່ານ ສົມບັດ ສົມພອນ ນັກພັທນາກອນ ທີ່ໂດ່ງດັງໃນລາວ ໃນປີ 2012 ແລະ ລົງໂທດປະຫານຊີວີດ ພວກນັກໂທດຜູ້ຄ້າ ຢາເສບຕິດ ຣາຍໃຫຍ່ ຍັງຖືກບັງຄັບໃຊ້ ໃນສານຂອງ ສປປລາວຢູ່.

ສາກົນສະແດງຄວາມເປັນຫ່ວງກ່ຽວກັບ ຜົລກະທົບຈາກການສ້າງເຂື່ອນໃນລາວ ທີ່ມີການບັງຄັບໂຍກຍ້າຍ ປະຊາຊົນ ໃນນັ້ນຮ່ວມດ້ວຍ ເຂື່ອນ ກັ້ນນ້ຳຂອງ ແລະເຂື່ອນອື່ນໆ ທີ່ສົ່ງຜົລກະທົບ ຕໍ່ວິຖີຊີວິດ ຂອງປະຊາຊົນຫຼາຍລ້ານຄົນ ຊຶ່ງເປັນການນາບຂູ່ຕໍ່ ສິດທິການຫາຢູ່ ຫາກິນ ການເຄື່ອນໄຫວ ການດຳຣົງຊີບແລະການອາສັຍ ຢູ່ພູມລຳເນົາຕົນເອງ ຂອງປະຊາຊົນທ້ອງຖິ່ນ ຮ່ວມທັງກຸ່ມຊົນເຜົ່າ ໃນເຂດພື້ນທີ່ ສ້າງເຂື່ອນ.

ໃນປະເດັນການບັງຄັບຄົນຫາຍສາບສູນ ເທົ່າເຖິງປັດຈຸບັນ ຍັງບໍ່ຮູ້ຊາຕາກັມຂອງ ທ່ານ ສົມບັດ ສົມພອນ ຜູ້ທີ່ຖືກເຈົ້າຫນ້າທີ່ລາວ ບັງຄັບ ໃຫ້ຫາຍສາບສູນ ໃນປີ 2012 ຢູ່ຕໍ່ຫນ້າປ້ອມຍາມຕຳຣວດ ໃຈກາງ ນະຄອນຫລວງວຽງຈັນ ໃນຕອນກາງເວັນ, ອີງຕາມຮູບພາບໃນກ້ອງ ວົງຈອນປິດ ທ່ານຖືກເຈົ້າຫນ້າທີ່ລາວ ນອກເຄື່ອງແບບ ບັງຄັບໃຫ້ຂຶ້ນຣົດ ແລ້ວເອົາຕົວໄປ. ກ່ຽວກັບການຫາຍສາບສູນ ຂອງທ່ານ ສົມບັດ ສົມພອນ ຍານາງ ອຶງ ຊຸຍ ເມັງ ພັລຍາຂອງທ່ານ ສົມບັດ ສົມພອນ ໄດ້ຮຽກຮ້ອງ ຄວາມຈິງ ຈາກຣັຖບານລາວ ໃນບັນຫານີ້, ດັ່ງຍານາງ ກ່າວກ່ຽວກັບ ການຫາຍສາບສູນ ຂອງສາມີຂອງນາງ ໃນມື້ວັນທີ 7 ທັນວາ ປີ 2017 ທີ່ສະມາຄົມ ນັກຂ່າວຕ່າງປະເທດ ຢູ່ບາງກອກ ປະເທດໄທ ຕອນນື່ງວ່າ:

"5 ປີຜ່ານມາແລ້ວ ສົມບັດ ກໍຫາຍໄປ 5 ປີແລ້ວ ສິ່ງທີ່ຂ້ອຍຢາກຝາກຣັຖບາລວ່າ ຖ້າວ່າຮູ່ວ່າ ສົມບັດ ຢູ່ໃສ ຫລືວ່າມີຊີວິດຢູ່ ຫລືບໍ່ຢູ່ກໍຕາມ ຕ້ອງບອກ ຊຸຍ ເມັງ ຕ້ອງໄດ້ຄໍາຕອບ ຈາກຣັຖບາລ ຊຸຍ ເມັງ ຢາກໄດ້ຄວາມຈິງ ຖ້າວ່າບໍ່ໄດ້ ມື້ໃດບໍ່ໄດ້ຄໍາຕອບ ແລະບໍ່ໄດ້ຄວາມຈິງ ຊຸຍ ເມັງ ຢາກສືບຕໍ່ຊອກຫາ ສົມບັດ ຢູ່ ຖາມຫາຣັຖບາລ ເຈົ້າໜ້າທີ່ ສົມບັດ ຢູ່ ສົມບັດ ຢູ່ໃສ."

ນອກຈາກນັ້ນ ທາງການລາວຍັງມິດງຽບ ໃນການໃຫ້ຂໍ້ມູນກ່ຽວກັບ ການຫາຍສາບສູນ ຂອງ ທ້າວ ກາຢາງ ຊາວລາວເຜົ່າມົ້ງ ທີ່ຖືກຈັບ ຫລັງຈາກທີ່ລາວ ຖືກບັງຄັບໃຫ້ກັບຄືນໄປລາວຈາກໄທ ເທື່ອທີສອງ ໃນປີ 2011. ກ່ອນຫນ້ານັ້ນ ລາວ ຖືກສົ່ງກັບຄືນ ມາລາວໃນປີ 2009 ທັ້ງໆທີ່ລາວ ໄດ້ຮັບຖານະການເປັນ ຜູ້ອົພຍົບ ຈາກອົງການຂ້າຫລວງໃຫຍ່ ດ້ານຜູ້ອົພຍົບ ສະຫະປະຊາຊາດ ຍັງສົ່ງລາວກັບຄືນໄປລາວ ໃນປີ 2011 ຫລັງຈາກນັ້ນ ກໍຫາຍສາບສູນເລີຍ.

ກ່ຽວກັບສິດທິການສະແດງອອກ ບົດຣາຍງານ ປະຈຳປີ ຂອງອົງການນິຣະໂທດກັມສາກົນ ໃນປີ 2016-17 ຣະບຸວ່າອົງການຈັດຕັ້ງທາງ ສັງຄົມ ຫລາຍອົງການໃນລາວ ຍັງຖືກຄວບຄຸມ ຈາກທາງການລາວ ຢ່າງເຄັ່ງຄັດ. ວ່າງເດືອນມົກຣາ ຜ່ານມາ ທາງການລາວໄດ້ອອກ ດຳຣັດ ໃຫ້ອົງການຂ່າວຕ່າງຊາດ ໃນລາວ ທຸກອົງການ ຕ້ອງສົ່ງເນື້ອຫາສາຣະຂອງຂ່າວສານ ໄປໃຫ້ຫ້ອງການຂ່າວຂອງຣັຖບານ ເພື່ອ ກວດສອບກ່ອນຈະສາມາດ ພິມອອກໄດ້ ແລະວ່າງເດືອນທັນວາ ຜ່ານມາ ກົດຫມາຍວ່າດ້ວຍ ສື່ມວນຊົນຂອງປີ 2008 ຖືກດັດແປງໃຫມ່ ເພື່ອຄ້ຳປະກັນ ການຄວບຄຸມ ສື່ມວນຊົນຢ່າງເຄັ່ງຄັດ ໃນການສົ່ງເສີມນະໂຍບາຍ ຂອງພັກຣັດ.

ທ່ານ PHIL ROBERTSON ຮອງຜູ້ອຳນວຍການ ອົງການ ສິ້ງຊອມ ດ້ານສິດທິມະນຸດ ປະຈຳຂົງເຂດ ເອເຊັຽປາຊີຟິກ ເວົ້າວ່າ ສປປລາວ ຍັງຈຳກັດ ສິດທິ ຂັ້ນພື້ນຖານ ຂອງ ປະຊາຊົນລາວ ຫລາຍຢູ່ໃນ ທຸກມື້ນີ້ ດັ່ງທ່ານ ກ່າວຕໍ່ ເອເຊັຽ ເສຣີ ໃນຣະຍະທີ່  ຜ່ານມາວ່າ.

"ຍັງບໍ່ມີຫຍັງຄືບຫນ້າ ເວົ້າຕົງໆ ຍັງເຫມືອນເດີມ ລາວ ດ້ານສິດທິມະນຸດ ຂີ້ຮ້າຍລົງ ເລື້ອຍໆ ຍັງມີການ ປິດເສຣີ ທາງການສື່ ນຳອີກ".

ບົດຣາຍງານຣະບຸຕໍ່ໄປວ່າ ໃນດຳຣັດເລກທີ 327 ທີ່ຫ້າມປະນາມຣັຖບານລາວ ແລະພັກຣັດ ຜ່ານເຄືອຄ່າຍອິນເຕີເນັດ ເຈົ້າໜ້າທີ່ລາວ ໄດ້ສິ້ງຊອມພຶດຕິກັມ ຜູ້ໃຊ້ອິນເຕິເນັດໃນລາວ. ສປປລາວໄດ້ຍົກເລີກ ເປັນເຈົ້າພາບກອງປະຊຸມ ອົງການຈັດຕັ້ງ ທາງສັງຄົມອາຊຽນໃນປີ 2016 ດ້ວຍການໃຫ້ເຫດຜົລວ່າ ຂາດງົບປະມານ ແຕ່ຄວາມເປັນຈິງນັ້ນ ກໍແມ່ນວ່າ ບໍ່ຢາກສ່ຽງເປີດໂອກາດ ໃຫ້ສະມາຊິກ ອົງການຈັດຕັ້ງ ທາງສັງຄົມ ຈາກບັນດາ ປະເທດອາຊຽນ ມາປະນາມຣັຖບານລາວ ໃນເວທີດັ່ງກ່າວ.

ສຳລັບຄວາມຂັດແຍ່ງທາງດ້ານທີີ່ດິນນັ້ນ ບົດຣາຍງານຣະບຸວ່າ ເທົ່າເຖິງປັດຈຸບັນ ທາງການລາວ ຍັງບໍ່ມີການແກ້ໄຂ ແບບເປັນທັມເທື່ອ ການແກ້ໄຂ ຂອງຣັຖບານໃນບັນຫານີ້ ແລະໃນຫລາຍບັນຫາ ຄວາມຂັດແຍ່ງ ໃນຫລາຍກໍຣະນີ ກໍບໍ່ສົມເຫດສົມພົລ ແລະເປັນທັມຕໍ່ ຊາວບ້ານ ຜູ້ທີ່ຖືກບັງຄັບ ໃຫ້ໂຍກຍ້າຍ ແລະຍັງມີຫລາຍບັນຫາ ທີ່ທາງການລາວ ຍັງຣະເມີດສິດທິ ຂອງປະຊາຊົນ ຕົນເອງຢູ່.

ແຕ່ເຖິງຢ່າງໃດກໍຕາມ ທາງການລາວເວົ້າວ່າ ກົດຣະບຽບຫລືມັດຕິຕ່າງໆ ທີ່ທາງການລາວອອກມານັ້ນ ກໍເພື່ອຄວາມປອດພັຍ ຂອງຊາດ ຈາກກຸ່ມຄົນບໍ່ດີ ທີ່ສ້າງບັນຫາ ປຸກຣະດົມ ໃຫ້ມີການຕໍ່ຕ້ານ ຣັຖບານ ເຫມືອນດັ່ງ ໃນຫລາຍປະເທດໃນໂລກ ຂະເຈົ້າກໍມີກົດຫມາຍຄວບຄຸມ ແລະປ້ອງກັນຄວາມປອດພັຍຂອງຊາດ ເຫມືອນກັນ.

ທາງການລາວ ເວົ້າວ່າ ບັນຫາດັ່ງກ່າວເປັນບັນຫາ ຄວາມປອດພັຍຂອງຊາດ ທາງການລາວຕ້ອງໄດ້ ຈັບກຸມບຸກຄົນ ຜູ້ທີ່ປຸກຣະດົມ ຊັກຊວນ ໃຫ້ສັງຄົມລາວ ແຕກແຍກ ຫລື ຮ່ວມຫົວກັນທັບມ້າງ ການປົກຄອງ ພັກຣັດ. ແຕ່ນັກວິເຄາະເວົ້າວ່າ ກົດຫມາຍລາວ ເປັນກົດຫມາຍ ຂາດມາຕຖານສາກົນ ຍ້ອນການຈັບກຸມ ແລະການຕັດສີນຄະດີ ລົງໂທດຜູ້ຕ້ອງຫາ ບໍ່ຜ່ານຂະບວນການຍຸຕິທັມ ທີ່ຫລາຍປະເທດເຂົາ ປະຕິບັດກັນ.

ເຕັມຫນ້າ