ນ້ຳຂອງຜິດທັມມະຊາດ ຂຶ້ນລົງ ກະທັນຫັນ

ອຸ່ນແກ້ວ ສຸກສະຫວັນ
2019-08-19
ອີແມວລ໌
ຄໍາເຫັນ
Share
ພິມ
ເມື່ອເຫັນສະພາບນໍ້າຂອງ ທີ່ ບົກແຫ້ງ ປະຊາຊົນຫວາດຫວັ່ນວິຕົກ ກັງວົນ ເພາະສາຍນໍ້າຂອງ ປຽບສະເໝືອນທຸກຢ່າງ ໃນການຢູ່ລອດ ຂອງປວງປະຊາຣາສດອນ
ເມື່ອເຫັນສະພາບນໍ້າຂອງ ທີ່ ບົກແຫ້ງ ປະຊາຊົນຫວາດຫວັ່ນວິຕົກ ກັງວົນ ເພາະສາຍນໍ້າຂອງ ປຽບສະເໝືອນທຸກຢ່າງ ໃນການຢູ່ລອດ ຂອງປວງປະຊາຣາສດອນ
RFA/TS

ການຂຶ້ນລົງແບບຜິດປົກກະຕິ ຂອງແມ່ນ້ຳຂອງ ໃນເດືອນທີ່ຜ່ານມາ ນັບແຕ່ເດືອນມີນາ ຫາ ເດືອນສິງຫາ 2019 ທີ່ສົ່ງຜົນກະທົບ ຕໍ່ ປະຊາຊົນ ທີ່ອາໃສຢູ່ຕາມລຳແມ່ນ້ຳຂອງ ໂດຍສະເພາະການຂຶ້ນລົງ ຂອງແມ່ນ້ຳຂອງ ນັກວິຊາການ ແລະ ປະຊາຊົນ ແລະ ເຈົ້າຫນ້າທີ່ ຈາກຫລາຍພາກສ່ວນ ກໍເວົ້າເຖີງເລື້ອງນີ້ ວ່າ ເປັນຍ້ອນການເປີດປິດ ເຂື່ອນຂອງຈີນ ຢູ່ແມ່ນ້ຳຂອງຕອນເທິງ ແຕ່ບາງຄົນກໍໃຫ້ເຫດຜົນວ່າ ເປັນຍ້ອນພາວະແຫ້ງແລ້ງ.

ຍານາງ ພຽງພອນ ດີແທດ ຜູ້ປະສານງານ ອົງການແມ່ນ້ຳສາກົນ ຫລື International River ປະຈຳຢູ່ບາງກອກ ປະເທດໄທ ໄດ້ກ່າວຕໍ່ ເອເຊັຽເສຣີ ໃນວັນທີ 13 ສິງຫາ ວ່າ:

"ຣະດັບນ້ຳຂອງ ທີ່ປ່ຽນແປງຢ່າງໜັກ ທີ່ເຫັນໄດ້ຈະແຈ້ງ ກໍແມ່ນໃນໄລຍະ ເດືອນກໍຣະກະດາ ຫລື ເດືອນທີ່ແລ້ວນີ້ ທີ່ເຂື່ອນຈິງຫົງ ໃນຈີນ ມີປະກາດແຈ້ງ ຕໍ່ປະເທດ ທ້າຍນ້ຳ ໂດຍແຈ້ງທີ່ ຄນະກຳມາທິການແມ່ນ້ຳຂອງ ຫລື MRC ວ່າ ຈະມີການລົດຣະດັບ ການປ່ອຍນ້ຳ ເພື່ອ ທີ່ຈະບຳລຸງຮັກສາສາຍສົ່ງໄຟຟ້າ."

ຢາງນາງກ່າວຕື່ມອີກວ່າ ແມ່ນ້ຳຂອງມີການປ່ຽນແປງ ແບບຜິດ ທັມມະຊາດມາໄດ້ ເປັນເວລາ 10 ປີ ແລ້ວ ນັບແຕ່ມີການສ້າງເຂື່ອນ ໃສ່ ແມ່ນ້ຳຂອງ ຕອນເທິງ ແຂວງຢູນານ ປະເທດຈີນ ຊຶ່ງທີ່ຕັ້ງຂອງໂຕເຂື່ອນ ຫ່າງຈາກແຂວງບໍ່ແກ້ວ ໄປທາງພາກເໜືອ ປະມານ 300 ກິໂລແມັດ.

ຫລ້າສຸດໃນເດືອນກໍຣະກະດາ ເຂື່ອນຈິງຫົງຂອງຈີນ ກໍໄດ້ລົດຈຳນວນການປ່ອຍນ້ຳ ຈາກ 1,200 ແມັດກ້ອນ ມາເປັນ 500 ຫາ 600 ແມັດກ້ອນ ຕໍ່ວິນາທີ ຈຶ່ງເຮັດໃຫ້ແມ່ນ້ຳຂອງ ແຫ້ງຢ່າງວ່ອງໄວ ແລະ ສົ່ງຜົນກະທົບ ຕໍ່ປະຊາຊົນ ຈຶ່ງເຮັດໃຫ້ປະຊາຊົນ ທີ່ອາໃສຢູ່ແຄມ ນ້ຳຂອງ ທັງລາວ ແລະ ໄທ ໄດ້ຮັບຜົນກະທົບ.

ນອກຈາກນີ້ ກາງເດືອນກໍຣະກະດາ ທີ່ຜ່ານມາ ເຂື່ອນໄຊຍະບູຣີ ຢູ່ແຂວງໄຊຍະບູຣີ ກໍເລີ້ມຕັນນ້ຳ ເພື່ອທົດລອງຜລິດກະແສໄຟຟ້າ ແລະ ເຮັດໃຫ້ແມ່ນ້ຳຂອງ ທີ່ຢູ່ເຂດເມືອງປາກລາຍ ລົງມາຮອດນະຄອນຫລວງວຽງຈັນ ບົກແຫ້ງຢ່າງໄວວາ. ກ່ຽວກັບ ເລື້ອງນີ້ ປະຊາຊົນຢູ່ເຂດ ບ້ານສີສະຫວ່າງ ເມືອງປາກລາຍ ທີ່ອາໃສຢູ່ແຄມນ້ຳຂອງ ໄດ້ກ່າວວ່າ ນ້ຳຂອງປົກແຫ້ງ ຢູ່ເຂົາເຈົ້າ ຍ້ອນວ່າ ເຂື່ອນໄຊຍະບູຣີ ຕັນນ້ຳ.

"ສາເຫດກໍຄິດວ່າ ແມ່ນເພິ່ນອັດເຂື່ອນຫັ້ນລະເນາະ ຫລັງອັດແລ້ວ ມັນກະຫລຸດລົງເດ້ ເພິ່ນອັດ ວັນທີ 22-23 ກະຣະກະດາ ນີ້ແຫລະ ຂ້ອຍກໍບໍ່ຈື່ແລ້ວເວີ້ຍເນາະ ແພແຕ່ລະແພກໍຄ້າງ ເຮືອນ້ອຍເຮືອຈັກ ເຮືອຫຍັງກໍຄ້າງຢູ່ຫລາຍໆ ແຕ່ດຽວນີ້ບໍ່ແຫ້ງແລ້ວເດ້ ຂະເຈົ້າປ່ອຍແລ້ວ ເດີ ຄັນຂະເຈົ້າອັດ ກໍແຫ້ງ."

ອີງຕາມຂໍ້ມູນຈາກປະຊາຊົນ, ມີຊາວບ້ານ 3 ບ້ານ ທີ່ຂຶ້ນກັບເມືອງປາກລາຍ ໄດ້ຮັບຜົນກະທົບ ຄື ບ້ານສຸກສະຫວ່າງ, ບ້ານທ່າສະຫວ່າງ, ບ້ານປາກລາຍ ຊຶ່ງໃນເບື້ອງຕົ້ນມີ ປະຊາຊົນທັງໝົດ 100 ຄອບຄົວ ທີ່ປູກຜັກຢູ່ແຄມຂອງ ໄດ້ຮັບຜົນກະທົບ ເພາະວ່າ ຜັກຂອງເຂົາເຈົ້າ ຖືກນ້ຳຖ້ວມ. ຜູ້ປະກອບການຮ້ານອາຫານ ເຮືອນແພ, ຜູ້ຂັບເຮືອນຳທ່ຽວ, ແລະ ຊາວປະມົງ ທັງໝົດປະມານ 60 ຄອບຄົວ ກໍໄດ້ຮັບຜົນ ກະທົບເຊັ່ນດຽວກັນ.

ເຈົ້າໜ້າທີ່ວິຊາການຂອງບໍຣິສັດ ຊໍ ການຊ່າງ ຂອງໄທ ທີ່ປະຈຳຢູ່ເຂື່ອນໄຊຍະບູຣີ ໄດ້ກ່າວຕໍ່ເອເຊັຽເສຣີ ວ່າ:

"ແທ້ຈິງແລ້ວ ມັນບໍ່ໄດ້ກ່ຽວກັບໂຕເຂື່ອນດອກ ມັນກ່ຽວກັບສະພາບແວດລ້ອມ ຫລາຍກວ່າ ຄືທາງເທັກນິກແລ້ວ ປີນີ້ ນ້ຳໜ້ອຍ ມັນກໍຕ້ອງ ແຫ້ງແລ້ງເປັນທັມມະດາ ຢູ່ເຂດພີ້ຄືຝົນບໍ່ຕົກເລີຍ ປົກກະຕິຄືຕ້ອງຝົນຕົກແລ້ວ ໃນຕອນນີ້."

ນອກຈາກການຂຶ້ນລົງ ຂອງລະດັບນ້ຳຂອງແລ້ວ ຢູ່ເມືອງ ແລະ ແຂວງຫລວງພຣະບາງ ປະຊາຊົນທີ່ອາໃສຢູ່ ແຄມນ້ຳຂອງ ກໍເວົ້າວ່າ ນ້ຳຂອງຢູ່ແຂວງຫລວງພຣະບາງ ຍາມບົກ ກໍບົກລົງຫລາຍ ຍາມນ້ຳຂຶ້ນ ກໍຂຶ້ນຫລາຍ ຊຶ່ງເປັນແບບນີ້ ທຸກໆປີ ນັບແຕ່ມີ ການສ້າງເຂື່ອນ ຢູ່ຕອນເທິງແມນ້ຳຂອງ.

ກ່ຽວກັບນ້ຳຂອງບົກແຫລ້ງ ຢູ່ແຂວງຫລວງພຣະບາງ ເຈົ້າໜ້າທີ່ຜແນກກະສິກັມ ແລະປ່າໄມ້ ແຂວງຫລວງພຣະບາງ ທ່ານນຶ່ງ ໄດ້ກ່າວວ່າ ສາເຫດຂອງມັນ ບໍ່ເປັນຍ້ອນເຂື່ອນ:

"ບໍ່ບໍ່ບໍ່ ນ້ຳແຫ້ງບໍ່ແມ່ນເຂື່ອນ ບໍ່ປ່ອຍນ້ຳ ມັນແຫ້ງແລ້ງກໍຖືວ່າ ດິນຟ້າອາກາດນີ້ແຫລະ ກະທົບນີ້ນະ ລໍຖ້າແຕ່ຝົນນີ້ໄດ໋ ເພາະແລ້ງຢູ່ພີ້ແລ້ງ ຝົນບໍ່ຕົກ ມັນຕົກກໍຕົກເປັນບ່ອນ ເຂດເຮົາບໍ່ຕົກ ນ້ຳມັນນ້ອຍຢູ່ ແຕ່ວ່າ ກໍບໍ່ແຫ້ງຂອດຫລອດດອກ ນ້ຳມັນໜ້ອຍ ເພາະຝົນບໍ່ຕົກ."

ຢູ່ນະຄອນຫລວງວຽງຈັນ ກໍໄດ້ຮັບຜົນກະທົບເຊັ່ນກັນ - ຊາວບ້ານກໍປະສົບບັນຫານ້ຳແຫ້ງ ໃນເດືອນເມສາ ຫາ ເດືອນກໍຣະກະດາ ແລະ ນ້ຳຂຶ້ນລົງ ລະຫວ່າງ ເດືອນກໍຣະກະດາ ຫາ ເດືອນສິງຫາ ນີ້ຄືກັນ. ເຈົ້າໜ້າທີ່ກົມຊັພຍາກອນນ້ຳ ແລະ ອຸຕຸ  ໃຫ້ເຫດຜົນວ່າ ນ້ຳແຫ້ງ ເປັນຍ້ອນພັຍທຳມະຊາດ ຫລາຍກວ່າ:

"ທາງກົມຊັພຍາກອນນ້ຳ ແລະ ອຸຕຸ ເຮົານີ້ ສຳຣວດນີ້ສຸດແລ້ວຫັ້ນກໍ ຣະດັບນ້ຳຈະຂຶ້ນຮອດ ຈັກແມັດຈັກແມັດ ນ້ຳນີ້ ຈະຂຶ້ນຮອດເທົ່ານີ້ ເທົ່ານັ້ນ ແຫລະແມ່ນ ສ່ວນຫລາຍກໍເພາະວ່າ ສະພາບອາກາດຫັ້ນແຫລະ ເກີດຝົນຕົກໜັກ ເພາະວ່າ ຝົນຕົກໜ້ອຍ ຫັ້ນແຫລະ."

ເຖິງຢ່າງໃດກໍຕາມ, ນັກວິຊາການຈາກຫລາຍພາກສ່ວນ ກໍເວົ້າວ່າ ນ້ຳຂອງແຫ້ງເປັນການກະທຳ ຂອງຄົນຫລາຍກວ່າ ເປັນຕົ້ນແມ່ນ ການປິດເຂື່ອນ ໃນປະເທດຈີນ ແລະ ໃນປະເທດລາວ ໃນຍາມແລ້ງ ຍ້ອນວ່າ ຕ້ອງການນ້ຳໄວ້ ຜລິດກະແສໄຟຟ້າ ຈຶ່ງເຮັດໃຫ້ນ້ຳແຫ້ງ ແລະ ໃນຍາມຝົນ ເຂື່ອນດັ່ງກ່າວ ກໍປ່ອຍນ້ຳ ຍ້ອນຢ້ານເຂື່ອນແຕກ ຈຶ່ງເຮັດໃຫ້ນ້ຳຖ້ວມ ກະທັນຫັນ.

ໃນເດືອນເມສາ ຫາ ເດືອນກໍຣະກະດາ ເຂື່ອນຈີນ ໄດ້ຫລຸດການປ່ອຍນ້ຳ ເບື້ອງຕົ້ນ ຢູ່ແຂວງບໍ່ແກ້ວ ມີປະຊາຊົນ 300 ຄອບຄົວຄອບຢູ່ ບ້ານປາກງາວ, ບ້ານສີບຸນເຮືອງ, ບ້ານສີເມືອງງາມ, ບ້ານຫ້ວຍຕາບ ແລະ ບ້ານໂຄກຫຼວງ ທີ່ຂຶ້ນກັບເມືອງຕົ້ນເຜິ້ງ ກໍໄດ້ຮັບ ຜົນກະທົບ ບໍ່ສາມາດໄປເກັບໄຄຂາຍໄດ້ ແລະ ຫລັງຈາກນັ້ນ ທີ່ຈີນຈະປ່ອຍນ້ຳ ຫລາຍຂຶ້ນ ຫລັງຈາກຝົນຕົກ ໃນເດືອນກໍຣະກະດາ ລະດັບນ້ຳກໍສູງ ຂຶ້ນເລື້ອຍໆ ຈົນຖ້ວມພືດຜັກ ຂອງຊາວບ້ານທັງສອງ 2 ແມ່ນ້ຳຂອງ ຢູ່ປະເທດລາວ ແລະ ໄທ.

ໃນຕົ້ນເດືອນສິງຫາ ທີ່ຜ່ານມາ, ທາງການເມືອງສັງທອງ ແລະ ເມືອງສີໂຄດຄະບອງ ນະຄອນຫລວງວຽງຈັນ ໄດ້ອອກແຈ້ງເຕືອນ ປະຊາຊົນທີ່ອາໄສຢູ່ 9 ບ້ານ ທີ່ຕັ້ງຢູ່ແຄມນ້ຳຂອງ ໃຫ້ເຝົ້າລະວັງນ້ຳຖ້ວມ ກະທັນຫັນໃນເວລານີ້.

ດັ່ງປະຊາຊົນ ທ່ານ ນຶ່ງໄດ້ກ່າວຕໍ່ເອເຊັຽເສຣີ ວ່າ ທາງເມືອງເພິ່ນ ກໍໄດ້ກ່າວເຕືອນໝົດແລ້ວ ແຈ້ງໝົດແລ້ວ ເຮົາກໍໄດ້ກຽມຮັບມືຢູ່ ໂດຍຕລອດຫັ້ນແຫລະ ກໍໄດ້ກ່າວເຕືອນໃຫ້ອຳນາດການປົກຄອງ ແຕ່ລະບ້ານ ບ້ານທີ່ຢູ່ບ່ອນສ່ຽງ ທາງລຸ່ມຄັນນ້ຳຂຶ້ນ ກໍກ່າວເຕືອນ ໃຫ້ປະຊາຊົນກຽມແລ້ວ.

ເຖິງຢ່າງໃດກໍຕາມ, ໃນຕົ້ນເດືອນສິງຫາ ທີ່ຜ່ານມາ ມີການປະຊຸມຄນະຮ່ວມ ສາຂາຊັພຍາກອນນ້ຳ ຕາມຄວາມຮ່ວມມື ແມ່ນ້ຳຂອງ ແມ່ນ້ຳລ້ານຊ້າງ ຊຶ່ງມີປະຊາຊົນທັງໝົດ 5 ປະເທດ ຄື ໄທ, ຈີນ, ພະມ້າ, ວຽດນາມ ແລະ ລາວ. ແຕ່ໃນກອງປະຊຸມ ຄັ້ງນີ້ ປະເທດລາວ ບໍ່ໄດ້ເຂົ້າຮ່ວມ.

ຄໍາເຫັນ (1)
Share

(

Look here Lao brainless party-state. When your master- red China - needs water it'll keep it and you'll die of thurst. When red China releases water you'll die of flood. I hope it's clear for you. Enjoy.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Aug 22, 2019 05:21 AM

ເຕັມຫນ້າ