ມ.ລອງ ໃຫ້ຈີນປູກກ້ວຍ ເພີ້ມອີກ

ມະນີຈັນ
2019-08-19
ອີແມວລ໌
ຄໍາເຫັນ
Share
ພິມ
ສວນປູກກ້ວຍ ຂອງນັກລົງທຶນຈີນ ຢູ່ແຂວງຫຼວງນໍ້າທາ
ສວນປູກກ້ວຍ ຂອງນັກລົງທຶນຈີນ ຢູ່ແຂວງຫຼວງນໍ້າທາ
RFA

ທາງຫ້ອງການເມືອງລອງ ແຂວງຫລວງນໍ້າທາ ອະນຸຍາດໃຫ້ນັກລົງທືນຈີນ ເຂົ້າມາສຳປະທານເນື້ອທີ່ປູກກ້ວຍຕື່ມອີກ 120 ປາຍເຮັກຕາ ຢູ່ບ້ານບໍ່ ແລະບ້ານຈາປີ ເມືອງລອງ. ໂຄງການປູກກ້ວຍດັ່ງກ່າວ ໄດ້ເລີ້ມປູກມາແຕ່ ເດືອນຕຸລາ ປີ 2018 ແລະ ຈະສໍາເຣັດໃນທ້າຍ ເດືອນສິງຫາ ປີ 2019 ນີ້. ດັ່ງເຈົ້າໜ້າທີ່ເມືອງລອງ ກ່າວຕໍ່ນັກຂ່າວທ້ອງຖິ່ນ ໃນວັນທີ 13 ສິງຫາ ນີ້ວ່າ:

"ອະນຸຍາດແຕ່ກໍ່ຈະເນັ້ນເລື່ອງ ກະສິກັມ ແບບສະອາດປອດພັຍ ຈາກສານເຄມີ ແລະກະຊິເນັ້ນເວົ້າເລື່ອງຜົນກະທົບ ຕໍ່ສິ່ງແວດລ້ອມ ແລະຊີວິດຂອງປະຊາຊົນ ຢູ່ເຂດຊຸມຊົນຫັ້ນ ເພື່ອວ່າບໍ່ໃຫ້ມັນມີຜົນກະທົບ ຕໍ່ການໃສ່ຢາສານເຄມີ ຕ່າງໆຢູ່ພາຍໃນ ສວນກ້ວຍຫັ້ນ.”

ທ່ານກ່າວອີກວ່າ ທາງການເມືອງລອງ ອະນຸຍາດໃຫ້ປູກກ້ວຍຄັ້ງນີ້ ແມ່ນເນັ້ນເຣື່ອງການໃຊ້ມາດຕະຖານ ກະສິກັມທີ່ດີ ກະສິກັມ ປອດ ສານພິດ, ຄວບຄຸມການໃສ່ສານເຄມີຕ່າງໆ ເພື່ອບໍ່ໃຫ້ມີຜົນກະທົບ ຕໍ່ສິ່ງແວດລ້ອມ ແລະຊຸມຊົນ.

ຜ່ານມາ ເມືອງລອງ ເປັນເມືອງນຶ່ງ ທີ່ມີການອະນຸຍາດ ໃຫ້ນັກລົງທຶນຈີນ ເຂົ້າມາປູກກ້ວຍເປັນອັນດັບ 2 ຂອງແຂວງນີ້ ໃນເນື້ອທີ່ທັງໝົດ 6 ພັນປາຍເຮັກຕາ ຊຶ່ງການປູກໃນໄລຍະນັ້ນ ໄດ້ສົ່ງຜົນກະທົບຢ່າງໃຫຍ່ຫລວງ ຕໍ່ສິ່ງແວດລ້ອມ ແລະການດຳລົງຊີວິດ ຂອງປະຊາຊົນ ຍ້ອນ ໃຊ້ສານເຄມີຫຼາຍເກີນໄປ ໃນຂນະທີ່ສວນກ້ວຍສ່ວນຫຼາຍຢູ່ຕິດກັບສາຍ ນໍ້າທີ່ປະຊາຊົນໃຊ້ກິນໃຊ້ອາບ ດັ່ງປະຊາຊົນຜູ້ນຶ່ງເວົ້າກ່ຽວກັບຜົນ ຮ້າຍຂອງສານເຄມີ ທີ່ໃຊ້ໃນສວນກ້ວຍ ໃນຣະຍະທີ່ຜ່ານມາ ຕໍ່ວິທຍຸເອເຊັຽເສລີ ໃນວັນທີ 12 ສິງຫາ ນີ້ວ່າ:

"ເວລາທີ່ເຂົາເຮັດສວນກ້ວຍ ແມ່ນໃສ່ຢາຫລາຍສຸດ ເວລາສີດຢາ ຢາກໍ່ເຂົ້າມາຢູ່ໃນບ້ານ ຂີວແດ່ບໍ່ແມ່ນ ແຕ່ຢູ່ນີ້ແຫລະ ໝົດບ້ານເວລາມີ ຟ້າລົມ ແມ່ນເຂົ້າມາຢູ່ບ້ານໝົດແຫລະ”

ເຖິງແມ່ນວ່າ ໃນໄລຍະຜ່ານມາ ທາງການແຂວງຫລວງນໍ້າທາ ໄດ້ສັ່ງໃຫ້ຢຸດຂຍາຍເນື້ອທີ່ປູກກ້ວຍ ແຕ່ກໍຍັງມີການອະນຸຍາດໃຫ້ນັກລົງທຶນ ຈີນ ສຳປະທານເນື້ອທີ່ ປູກກ້ວຍອີກໃຫມ່ ຍ້ອນທາງການເຫັນວ່າ ມັນສ້າງຣາຍໄດ້ໃຫ້ແກ່ ປະຊາຊົນທ້ອງຖິ່ນ ແຕ່ຕ້ອງປະຕິບັດຕາມກົດ ຣະບຽບ ຂອງທາງການ ຄືທີ່ເວົ້າມາຂ້າງເທິງ.

ຄໍາເຫັນ (1)
Share

ຊາວ​ນາ

ຈາກ ​ເຂ​ດນອກ

ອະນຸຍາດ ອີກແລ້ວ. ປະຊາຊົນ ໄດ້ຮັບຄວາມເດືອດຮ້ອນ ສະພາບແວດລ້ອມ ຖືກທຳລາຍ ກະຍັງບໍ່ພໍບໍ່. ປານນັ້ນ ຄືເວົ້າວ່າ ໃຫ້ສັນຍາໝົດແລ້ວ ກໍຂະເຊົາ ແຕ່ຊໍ້າພັດໄດ້ຍິນມາວ່າ ອະນຸຍາດອີກ ເຮົາກະບໍ່ມີແນວຊິເວົ້າແລ້ວ. ພວກທ່ານເວົ້າໄດ້ຢູ່ວ່າ ຈະເຮັດກະສິກຳສະອາດ ແຕ່ໃນຕົວຈິງແລ້ວ ມີໃຜເຮັດໄດ້ແດ່. ຜູ້ປູກກະມັກງ່າຍ ຜູ້ກວດກາ ພັດຖືກຍັດເງິນກ້ອງໂຕະ. ເປີດຊອງກັບລີ້ນຊັກອອກມາ ເຮັດແຕ່ຮູບ ດົງຈິໄກສອນ ໃນໃບລະແສນ ຍິ້ມແປ່ນແວ່ນຢູ່ ເອົາແຕ່ຮູບດົງຈິໄກສອນ ເບີກທາງຢູ່ເລື້ອຍໆ. ອະນຸຍາດໃນຊ່ວງຜ່ານມາ ກະບໍ່ມີໃຜຫວງຊາໄປກວດກາ ປະຊາຊົນ ເຈັບໄຂ້ ກະບໍ່ມີໃຜ ເບິ່ງແຍງ ນ້ຳກະເປື້ອນ ລົງອາບກະບໍ່ໄດ້ ໃຊ້ກະບໍ່ໄດ້. ສັດລ້ຽງ ກະຕາຍ. ຢາກໃຫ້ ພັກລັດ ເບິ່ງຄືນໃໝ່ໃຫ້ແດ່ເດີ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Aug 22, 2019 05:21 AM

ເຕັມຫນ້າ