ແມ່ຍິງລາວໄປຢູ່ຈີນໄດ້ ກັບມາ ແລ້ວ

ຈໍາປາທອງ
2017-03-30
ອີແມວລ໌
ຄໍາເຫັນ
Share
ພິມ
ແຂວງຫລວງພຣະບາງ
ແຂວງຫລວງພຣະບາງ
Marcel

ແມ່ຍິງລາວ ອາຍຸ 20 ປີ ຈາກບ້ານນາຕານ ເມືອງແລະແຂວງ ຫລວງພຣະບາງ ທີ່ຂໍສະຫງວນຊື່ ຊຶ່ງຖືກຄົນຈີນ ຊັກຊວນ ໄປເຮັດວຽກ ຢູ່ແຂວງຢຸນນານ ປະເທດຈີນ ໄດ້ 6 ເດືອນ ແລະ ເມື່ອຢາກກັບບ້ານ ກໍບໍ່ພາກັບມານັ້ນ, ໄດ້ຖືກສົ່ງກັບ ຄືນບ້ານຢູ່ລາວແລ້ວ ເດີນທາງມາ ນຳ ຣົດເມໂດຍສານ ໃນຕອນແລງ ຂອງ ວັນທີ 29 ມິນາ 2017, ໂດຍການຊ່ວຍເຫລືອ ຂອງເຈົ້າໜ້າທີ່ ແຂວງຫຼວງພຣະບາງ ແລະ ກົງສຸນລາວ ທີ່ເມືອງຄຸນມິງ ແຂວງຢຸນນານ ແລະ ເຈົ້າໜ້າທີ່ ຕຳຣວດຈີນ. ຕາມຄຳເວົ້າຂອງຜູ້ເປັນພໍ່ ຂອງນາງຕໍ່ RFA ໃນມື້ວັນທີ 29 ມິນາ ນີ້ວ່າ:

"ລາວກັບບ້ານແລ້ວເດ໊ ດຽວນີ້ມາຮອດນໍ້າທາເບາະ ເພິ່ນຕົງກັບມາຮອດຕອນແລງນີ້ ມາແຕ່ວັນທີ 20 ພຸ້ນນະ ໂອ້ທາງຄອບຄົວ ກະຮູ້ສຶກ ດີໃຈ ຫລາຍຜູ້ກ່ຽວວ່າ ຢາກມາຮຽນ ໜັງສືຕໍ່ ຊັ້ນຮຽນພາສາ ໄດ້ເລັກໆນ້ອຍໆ ແລ້ວສິໄປຊອກເຮັດ ວຽກວ່າຊັ້ນ".

ພໍ່ນາງເວົ້າວ່າ ຫລັງຈາກລູກສາວ ກັບຄືນມາບ້ານ ແບບປອດພັຍແລ້ວ ທາງຄອບຄົວ ຈະເຂັ້ມງວດຫລາຍຂຶ້ນ ໃນເຣຶ່ອງການ ໄປຊອກຫາ ເຮັດວຽກຢູ່ຕ່າງປະເທດ ຍ້ອນມີບົດຮຽນແລ້ວ. ໃນຖານະເປັນພໍ່ ຢາກໃຫ້ລູກສາວ ເຮັດວຽກຢູ່ພາຍໃນປະເທດ, ຖ້າຈະໄປ ຕ່າງປະເທດ ກໍ ຈະໃຫ້ໄປຜ່ານ ບໍຣິສັດຈັດຫາງານ ທີ່ຖືກຕ້ອງຕາມກົດໝາຍ ເທົ່ານັ້ນເພື່ອຄວາມປອດພັຍ. ພ້ອມກັນນັ້ນ ກໍຂໍຂອບໃຈເຈົ້າໜ້າທີ່ ແຂວງ ຫຼວງພຣະບາງ ແລະກົງສຸນລາວ ທີ່ເມືອງຄຸນມິງ ແລະເຈົ້າໜ້າທີ່ ຕຳຣວດຈີນ ທີ່ໄດ້ຊ່ວຍເຫລືອ ລູກສາວຂອງຕົນ ກັບຄືນບ້ານ.

ແມ່ຍິງລາວ ທີ່ຖືກຊາວຈີນຊັກຊວນ ໄປເຮັດວຽກຢູ່ຈີນ ຜູ້ນີ້ ໄດ້ເຮັດວຽກເປັນ ເວລາ 6 ເດືອນ, ຍ້ອນນາງເຈັບປ່ວຍ ຈຶ່ງຢາກກັບຄືນບ້ານ, ແຕ່ຊາວຈີນ ທີ່ພາໄປນັ້ນ ບໍ່ພາກັບ ຕ້ອງລໍຖ້າໄປອີກ 2 ປີ ກ່ອນຈຶ່ງຈະພາກັບ ແລະເວົ້າວ່າ ຖ້າຢາກກັບບ້ານ ກໍກັບເມືອເອງ ແຕ່ໂຊກດີ ທີ່ນາງ ມີໂອກາດໃຊ້ ໂທຣະສັບມີຖື ຕິດຕໍ່ມາຫາຄອບຄົວ ທາງບ້ານ ໃຫ້ຊ່ວຍເຫລືອ. ຈາກນັ້ນ ຜູ້ເປັນເອື້ອຍ ຈຶ່ງໄປຂໍຄວາມ ຊ່ວຍເຫລືອ ຈາກ ເຈົ້າໜ້າທີ່ ແຂວງຫຼວງພຣະບາງ ເພື່ອຫາທາງຊ່ວຍເຫລືອ ໃຫ້ນາງໄດ້ກັບຄືນບ້ານ. ແຕ່ຍັງບໍ່ຮູ້ວ່າ ເວລາທີ່ນາງ ເຮັດວຽກຢູ່ຈີນນັ້ນ ຕົກຢູ່ໃນສະພາບ ແນວໃດກັນແທ້.

ຄໍາເຫັນ (1)
Share

ຄ.ນະຄຳມວ່ນ

ຈາກ ທ່າແຂກ

ດິແລ້ວໄດ້ກັບມາແລະບໍຕົກເປັນເຫຍື່ອແຮ້ງເຫຍື່ອກາ, ຫມາຍຄວາມວ່າບຸນພໍ່ແມ່ຄຸ່ມຄອງຮັກສາ, ຕໍ່ໄປໃຫ້ຕັ້ງສະຕິດີໆວ່າ: ພວກທີ່ສລາດລັກແຫລມນັ້ນແມ່ນຫາກິນໄກ້, ພວກທີ່ໄບ້ແມ່ນ ຫາກິນໄກ ສະນັ້ນຈົ່ງຮູ້ຈັກຄວາມພໍດີພໍພຽງ ຈົ່ງຢ່າໄດ້ທະເຍີທະ ຍານແລ່ນນຳຄວາມຢາກ ຈະແລ່ນສຸດຂອບຟ້າກໍ່ມີທາງຈະທັນຄວາມຢາກດອກ ພີ່ນ້ອງເອີຍ!


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Apr 03, 2017 01:37 PM

ເຕັມຫນ້າ