ສາເຫດເຂື່ອນແກ້ງຄວັນແຕກ ຍັງບໍ່ ສລຸບ

ຈໍາປາທອງ
2019-08-16
ອີແມວລ໌
ຄໍາເຫັນ
Share
ພິມ
ທາງການອອກກວດກາ ຄວາມເສັຽຫາຍໃນເຂດນໍ້າຖ້ວມ ແລະ ສະພາບຂອງເຂື່ອນໄຟຟ້າແກ້ງຄວັນ
ທາງການອອກກວດກາ ຄວາມເສັຽຫາຍໃນເຂດນໍ້າຖ້ວມ ແລະ ສະພາບຂອງເຂື່ອນໄຟຟ້າແກ້ງຄວັນ
ຮູບພາບຖ່າຍຖອນ ຈາກ : ໂທຣະທັສ ແຂວງຊຽງຂວາງ

ມາເຖິງປັດຈຸບັນ ທາງການລາວ ກໍຍັງບໍ່ທັນໄດ້ສະຫລຸບ ສາເຫດເຂື່ອນໄຟຟ້າແກ້ງຄວັນແຕກ ໃນເວລາ 10 ໂມງເຊົ້າ ຂອງມື້ວັນທີ 4 ສິງຫາ ທີ່ເຮັດໃຫ້ປະຊາຊົນ ໄດ້ຮັບຄວາມເສັຽຫາຍເກືອບ 100 ລ້ານກີບ ນັ້ນວ່າ ມີສາເຫດມາຈາກຫຍັງກັນແທ້ ມາຈາກພັຍທຳມະຊາດ ຝົນຕົກໜັກ ຫລືວ່າເປັນຍ້ອນການກໍ່ສ້າງເຂື່ອນບໍ່ໄດ້ມາດຕະຖານ.

ກ່ຽວກັບເຣຶ່ອງທີ່ວ່ານີ້ ເຈົ້າໜ້າທີ່ຜແນກພລັງງານ ແລະບໍ່ແຮ່ ແຂວງຊຽງຂວາງ ກ່າວຕໍ່ວິທຍຸເອເຊັຽເສຣີໃນມື້ວັນທີ 16 ສິງຫານີ້ວ່າ ເຂື່ອນ ແຫ່ງນີ້ມີຄັນຄູກັ້ນນ້ຳສູງ 60 ຊັງຕີແມັດ:

"ເຂົາໄປເຮັດຕັນຢູ່ນ້ຳສູງຢູ່ 60 ເຊັນ ແລ້ວກໍອ່ວຍນ້ຳໃສ່ຄອງເໝືອງ ມາບາດນີ້ນ້ຳຈະໄຫລໃສ່ຄອງເໝືອງຫັ້ນ ລາວຈະໄປຕັນຢູ່ລຸ່ມບ່ອນນ້ຳ ທີ່ອອກຈາກຄອງເໝືອງ ທາງລຸ່ມລະໄປຕັນໃຫ້ຍື່ງຂຶ້ນແລ້ວລະມາ ຕັດເອົາປາຍທາງນີ້ ປ່ອຍໃສ່ຈັກຫັ້ນໜາ ບາດນີ້ນ້ຳມັນມາຫຼາຍ ບາດນີ້ ເຈົ້າໄປຕັນທາງລຸ່ມ ມັນບໍ່ມີທາງໄປມັນກໍເລີຍມາຖ້ວມ."

ທ່ານເວົ້າວ່າ ການສ້າງຄັນຄູດິນຕັນທາງນ້ຳນັ້ນ ບໍ່ໄດ້ຢູ່ໃນແຜນການອອກແບບເຂື່ອນ ແລະ ທາງບໍຣິສັດກໍບໍ່ໄດ້ແຈ້ງໃຫ້ ຜແນກພລັງງານ ແລະບໍ່ແຮ່ ແຂວງຊຽງຂວາງ ຊາບ ແລະຄາດວ່າທາງບໍຣິສັດ ຕັນທາງນ້ຳ ເພາະບໍ່ຢາກໃຫ້ນ້ຳໄຫລ ລົງຄອງເໝືອງ, ບໍ່ຢາກໃຫ້ກະທົບຕໍ່ ການຜລິດໄຟຟ້າ. ແຕ່ເມື່ອເກີດຝົນຕົກໜັກຕິດຕໍ່ ກັນຫລາຍມື້ ກໍເຮັດໃຫ້ນ້ຳ ທີ່ຖືກຕັນໄວ້ນັ້ນ ໄຫລລົງຄອງເໝືອງ ທີ່ເຮັດດ້ວຍດິນ.

ເຂື່ອນແຫ່ງນີ້ມີປະຕູນ້ຳ 3 ປ່ອງ ເພື່ອປັ່ນຈັກໄຟຟ້າ ແຕ່ບໍ່ມີປະຕູຣະບາຍ ນ້ຳອອກ ເວລານ້ຳອັ່ງຫລາຍເກີນ ຄວາມຕ້ອງການ.

ພາຍຫຼັງເຂື່ອນແຕກ ແລະນ້ຳລົດລົງແລ້ວ ທາງຜແນກພລັງງານແລະບໍ່ແຮ່ ແຂວງຊຽງຂວາງ ໃນຖານະເປັນຜູ້ອະນຸມັດ ແລະ ຮັບຜິດຊອບ ໂຄງການເຂື່ອນໄຟຟ້າ ຂນາດນ້ອຍ ກໍສັ່ງໃຫ້ບໍຣິສັດ ສົມພູກໍ່ສ້າງ ຂົວທາງ ທີ່ເປັນເຈົ້າຂອງເຂື່ອນໄຟຟ້າ ແກ້ງຄວັນ ອອກແບບເຂື່ອນ ແລະສ້າງຄືນໃໝ່ ຕາມມາດຕະຖານທຸກຢ່າງ ເພື່ອປ້ອງກັນບໍ່ໃຫ້ເຂື່ອນແຕກ ຕື່ມອີກ ດັ່ງທີ່ທ່ານກ່າວວ່າ:

"ແຕ່ວ່າດຽວນີ້ ໄທເຮົາຕ້ອງໄດ້ໃຫ້ລາວ ອອກແບບຄືນໃໝ່ໝົດ ຈຶ່ງຄ່ອຍໃຫ້ສ້າງຄືນ ແປງຄອງເໝືອງປ່ອຍນ້ຳເຂົ້າຄືເກົ່າ ເພື່ອຮັບປະກັນບໍ່ໃຫ້ ມີບັນຫາຕໍ່ໜ້າຫັ້ນໜາ."

ສ່ວນເຣຶ່ອງການຊົດເຊີຍ ຄວາມເສັຍຫາຍ ຍ້ອນເຂື່ອນແຕກນັ້ນ ເຈົ້າໜ້າທີ່ຜແນກພລັງງານ ແລະບໍ່ແຮ່ ແຂວງ ທ່ານນີ້ເວົ້າວ່າ ປັດຈຸບັນ ຍັງບໍ່ມີແຜນຊົດເຊີຍ ໃຫ້ປະຊາຊົນທີ່ໄດ້ຮັບ ຄວາມເສັຽຫາຍເທື່ອ ແລະ ຍັງບໍ່ຢືນຢັນວ່າ ຈະໄດ້ຮັບຄ່າຊົດເຊີຍ ແຕ່ອາດຈະໄດ້ຮັບການ ຊ່ອຍເຫຼືອ ຈາກທາງການແຂວງ ໃນເຣຶ່ອງພັນພືດ ເພື່ອປູກແທນເຂົ້າ ທີ່ໄດ້ເສັຍຫາຍໄປ.

ປະຊາຊົນບ້ານລາດບວກ ເມືອງແປກ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນັ້ນວ່າ ນ້ຳຖ້ວມ ເຮັດໃຫ້ປະຊາຊົນ 3 ບ້ານ ຄືບ້ານລາດບວກ, ບ້ານຄຸຊົງ ແລະບ້ານເປິບ ທີ່ຕັ້ງຢູ່ເໜືອເຂື່ອນ ແລະໃຕ້ເຂື່ອນ ທັງໝົດ 26 ຄອບຄົວ ແລະເນື້ອທີ່ນາ 12 ເຮັກຕາ ໄດ້ຮັບຜົກະທົບລວມມູນ ຄ່າເສັຽຫາຍເກືອບ 100 ລ້ານກີບ. ແຕ່ຍັງບໍ່ທັນໄດ້ຮັບຄຳຕອບ ຈາກເຈົ້າຂອງເຂື່ອນ ເທື່ອວ່າ ຈະຊົດເຊີຍໃຫ້ແນວໃດ; ດັ່ງທ່ານກ່າວວ່າ:

"ຍັງບໍ່ທັນຕອບແນວໃດນໍ ວ່າເພິ່ນສິຊົດເຊີຍແນວໃດ ຍັງບໍ່ຮູ້ ຍັງລໍຖ້າຄຳຕອບ ລວມໝົດແລ້ວຖືກຢູ່  99 ລ້ານ ແໜ່ ທັງໜ້າເຂື່ອນ ແລະ ລຸ່ມເຂື່ອນນໍ ເນື້ອທີ່ນາ ທີ່ວ່າບໍ່ສາມາດຟື້ນຟູໄດ້ຫັ້ນກໍ 11-12 ເຮັກຕາ ຫລືວ່າທາງເຈົ້າຂອງ ບໍຣິສັດເພິ່ນສິໃຊ້ແທນ ແນວໃດ ຍັງບໍ່ທັນຮູ້ ໂຕນີ້ນໍ ຍັງລໍຄຳຕອບຢູ່ ນໍປະຊາຊົນກໍດາຍ."

ມາເຖິງປັດຈຸບັນ ທາງການແຂວງຊຽງຂວາງ ແລະບໍຣິສັດເຈົ້າຂອງເຂື່ອນ ຍັງມິດງຽບກ່ຽວກັບ ເຣຶ່ອງສາເຫດເຂື່ອນແຕກ ແລະ ເຣຶ່ອງການ ຊົດເຊີຍຄວາມເສັຽຫາຍ ນັ້ນຢູ່.

ຄໍາເຫັນ (0)
Share
ເຕັມຫນ້າ