ເຂື່ອນ​ໃນ​ແມ່​ນ້ຳ​ຂອງ ເຣີ້ມ​ສ້າງ​ຜົ​ລ​ກະ​ທົບໃຫ້​ຊາວ​ບ້ານ

ພູວົງສ໌
2019-11-01
ອີແມວລ໌
ຄໍາເຫັນ
Share
ພິມ
ເດັກ​ນ້ອຍ​ລ​າວ​ໃນ​ເຂ​ດ​ພາກ​ໃຕ້ ພວມ​ຫວ່ານ​ແຫ​ຫາ​ປາ​ໃນ​ຍາມ​ແລງ ອັນ​ເປັນ​ວິ​ຖີ​ຊີ​ວິ​ຕ​ປົກ​ກະ​ຕິ​ຂອງ​ເຂົາ​ເຈົ້າ​ຕາມ​ລຳ​ນ້ຳ​ໃນ​ເຂດ​ບ້ານ​ຂອງ​ພວກ​ເຂົາ
ເດັກ​ນ້ອຍ​ລ​າວ​ໃນ​ເຂ​ດ​ພາກ​ໃຕ້ ພວມ​ຫວ່ານ​ແຫ​ຫາ​ປາ​ໃນ​ຍາມ​ແລງ ອັນ​ເປັນ​ວິ​ຖີ​ຊີ​ວິ​ຕ​ປົກ​ກະ​ຕິ​ຂອງ​ເຂົາ​ເຈົ້າ​ຕາມ​ລຳ​ນ້ຳ​ໃນ​ເຂດ​ບ້ານ​ຂອງ​ພວກ​ເຂົາ
RFA/Korean CSO group

ນັບ​ແຕ່​ໂຄງ​ການ​ກໍ່ສ້າງເຂື່ອນ​ໄຟ​ຟ້າໄຊ​ຍະ​ບູ​ຣີ ທີ່​ສ້າງ​ໃສ່​ແມ່​ນ້ຳ​ຂອງ ໃນ​ແຂວງ​ໄຊ​ຍະ​ບູ​ຣີ ເຣີ້ມ​ມີ​ການ​ຕັນ​ນ້ຳເປັນ​ຕົ້ນ​ມາ, ການ​ຂຶ້ນ​ລົງ​ຂອງ​ນ້ຳ ກໍ​ຜິດ​ປົກ​ກະ​ຕິ​ໄປ​ຈາກ​ທຳ​ມະ​ຊາດ ແລະ ວິ​ຖີ​ຊິ​ວິ​ຕ​ຂອງ​ປະ​ຊາ​ຊົນ​ລຸ່ມ​ແມ່​ນ້ຳ​ຂອງ​ຢູ່​ເຂດ​ທ້າຍ​ເຂື່ອນ​ໄຊ​ຍະ​ບູ​ຣີ ກໍ​ເຣີ້ມ​ຄ່ອຍໆ​ໄດ້​ຮັບ​ຜົ​ລ​ກະ​ທົບ, ອີງ​ຕາມ​ຄວາມ​ເວົ້າ​ຂອງ​ຊາວ​ບ້ານ​ໃນແຂວງ​ເລີຍ ປະ​ເທດ​ໄທ.

ຫຼ້າ​ສຸດນີ້, ເຂື່ອນ​ໄຊ​ຍະ​ບູ​ຣີ ກໍ​ໄດ້​ທຳ​ການ​ປັ່ນ​ໄຟ​ຟ້າ​ຂາຍ​ຢ່າງ​ເປັນ​ທາງ​ການ ໃນ​ມື້​ວັນ​ທີ 29 ຕຸ​ລາ, ແຕ່​ສິ່ງ​ທີ່​ເກີດ​ຂຶ້ນ​ຕໍ່​ຊາວ​ບ້ານໃນ​ເຂ​ດ​ທ້າຍ​ເຂື່ອນ ນັບ​ທັງ​ລາວ, ໄທ, ກັມ​ພູ​ຊາ ແລະ ຫວຽດ​ນາມ ແລ້ວ​ແມ່ນ​ວ່າ ຊາວ​ບ້ານ​ໄດ້​ພົບ​ພໍ້​ກັບ​ສະ​ພາບ​ນ້ຳ​ຂຶ້ນ​ລົງ​ຢ່າງ​ຜິດ​ປົກ​ກະ​ຕິ ແລະ ສົ່ງ​ຜົ​ລ​ກະ​ທົບ​ໂດຍ​ຕ​ຣົງ​ຕໍ່​ການ​ກະ​ເສ​ຕ​ຕາມ​ແຄມ​ຂອງ.

​ດັ່ງ​ຊາວ​ບ້ານ​ໃນ​ແຂວງ​ເລີຍ ໄດ້​ກ່າວ​ຕໍ່​ຜູ້​ສື່​ຂ່າວ​ວິ​ທ​ຍຸ​ເອ​ເຊັຽ​ເສ​ຣີ ໃນ​ວັນ​ທີ 29 ຕຸ​ລາ ຜ່ານ​ມາ​ວ່າ:

ສຽງ1: “ມັນ​ລຳ​ບາກ​ບ່ອນ​ທີ່​ວ່າ​ເຮົາ​ປູກ​ຜັກ​ປູກ​ຂອງ​ນຳ​ຕາ​ຝັ່ງ​ນ້ຳ​ນີ້​ແຫຼະ. ຜົ​ລ​ກະ​ທົບ​ບາງ​ເທື່ອ​ມັນ​ກໍ​ຂຶ້ນ​ມາ​ຖ້ວມ ບາງ​ເທື່ອ​ມັນ​ກໍ​ແຫ້ງ ນ້ຳ​ບໍ່​ມີ​ຫົດ, ແບບນີ້​ມັນ​ເຂີນ​ໄກ. ມັນ​ຂຶ້ນບໍ່​ຕາມ​ປົກ​ກະ​ຕິ ມື້​ສອງມື້​ມັນ​ກໍ​ແຫ້ງ ມື້​ສອງມື້​ມັນ​ກໍ​ຂຶ້ນ​, ຊີ້​ແມ້. ມັນ​ບໍ່​ເປັນ​ນ້ຳ​ທຳ​ມະ​ຊາດ​ຄື​ແຕ່​ເກົ່າ. ນ້ຳ​ທຳ​ມະ​ຊາດ​ຄື​ແຕ່​ເກົ່າ, ປົກ​ກະ​ຕິ​ເດືອນ​ຕຸ​ລາ ເດືອນ​ພຶ​ສ​ຈິ​ກາ ມັນ​ກະ ​ນ້ຳ​ມັນ​ຈະ​ຂຶ້ນຢູ່​ເທິງຕາ​ຝັ່ງ​ພຸ້ນ​ແຫຼະ. ອາ​ຈ​ເປັນ​ສົ່ງ​ຜົ​ລ​ກະ​ທົບ​ຈາກ​ເຂື່ອນ ນ້ຳ​ມັນ​ບໍ່​ມາຈັ່ງ​ຊີ້​ໂອ້, ນ້ຳ​ມັນ​ບໍ່​ມາ​ຕາມ​ທຳ​ມະ​ຊາດ.”

ອີກ​ຜົ​ລ​ກະ​ທົບ​ຢ່າງ​ນຶ່ງ​ຈາກ​ເຂື່ອນ​ໄຊ​ຍະ​ບູ​ຣີ ທີ່​ສົ່ງ​ຜົ​ລ​ກະ​ທົບ​ຕໍ່​ຊາວ​ບ້ານ​ໃນ​ເຂດ​ລຸ່ມ​ແມ່​ນ້ຳ​ຂອງ​ທ້າຍ​ເຂື່ອນຢ່າງ​ແນ່ນອນ​ແລ້ວ ກໍ​ແມ່ນ​ວິ​ຖີ​ຊີ​ວິ​ຕ​ຂອງ​ຄົນ​ຫາ​ປາ.

ຊາວ​ບ້ານ​ທີ່​ຍຶດ​ອາ​ຊີ​ພ​ຫາ​ປາຕາມ​ແຄມ​ຂອງ, ເມືອງ​ປາກ​ຊົມ ແຂວງ​ເລີຍ, ​ປະ​ເທດ​ໄທ ນາງ​ນຶ່ງ ກໍໄດ້​ໃຫ້​ສັມ​ພາດ​ແກ່ຜູ້​ສື່​ຂ່າວ​ວິ​ທ​ຍຸ​ເອ​ເຊັຽ​ເສ​ຣີ ໃນ​ມື້​ດຽວ​ກັນ​ວ່າ ຜົ​ລ​ກະ​ທົບ​ທີ່​ເກີດ​ຂຶ້​ນ​ກັບ​ພວກ​ເຂົາ​ເຈົ້າໃນ​ປະ​ຈຸ​ບັນ​ນີ້, ກໍ​ແມ່ນ​ການ​ຫາ​ປາ​ໄດ້​ໜ້ອຍ​ລົງ ແລະ ເກີດ​ດິນ​ເຈື່ອນ​ເລື້ອຍໆ.

ສຽງ2: “ຫາ​ປາ​ບາງມື້​ກະບໍ່​ໄດ້ ບາງມື້​ກະ​​ໄດ້ ນະ​ປະ​ຈຸ​ບັນ​ນີ້​ນ່າ. ບາດນີ້ ການ​ຜົ​ລ​ກະ​ທົບ​ກະ​ຄືຫາ​ປາບໍ່​ໄດ້​ຄື​ເກົ່າ. ອາ​ຊີ​ພ​ປະ​ຈຳ​ວັນ​ເຮົາ​ຄື​ເຮັດ​ຫ​ຍັງ​ແນ່? ເຮົາບໍ່​ຫາ​ກະ​ບໍ່​ໄດ້ ເພາະ​ວ່າ​ມັນ​ເຄີຍ​ຫາ​ຢູ່​ແລ້ວ. ລະ​ກະ​ຕົ້ນ​ທຶນ​ກະ​ສູງ, ນ້ຳ​ກະ​ຂຶ້ນໆ​ລົງໆ. ການ​ຜົ​ລ​ກະ​ທົບ​ກະ 1, ດິນ​ເຈື່ອນ ເວ​ລາ​ລວງ​ມອງ​ເຮົາ​ຜູກ ລວງມອງ​ຕອນ​ຝົນ​ຕົກ. ນ້ຳ​ບົກ​ໄວ ດິນ​ກໍ​ເຈື່ອນ​ລົງ​ມາ ມອງ​ເຮົາ​ກະຫຼຸດ​ໄປ​ນຳ​ດິນ​ເຈື່ອນ.”

​ຊາວ​ບ້ານ​ທີ່​ຫາ​ປາ​ມາ​ໄດ້ ຮູ້​ສຶກ​ດີ​ໃຈ ເລີຍ​ແຍງ​ໃຫ້​ນັກ​ວິ​ຊາ​ການ​ເກົາຫຼີ​ໃຕ້ເບິ່ງ ເພື່ອ​ຖ່າ​ຍຮູບ
​ຊາວ​ບ້ານ​ທີ່​ຫາ​ປາ​ມາ​ໄດ້ ຮູ້​ສຶກ​ດີ​ໃຈ ເລີຍ​ແຍງ​ໃຫ້​ນັກ​ວິ​ຊາ​ການ​ເກົາຫຼີ​ໃຕ້ເບິ່ງ ເພື່ອ​ຖ່າ​ຍຮູບ Photo: RFA

ໃນ​ຂ​ນະ​ດຽວ​ກັນ, ກ່ອນ​ໜ້າ​ນີ້ ນັກ​ວິ​ຊາ​ການ​ຕ່າງ​ປະ​ເທດຫຼາຍ​ຂ​ແນງ​ການ ກໍ​ໄດ້​ສະ​ແດງ​ຄວາມ​ເປັນ​ຫ່ວງ​ເລື້ອຍໆ​ມາ ກ່ຽວ​ກັບ​ຄວາມບໍ່​ລົດ​ລະ​​ຂອງ​ຣັ​ຖ​ບານ​ລາວ ຮ່ວມ​ກັບ​ນາຍ​ທຶນເຂດພາກ​ພື້ນ ໃນ​ການ​ສ້າງ​ເຂື່ອນ​ໃສ່​ແມ່​ນ້ຳ​ຂອງ ທີ່​ພອຍ​ແຕ່​ຈະ​ສົ່ງ​ຜົ​ລ​ກະ​ທົບຫຼາຍ​ດ້ານ​ຕໍ່​ວິ​ຖີ​ຊິ​ວິ​ຕ ແລະ ຣະ​ບົບ​ນິ​ເວດ​ໃນ​ແມ່​ນ້ຳ​ຂອງ ຫຼາຍກວ່າ​ທີ່​ຈະ​ໄດ້​ຮັບ​ຜົ​ລ​ປ​ໂຍດ.

ທ່ານ ມົນ​ຕ​ຣີ ຈັນ​ທະ​ວົງ​ສ໌, ນັກ​ວິ​ຊາ​ການ​ໄທ ກໍ​ໄດ້​ໃຫ້​ສັມ​ພາດ​ແກ່​ຜູ້​ສື່​ຂ່າວ​ພວກ​ເຮົາ ເມື່ອ​ເດືອນ ມິ​ຖຸ​ນາ ທີ່​ຜ່ານ​ມາ​ວ່າ ຜົ​ລ​ກະ​ທົບ​ທີ່​ປະ​ຈັກ​ຕາ​ທີ່​ສຸດ​ໃນ​ການ​ເດີນ​ໜ້າ​ສ້າງ​ເຂື່ອນ​ອີກຫຼາຍ​ແຫ່ງ​ໃນ​ແມ່​ນ້ຳ​ຂອງນັ້ນ, ກໍ​ແມ່ນ​ຄວາມ​ສ່ຽງ​ທີ່​ຈະ​ສູນ​ເສັຽ​ພັນ​ປາ​ໃນ​ແມ່​ນ້ຳ​ຂອງ ເພາະ​ວົງ​ຈອນ​ຊີ​ວິ​ຕ​ຂອງ​ປາ​ຈະ​ຖື​ກ​ທຳ​ຣາຍ.

ສຽງ3: “ຖ້າ​ຫາກວ່າ​ມີ​ເຂື່ອນ​ແບບນີ້​ຊ້ອນ​ກັນ​ໄປ​ເລື້ອຍໆ​ນີ້ ຈະ​ອອກ​ແບບ​ທາງ​ປາ​ຜ່ານ​ໃຫ້​ດີ​ສ່ຳ​ໃດ​ກໍ​ຕາມ, ​ປາ​ກໍ​ຈະ​ໄປ​ບໍ່​ໄດ້. ສະ​ນັ້ນ, ຄວາມ​ເສັຽ​ຫາຍ​ທີ່​ເກີດ​ຂຶ້ນນີ້, ອັນ​ທຳ​ອິດ ກໍ​ແມ່ນ​ພັນ​ປາ​ຈະ​ຫາຍ​ໄປ​ທັນ​ທີ ປາ​ຈະ​ຂຶ້ນ​ລົງ​ບໍ່​ໄດ້ ແລ້ວ​ອ່າງ​ເກັບ​ນ້ຳ​ກໍ​ຈະ​ທຳ​ຣາຍ​ພື້ນ​ທີ່​ປະ​ສົມ​ພັ​ນ, ວາງ​ໄຂ່ ແລະ ເປັນ​ພື້ນ​ທີ່​ອະ​ນຸ​ບານ​ໂຕ​ອ່ອນ​ຂອງ​ປາ​ໂຕ​ນ້ອຍໆໃນ​ຣະ​ດູ​ຝົນ. ມັນ​ຈະ​ມີ​ປາ​ອີກ​ຊະ​ນິດ​ນຶ່ງ​ທີ່​ເຕີບ​ໃຫ​ຍ່​ໄດ້​ໃນ​​ນ້ຳ​ນິ້ງ​ໃນແບບ​ເຂື່ອນ, ແຕ່​ປາ​ທີ່​ຈະ​ອົ​ພ​ຍົບ​ຂຶ້ນ​ລົງ​ນີ້ ປາ​ພວກນີ້​ຈະ​ສູນ​ພັນ​ໄປ.”

ນອກ​ຈາກນີ້, ດ​ຣ. ອ່ຽນ ແບ​ຣ໌, ສາ​ສ​ດາ​ຈານ ປະ​ຈຳ​ມ​ຫາ​ວິ​ທ​ຍາ​ລັຍ​ວິ​ສ​ຄອນ​ຊິ້ນ ເມ​ດີ​ສັນ ແລະ ເປັນ​ຊ່ຽວ​ຊານ​ດ້ານ​ການ​ສ້າງ​ເຂື່ອນ ກໍ​ໄດ້​ໃຫ້​ສຳ​ພາດ​ແກ່​ຜູ້​ສື່​ຂ່າວ​ພວກ​ເຮົາ ເມື່ອ​ເດືອ​ນ​ມິ​ຖຸ​ນາ ຜ່ານ​ມາ​ວ່າ ຜົ​ລ​ກະ​ທົບ​ທີ່​ເກີດ​ຂຶ້ນ​ຈາກ​ການ​ສ້າງ​ເຂື່ອນ​ໃສ່​ແມ່​ນ້ຳ​ຂອງ​ອີກ​ຢ່າງ​ນຶ່ງ ກໍ​ແມ່ນ​ຄວາມ​ເສັຽຫາຍ​ຂອງຕາ​ຝັ່ງ​ແມ່​ນ້ຳ​ຂອງ​ຖືກ​ເຊາະເຈື່ອນ​ ຈາກ​ການ​ປ່ອຍ​ນ້ຳ​ຈາກ​ເຂື່ອນ ເຮັດ​ໃຫ້​ການ​ກະ​ເສ​ຕ​ ແລະ ວິ​ຖີ​ຊິ​ວິ​ຕ​ຕາມ​ແຄມ​ຂອງ ຄ່ອຍໆ​ຖືກ​ທຳ​ຣາຍ.

ສຽງ4: “​ຍົກ​ໂຕ​ຢ່າງນີ້​ນ່າ ເຂື່ອນ​ໄຊ​ຍະ​ບູ​ຣີນີ້​ເນາະ ເວ​ລາ​ເຂົາ​ເຈົ້າ​ປ່ອຍ​ນ້ຳ​ອອກ​ມາ​ຈາກ​ເຂື່ອນນີ້​ເນາະ, ນ້ຳ​ມັນ​ຊິ​ໃສ. ແລ້ວ​ເວ​ລາ​ນ້ຳ​ມັນ​ໃສ ມັນ​ຊິ​ເຮັດ​ໃຫ້​ຕາ​ຝັ່ງ​ເຈື່ອນ ເພາະ​ວ່າ​ມັນ​ຊິ​ເກັບ​ດິນ​ຕົມ​ຈາກ​ຕາ​ຝັ່ງ ເພາະ​ວ່າ​ມັນ​ບໍ່​ມີ​ຫ​ຍັງ​ຢູ່​ໃນ​ນ້ຳນີ້​ນ່າ, ແລ້ວ​ມັນ​ຊິ​ເຮັດ​ໃຫ້​ເຊາະ​ເຈື່ອນນີ້​ນ່າ. ຄື​ດຽວນີ້​ເຫັນ​ຢູ່​ວຽງ​ຈັນ ຫຼື​ວ່າຫຼາຍ​ບ່ອນ​ມີ​ບັນ​ຫາ​ເຊາະ​ເຈື່ອນນີ້​ນ່າ, ໂຕນີ້​ມັນ​ກໍ​ຕ້ອງ​ກ່ຽວ​ຂ້ອງ​ກັບ​ເຂື່ອນ​ຄື​ກັນ. ລະ​ກະ​ດຽວນີ້​ຣັ​ຖ​ບານ​ລາວ​ລົງ​ທຶນບໍ່​ແມ່ນ​ໜ້ອຍ ໃນ​ການ​ທີ່​ຊິສ້າງ​ກັນ​ເຈື່ອນນີ້​ນ່າ. ອັນ​ນີ້​ຖື​ວ່າ​ມັນ​ເປັນ​ຜົ​ລ​ກະ​ທົບ ທີ່​ເກີດ​ມາ​ຈາກ​ເຂື່ອນ, ແຕ່​ເຂົາ​ເຈົ້າ​ບໍ່​ເວົ້າ ຫຼື​ບາງ​ທີ​ເຂົາ​ເຈົ້າ​ບໍ່​ເຂົ້າ​ໃຈ ກໍ​ບໍ່​ຮູ້ນ່າ. ແຕ່​ວ່າ​ແທ້​ຈິງນີ້, ບັນ​ຫາ​ໂຕນີ້ ມັນ​ເປັນ​ບັນ​ຫາ​ທີ່​ມາ​ຈາກ​ເຂື່ອນ​ຢູ່​ແລ້ວ. ອັນ​ນີ້​ເຫັນ​ໃນຫຼາຍໆ​ປະ​ເທດ​ຜ່ານ​ມານີ້​ນ່າ, ເຂົາ​ເຈົ້າ​ເຄີຍ​ມີ​ບັນ​ຫາ​ແບບນີ້ ເຂົາ​ເຈົ້າ​ເອີ້ນ​ວ່າ​ນ້ຳ​ມັນ​ຫິວ ໝາຍ​ຄວາມ​ວ່າ​ນ້ຳ​ມັນ​ບໍ່​ມີ​ດິນ​ຕົມ ນ້ຳ​ມັນ​ບໍ່​ມີ​ຫ​ຍັງ​ຢູ່​ໃນ​ນ້ຳ​ນີ້​ນ່າ. ແລ້ວ​ມັນ​ຊິ​ຊອກ​ຫາ​ເອົາ​ດິນ​ຊາຍ ຫຼື​ວ່າ​ດິນ​ຢູ່​ທາງ​ຂ້າງນີ້​ນ່າ ລັກ​ສະ​ນະ​ວ່າ​ມັນ​ຢາກ​ກິນ ແລ້ວ​ມັນ​ຊິ​ເຮັດ​ໃຫ້​ເຈື່ອນ​ລົງ​ນີ້​ນ່າ.”

ທ່ານ ບ​ຣຸ​ສ ຊູ໋​ເມັກ​ເກີ (Bruce Shoemaker), ນັກ​ວິ​ຊາ​ການ​ອິ​ສ​ຣະ ດ້ານ​ການ​ສ້າງ​ເຂື່ອນ, ກໍ​ໄດ້​ໃຫ້​ສຳ​ພາດ​ແກ່​ຜູ້​ສື່​ຂ່າວ​ວິ​ທ​ຍຸ​ເອ​ເຊັ​ຽ​ຣີ ເມື່ອ​ວັນ​ທີ 16 ຕຸ​ລາ ກ່ຽວ​ກັບ​ການ​ສ້າງ​ເຂື່ອນ​ໃສ່​ແມ່​ນ້ຳ​ຂອງ​ວ່າ ຄວາມ​ພະ​ຍາ​ຍາມ​ຂອງ​ຣັ​ຖ​ບານ​ລາວໃນການ​ສ້າງ​ເຂື່ອນ​ໃສ່​ແມ່​ນ້ຳ​ຂອງອີກຫຼາຍ​ແຫ່ງນັ້ນ, ຈະເຮັດ​ໃຫ້​ແຕ່ກຸ່ມ​ນາຍ​ທຶນ​ໄດ້​ປ​ໂຍດ, ແຕ່​ຊາວ​ບ້ານ​ ພັດ​ຕ້ອງ​ຢູ່​ກັບ​ຄວາມ​ສ່ຽງ.

ສຽງ5: “But to me, the problem is that the people that will get benefit are different from the people who take the risk. You know, it is the local villagers, up and down the Mekong, who take the risk. Maybe it will be ok, but maybe not. But they are not the one who will get the benefit.”

ສຳ​ລັບ​ຂ້າ​ພະ​ເຈົ້າ​ແລ້ວ, ບັນ​ຫາກໍ​ແມ່ນ​ວ່າ ​ຜູ້​ຈະ​ໄດ້​ຮັບ​ປ​ໂຍດຈ​າກ​ການສ້າງ​ເຂື່ອນ ຈະ​ຕ່າງ​ຈາກ​ຜູ້​ທີ່​ຮັບ​ຄວາມ​ສ່ຽງ​ຈາກ​ການ​ສ້າງ​ເຂື່ອນ​. ຄວາມ​ຈິງ​ກໍ​ຄືວ່າ ຊາວ​ບ້ານ​ທີ່​ອາ​ໃສຢູ່​ເທິງ ແລະ ລຸ່ມ​ແມ່​ນ້ຳ​ຂອງນັ້ນ, ແມ່ນ​ຜູ້​ທີ່​ຈະ​ຮັບ​ຄວາມ​ສ່ຽງ. ມັນ​ອາ​ຈ​ບໍ່​ເກີດ​ຫ​ຍັງ​ຂຶ້ນ​ເລີຍ​ກໍ​ເປັນ​ໄດ້, ແຕ່ກໍ​ບໍ່​ແນ່. ແຕ່​ພວກ​ເຂົາ​ຈະ​ບໍ່​ແມ່ນ​ກຸ່ມ​ຄົນ​ທີ່​ໄດ້​ຮັບ​ຜົ​ລ​ປ​ໂຍດ​ຈາກ​ການ​ສ້າງ​ເຂື່ອນ.

ປະ​ຈຸ​ບັນ, ການກໍ່​ສ້າງ​ເຂື່ອນ​ໃສ່​ແມ່​ນ້ຳ​ຂອງໃນ​ລາວ​ ສຳ​ເຣັ​ຈ​ແລ້ວ 2 ແຫ່ງ ອັນ​ໄດ້​ແກ່​ການ​ສ້າງເຂື່ອນ​ໄຊ​ຍະ​ບູ​ຣີ ແລະ ເຂື່ອນດອນ​ສະ​ໂຮງ, ເຊິ່ງຫຼາຍ​ຝ່າຍ​ກໍ​ສະ​ແດງ​ຄວາມ​ເປັນ​ຫ່ວງ​ອອກ​ມາ​ເລື້ອຍໆ​ວ່າ ພຽງ 2 ເຂື່ອນທີ່​ຖືກ​ສ້າງ​ຂຶ້ນ​ມາ ກໍ​ເຮັດ​ໃຫ້​ເກີດ​ຜົ​ລ​ກະ​ທົບ​ເຊັ່ນ​ນີ້​ແລ້ວ. ຖ້າ​ຫາກ​ເຂື່ອນ​ປາກ​ແບງ, ເຂື່ອນ​ປາກ​ລາຍ, ເຂື່ອນຫຼວງ​ພ​ຣະ​ບາງ ແລະ ອີກຫຼາຍ​ເຂື່ອນ ທີ່​ມີ​ແຜນ​ຈະ​ສ້າງ​ໃສ່​ແມ່​ນ້ຳ​ຂອງ​​ໃນ​ອະ​ນາ​ຄົດ ຜົ​ລ​ກະ​ທົບ​ຈະ​ຮ້າຍ​ແຮງ​ອີກ​ສ່ຳ​ໃດ?

ຄໍາເຫັນ (0)
Share
ເຕັມຫນ້າ