ຫຼາຍໂຕເມືອງ ຂາດນ້ຳປະປາໃຊ້

ພູວົງສ໌
2019-10-29
ອີແມວລ໌
ຄໍາເຫັນ
Share
ພິມ
water shortage 2
water shortage 2
Photo: RFA

ເມື່ອ​ສັ​ປ​ດາ​ທີ່​ຜ່ານ​ມາ ຣະ​ຫວ່າງວັນ​ທີ 20 ຫາ​ວັນ​ທີ 26 ຕຸ​ລາ ນັ້ນ, ຫຼາຍ​ບ້ານ ແລະ ຫຼາຍ​ເມືອງ​ໃນ​ຂອບ​ເຂດ​ນະ​ຄອນຫຼວງວຽງ​ຈັນ ແລະ ແຂວງວຽງ​ຈັນ ຂາດ​ນ້ຳ​ປະ​ປາ​ໃຊ້​ຢ່າງ​ໜັກ ເນື່ອງ​ຈາກ​ໂຮງ​ງານ​ຜ​ລິ​ຕ​ນ້ຳ​ປະ​ປາຫຼາຍ​ແຫ່ງ​ທົ່ວ​ນະ​ຄອນຫຼວງວຽງ​ຈັນ ແລະ ແຂວງວຽງ​ຈັນ ຂາດ​ນ້ຳ​ໃນ​ການ​ຜ​ລິ​ຕ​ນ້ຳ​ປະ​ປາ ເຮັດ​ໃຫ້​ບໍ່​ສາ​ມາດ​ສນອງນ້ຳ​ປະ​ປາ​ໃຫ້​ປະ​ຊາ​ຊົນ​ໃຊ້​ໄດ້​ຢ່າງ​ທົ່ວ​ເຖິງ.

ຕໍ່​ບັນ​ຫາ​ດັ່ງ​ກ່າວ ປະ​ຊາ​ຊົນ​ໃນ​ເຂດ​ເມືອງ​ຈັນ​ທະ​ບູ​ຣີ, ເມືອງໄຊ​ເສດ​ຖ​າ ແລະ ເມືອງໄຊ​ທາ​ນີ ໃນ​ນະ​ຄອນຫຼວງວຽງ​ຈັນ ແລະ ເມືອງ​ທຸ​ຣະ​ຄົມ​ ແຂວງວຽງ​ຈັນ ຂາດ​ນ້ຳ​ໃຊ້​ເປັນ​ເວ​ລາຫຼາຍມື້.

​ດັ່ງ​ຊາວ​ບ້ານ​ໃນ​ເຂດ​ເມືອງ​ໄຊ​ທາ​ນີ ໄດ້​ກ່າວ​ຕໍ່​ຜູ້​ສື່​ຂ່າວ​ວິ​ທ​ຍຸ​ເອ​ເຊັຽ​ເສ​ຣີ ໃນ​ວັນ​ທີ 23 ຕຸ​ລາ ຜ່ານ​ມາ​ວ່າ:

ສຽງ1: “ບັນ​ຫາ ເພາະ​ວ່າ​ມັນ​ບໍ່​ມາ​ເລີຍ ມັນ​ໃຊ້​ບໍ່​ໄດ້​ເລີຍ. ປະ​ຊາ​ຊົນຫຼາຍ​ບ່ອນຫຼາຍ​ເຂດ​ຂະ​ເຈົ້າ​ກໍ​ຈົ່ມ​ຢູ່ ນ້ຳ​ບໍ່​ພໍ​ໃຊ້. ຫຼາຍ​ພື້ນ​ທີ່ ທີ່​ວ່າ​ເຮັດ​ໃຫ້​ມີ​ບັນ​ຫາ​ຢູ່ເຣື້ອງ​ນ້ຳ​ປະ​ປາ, ແຕ່​ມາ​ກໍ​​ຄືເປັນ​ນ້ຳ ຄື​ນ້ຳ​ກ໊ອກ​ຫັ້ນ​ແຫຼະ, ມັນ​ບໍ່​ແຮງ​ເນາະ.”

ຊາວ​ບ້ານ​ໃນ​ເຂດ​ເມືອງ​ທຸ​ຣະ​ຄົມ ແຂວງວຽງ​ຈັນ​ ທ່ານນຶ່ງ ກໍໄດ້​ກ່າວ​ໃນ​ທຳ​ນອງ​ດຽວ​ກັນຕໍ່​ຜູ້​ສື່​ຂ່າວ​ພວກ​ເຮົາ ໃນ​ວັນ​ທີ 25 ຕຸ​ລາ ​ວ່າ ຫຼາຍມື້ຜ່ານ​ມາ ເຂດ​ບ້ານ​ຂອງ​ທ່ານ​ນ້ຳ​ປະ​ປາ​ໄຫຼຄ່ອຍ ແລະ ຕ້ອງ​ໄດ້​ລຸກ​ແຕ່​ເດິກ ເພື່ອ​ມາ​ໂຕ່ງ​ນ້ຳ​ປະ​ປາ​ໄວ້​ໃຊ້.

ສຽງ2: “ນ້ຳ​ບໍ່​ມ​ານີ້ ກະຫຼາຍມື້​ລະ​ເດ. ຕັ້ງ​ແຕ່​ວັນ​ທີ 21-22 ມາ ເກືອບບໍ່​ມີ​ນ້ຳ​ໃຊ້, ມາ​ກະ​ມາ​ແບບ​ພໍ​ຈ໊ອກໆ. ກາງ​ຄືນ​ກະ​ໄດ້​ນອນ​ຖ້າ, 2 ໂມງ 3 ໂມງ​ກາງ​ຄືນ​ລຸກ​ມາ​ໂຕ່ງ ກະ​ໄດ້​ສ່ຳ​ຄຸນີ້, ຕອນນີ້​. ບໍ່​ໄດ້​ຍິນ​ຂ່າວ​ແຈ້ງ​ເຕືອນ​ວ່າ ນ້ຳ​ປະ​ປາ​ຊິ​ຂາດ​ໃຊ້​ບໍ່, ໂຕ່ງ​ນ້ຳ​ໄວ້​ໃຊ້​ເດີ້. ມີ​ແຕ່​ວ່າ ຮູ້​ແຕ່​ວ່າ​ນ້ຳ​ບໍ່​ມາ​ຊອກ​ຫາ​ມາ​ໂຕ່ງ​ໄວ້ ເທື່ອ​ມັນ​ມາ​ຍາມ​ໃດ ເປີດ​ໄວ້​ຕ​ລອດ.”

ຕໍ່​ບັນ​ຫາ​ດັ່ງ​ກ່າວ, ເຈົ້າ​ໜ້າ​ທີ່​ຣັ​ຖວິ​ສາ​ຫະ​ກິ​ຈ​ນ້ຳ​ປະ​ປາ ນະ​ຄອນຫຼວງວຽງ​ຈັນ ທ່ານ​ນຶ່ງ ກໍ​ໄດ້​ກ່າວ​ຕໍ່​ຜູ້​ສື່​ຂ່າວ​ພວກ​ເຮົາ ໃນ​ວັນ​ທີ 23 ຕຸ​ລາ ວ່າ ສາ​ເຫ​ຕ​ທີ່ຫຼາຍ​ເຂດ​ຂາດ​ນ້ຳ​ປະ​ປາ​ໃຊ້ ກໍ​ຍ້ອນ​ໂຮງ​ງານ​ຜ​ລິ​ຕ​ນ້ຳ​ປະ​ປາ ບໍ່​ສາ​ມາດ​ດູດ​ນ້ຳ​ງື່ມ​ຂຶ້ນ​ມາ​ຜ​ລິ​ຕ​ນ້ຳ​ປະ​ປາ​ໄດ້ ເນື່ອງ​ຈາກ​ເກີດ​ສະ​ພາບ​ນ້ຳ​ງື່ມ​ບົກ​ແຫ້ງ​ຢ່າງ​ໜັກ​ໃນ​ຮອບຫຼາຍ 10 ປີ​ມານີ້.

ສຽງ3: “ປະ​ຈຸ​ບັນ​ນີ້​ນ້ຳ​ມັນ​ແຫ້ງ​ເດ​ເນາະ ນ້ຳ​ຂອງບໍ່​ເຄີຍ​ແຫ້ງ ບໍ່​ທັນ​ຮອດ​ເດືອນ 5 ແລ້ວ​ກະ​ແຫ້ງຫຼາຍ. ອັນ​ທີ 2 ມາ ລຳ​ນ້ຳ​ສາ​ຂາ, ນ້ຳ​ງື່ມນີ້​ກະ​ແຫ້ງຫຼາຍ ແຫ້ງ​ຜິດ​ປົກ​ກະ​ຕິ ເພາະ​ວ່​າ​ມັນ​ແຫ້ງ​ເກີນ​ໄປ. ບາງ​ບ່ອນ​ກະ​ຈົນ​ຊິ​ຍ່າງ​ຂ້າມ​ໄດ້​ລະ.”

ຫຼາຍໂຕເມືອງ ຂາດນ້ຳປະປາໃຊ້ຫຼາຍໂຕເມືອງ ຂາດນ້ຳປະປາໃຊ້

ສອດ​ຄ່ອງ​ກັບ​ຄວາມ​ເວົ້າ​ຂອງ​ເຈົ້າ​ໜ້າ​ທີ່​ຣັ​ຖວິ​ສາ​ຫະ​ກິ​ຈ​ນ້ຳ​ປະ​ປາ ນະ​ຄອນຫຼວງວຽງ​ຈັນ ທ່ານນີ້, ໃນ​ນາມ​ຣັ​ຖວິ​ສາ​ຫະ​ກິ​ຈ​ນ້ຳ​ປະ​ປາ ນະ​ຄອນຫຼວງວຽງ​ຈັນ, ຍາ​ນາງ ເພື່ອນແສງ ໄຊ​ນາ​ຄຳ, ຮອງ​ຜູ້​ອຳ​ນວຍ​ການ ​ຣັ​ຖວິ​ສາ​ຫະ​ກິ​ຈ​ນ້ຳ​ປະ​ປາ ນະ​ຄອນຫຼວງວຽງ​ຈັນ ກໍ​ໄດ້​ອອກ​ແຈ້ງ​ການ ເມື່ອ​ວັນ​ທີ 23 ຕຸ​ລາ 2019 ວ່າ ສາ​ເຫ​ຕ​ທີ່​ເຮັດ​ໃຫ້​ນ້ຳ​ປະ​ປາບໍ່​ພໍ​ໃຊ້​ໃນຫຼາຍ​ໂຕ​ເມືອງ ໃນ​ຂອບ​ເຂດ​ນະ​ຄອນຫຼວງວຽງ​ຈັນ ນັ້ນ ເປັນ​ຍ້ອນ​ເກີດ​ສະ​ພາບ​ນ້ຳ​ງື່ມ​ບົກ​ແຫ້ງ​ຢ່າງ​ໜັກ ຈຶ່ງ​ເຮັດ​ໃຫ້​ໂຮງ​ງານ​ຜ​ລິ​ຕ​ນ້ຳປະ​ປາ​ດົງ​ໝາກ​ຄາຍ ທີ່​ເປັນ​ໂຮງ​ງານ​ໃຫ​ຍ່​ທີ່​ສຸດ ບໍ່​ສາ​ມາດ​ຜ​ລິ​ຕ​ນ້ຳ​ປະ​ປາ ເພື່ອ​ສນອງ​ໃຫ້​ພໍ່​ແມ່​ປະ​ຊາ​ຊົນ​ໄດ້​ພຽງ​ພໍ.

ເຖິງ​ຢ່າງ​ໃດ​ກໍ​ຕາມ, ມາ​ຮອດ​ວັນ​ທີ 29 ຕຸ​ລາ ນີ້, ເຈົ້າ​ໜ້າ​ທີ່​ຣັ​ຖວິ​ສາ​ຫະ​ກິ​ຈ​ນ້ຳ​ປະ​ປາ​ໃນ​ນະ​ຄອນຫຼວງວຽງ​ຈັນ​ ທ່ານ​ນຶ່ງ ກໍ​ໄດ້​ຢືນ​ຢັນ​ຕໍ່​ຜູ້​ສື່​ຂ່າວ​ພວກ​ເຮົາ​ໃນ​ຕອນ​ບ່າຍ​ວັນ​ທີ 29 ຕຸ​ລາ ວ່າ ບັນ​ຫາ​ການ​ຂາດ​ນ້ຳ​ປະ​ປາ​ໃຊ້​ໃນ​ນະ​ຄອນຫຼວງວຽງ​ຈັນ​ ແລະ ແຂວງວຽງ​ຈັນ ໄດ້​ຮັບ​ການ​ແກ້​ໄຂ​ເປັນ​ປົກ​ກະ​ຕິ​ແລ້ວ.

ສຽງ4: “ປົກ​ກະ​ຕິ​ໝົດແລ້ວ, ແກ້​ໄຂ​ແລ້ວ. ພວກ​ນ້ອງ​ໄດ້​ແກ້​ໄຂ ບໍ່​ໄດ້​ມີ​ບັນ​ຫາ​ຫ​ຍັງ​ແລ້ວ. ໂຕນີ້​ພວກ​ເຮົາ​ໄດ້​ແກ້​ໄຂ ສາ​ມາດ​ດູດ​ນ້ຳ​ເຂົ້າ​ໂປ້ມ​ ເຂົ້າ​ອ່າງ​ໄດ້​ໝົດ​ແລ້ວ​ໄດ໋.”

ໃນ​ຂ​ນະ​ດຽວ​ກັນ, ຊາວ​ບ້ານ​ ບ້ານ​ນາ​ສ້ຽວ, ເມືອງ​ໄຊ​ທາ​ນີ ​ນະ​ຄອນຫຼວງວຽງ​ຈັນ ທ່ານ​ນຶ່ງ ກໍ​ໄດ້​ຢືນ​ຢັນ​ຕໍ່​ຜູ້​ສື່​ຂ່າວ​ພວກ​ເຮົາ​ໃນ​ວັນ​ທີ 29 ຕຸ​ລາ ​ວ່າ ນ້ຳ​ປະ​ປາ ໄດ້​ກັບ​ມາ​ສູ່​ສະ​ພາ​ວະ​ປົກ​ກະ​ຕິ​ແລ້ວ ພາຍຫຼັງ​ທີ່​ໄຫຼ​ຄ່ອຍ ແລະ ບໍ່​ໄຫຼ​ໃນ​ບາງ​ຍາມ ໄດ້​ປະ​ມານ 1 ສັ​ປ​ດາ.

ສຽງ5: “ໂອ່ ມາ​ຢູ່​ເກາະ, ເຫັນ​ເຂົາ​ໃຊ້​ປົກ​ກະ​ຕິ​ຢູ່. ເອີ່ມື້ນີ້ ມື້​ເຊົ້າ​ນີ້​ເຫັນ​ເຂົາ​ປ່ອຍ​​ຄື​ວ່າອອກ​ມາ​ປົກ​ກະ​ຕິ​ຢູ່. ແມ່ນ​ແຫຼະ ກະ​ຍັງ​ແຮງ ເຂົາ​ຍັງ​ຫົດ​ທາງ​ໄດ້ ເຂົາ​ຍັງ​ເອົາ​ໂຕ່​ໂຢ່​ມາ​ຕໍ່​ໃສ່ ເຂົາ​ຍັງ​ສີດ​ຫົດ​ທາງ​ແດ່ ທາງ​ຂີ້​ຝຸ່ນ​ເນາະ ເຂົາ​ຍັງ​ຫົດ​ໄດ້. ຖື​ວ່າ​ຍັງ​ເປັນ​ປົກ​ກະ​ຕິ​ຢູ່ແຫຼະ.”

ປະ​ຊາ​ຊົນ​ລາວ​ທີ່​ຮັບ​ຮູ້​ເຖິງ​ເຫ​ຕ​ການ​ຂາດ​ນ້ຳ​ປະ​ປາ​ໃຊ້ ​ໃນ​ຂອບ​ເຂດນ​ະ​ຄອນຫຼວງວຽງ​ຈັນ ແລະ ແຂວງວຽງ​ຈັນ ໃນ​ເທື່ອນີ້ ຕ່າງ​ກໍພາ​ກັນ​ຕັ້ງ​ຄຳ​ຖາມ ແລະ ຮູ້​ສຶກ​ເປັນ​ກັງ​ວົນ​ວ່າ ພຽງ​ແຕ່​ເດືອນ​ຕຸ​ລາ, ເຊິ່ງປົກ​ກະ​ຕິຈະ​ຕ້ອງ​ເປັນ​ໄລ​ຍະ​ທີ່​ນ້ຳ​ນອງເຖິງ​ແຄມ​ຕາ​ຝັ່ງ. ແຕ່​ຕົກມາ​ໃນ​ປີນີ້, ນ້ຳ​ງື່ມ ແລະ ນ້ຳ​ຂອງ​ ພັດ​ບົກ​ແຫ້ງ​ລົງ​ຈົນ​ໜ້າ​ຕົກ​ໃຈ ແບບບໍ່​ມີ​ໃຜ​ເຄີຍພົບພໍ້ມາ​ກ່ອນ. ຖ້າ​ຫາກ​ຕົກ​ຮອດ​ຍາມ​ແລ້ງແທ້ໆ ຄື​ຣະ​ຫວ່າ​​ງເດືອນ​ມີ​ນາ ຫາ​ ເດືອນເມ​ສາ, ສະ​ພາບ​ນ້ຳ​ງື່​ມ ແລະ ນ້ຳ​ຂອງ​ຈະ​ເປັນ​ແນວ​ໃດ? ແລະ ໂຮງ​ງານ​ນ້ຳ​ປະ​ປາ​ຈະ​ຍັງ​ມີ​ນ້ຳ ເພື່ອ​ຜ​ລິ​ຕ​ນ້ຳ​ປະ​ປາ​ໃຫ້​ປະ​ຊາ​ຊົນ​ຊົມ​ໃຊ້​ພຽງ​ພໍ ຫຼື​ບໍ່?

ສ​ບາຍ​ດີ.

ຄໍາເຫັນ (0)
Share
ເຕັມຫນ້າ