ທາງຣົດໄຟໃກ້ໂຮງຮຽນ

ມະນີຈັນ
2017-05-13
ອີແມວລ໌
ຄໍາເຫັນ
Share
ພິມ
ອຸປກອນເຄື່ອງຈັກ ທີ່ນໍາເຂົ້າມາຈາກຈີນ ເພື່ອວຽກງານກໍ່ສ້າງ ທາງຣົດໄຟ ລາວ-ຈີນ ທີ່ເລີ້ມຈາກ ແຂວງຫຼວງນໍ້າທາ
ອຸປກອນເຄື່ອງຈັກ ທີ່ນໍາເຂົ້າມາຈາກຈີນ ເພື່ອວຽກງານກໍ່ສ້າງ ທາງຣົດໄຟ ລາວ-ຈີນ ທີ່ເລີ້ມຈາກ ແຂວງຫຼວງນໍ້າທາ
RFA/NY

ໂຮງຮຽນມັທຍົມສົມບູນ ບ້ານຫ້ວຍຂຸມ ເມືອງໄຊ ແຂວງອຸດົມໄຊ ອາຈໄດ້ຮັບຜົລກະທົບ ຈາກການກໍ່ສ້າງ ທາງຣົດໄຟ ລາວ-ຈີນ ໃນມໍ່ໆນີ້ ຫາກທາງການ ຍັງບໍ່ເລັ່ງ ຍົກຍ້າຍ ໂຮງຮຽນ ໄປຢູ່ບ່ອນໃໝ່.

ທຸກມື້ນີ້ ການເຈາະອຸໂມງ ແລະ ສ້າງທາງຣົດໄຟ ຢູ່ເມືອງໄຊ ກໍເຂົ້າມາໃກ້ໂຮງຮຽນ ຂຶ້ນເລື້ອຍໆ ເຮັດໃຫ້ຄຣູ ພາກັນກັງວົນ, ດັ່ງນາຍຄຣູ ທ່ານນຶ່ງ ກ່າວຕໍ່ RFA ໃນວັນທີ 11 ພຶສພາ ນີ້ວ່າ:

"ກັງວົນຄືວ່າ ດຽວນີ້ມັນກະທ້າຍສົກຮຽນແລ້ວ ສົມມຸດວ່າ ປີໜ້າ ກະສິເຂົ້າຮຽນໃໝ່ ຫັ້ນນະ ບາດນີ້ກະສິຍັງແມ່ນ ໂຮງຮຽນເກົ່າ ບາດນີ້ ມາເບິ່ງ ການກໍ່ສ້າງ ຊຸມທາງຣົດໄຟນີ້ ບາງບ່ອນເຂົາກະເລີ່ມ ເຈາະອຸໂມງ ເຈາະນັ້ນແລ້ວ ບາດນີ້ໂຮງຮຽນ ມັນກະບໍ່ໄດ້ ເຮັດຫຍັງເທື່ອ ກະຍາກ ເປັນຫ່ວງທາງນັກຮຽນ ຫັ້ນແຫລະ".

ທ່ານກ່າວຕື່ມວ່າ ຫາກໂຄງການ ສ້າງທາງຣົດໄຟ ມາໃກ້ໂຮງຮຽນ ຄິດວ່າຂີ້ໄງ່ ແລະສຽງດັງ ຈາກການກໍ່ສ້າງຈະເຮັດໃຫ້ ນັກຮຽນບໍ່ມີ ສະມາທິ ຮຽນໜັງສື ແລະນັກຮຽນ ກໍຈະສົນໃຈເບິ່ງ ການກໍ່ສ້າງ ຫລາຍກວ່າສົນໃຈຮຽນ. ຕໍ່ບັນຫານີ້ ທາງພໍ່ແມ່ຜູ້ປົກຄອງ ກໍມີຄວາມກັງວົນນໍາ ເຊັ່ນດຽວກັນ ຈຶ່ງຢາກໃຫ້ເລັ່ງ ຍົກຍ້າຍໂຮງຮຽນ ໄປສ້າງ ຢູ່ບ່ອນໃໝ່.

ໃນແຜນການທີ່ທາງໂຮງຮຽນ ໄດ້ສເນີໄປຍັງ ທາງການແຂວງ ເພື່ອຂໍງົບປະມານ 50 ຕື້ກີບ ສໍາລັບສ້າງໂຮງຮຽນໃໝ່ນັ້ນ ກໍຍັງບໍ່ໄດ້ຮັບ ຄໍາຕອບ.

ກ່ຽວກັບເຣື່ອງນີ້ RFA ກໍໄດ້ຕິດຕໍ່ ໄປຍັງຜແນກ ໂຍທາທິການແລະຂົນສົ່ງ ແຂວງອຸດົມໄຊ ແຕ່ກໍບໍ່ມີໃຜ ໃຫ້ຂໍ້ມູນໄດ້.

ໂຮງຮຽນມັທຍົມສົມບູນ ບ້ານຫ້ວຍຂຸມ ມີນັກຮຽນ ປະມານ 1 ພັນຄົນ ຊຶ່ງໂຮງຮຽນນີ້ ຈະຖືກທາງຣົດໄຟ ຕັດຜ່ານ ຈຶ່ງຕ້ອງຍ້າຍໄປສ້າງ ຢູ່ບ່ອນໃໝ່ ແລະ ໂຮງຮຽນນີ້ ຈະຖຶືກມ້າງໄດ້ ກໍຕໍ່ເມື່ອ ໂຮງຮຽນ ແຫ່ງໃໝ່ ຕ້ອງສ້າງໃຫ້ແລ້ວກ່ອນ ເທົ່ານັ້ນ ເພື່ອບໍ່ໃຫ້ນັກຮຽນ ຂາດ ການຮຽນ.

ຄໍາເຫັນ (1)
Share

ຄ.ນະຄຳມວ່ນ

ຈາກ ທ່າແຂກ

ທາງຣົຖໄຟນີ້ແລ້ວມັນຈະໄຫມ້ ສປປລາວແດງຍ້ອນຄວາມ ຮູ້ເທົ່າບໍ່ເຖິງການຍ້ອນ ຄວາມໂລບມາກລາບຫາຍຢ່າງແນ່ນອນ ປັດຈຸບັນນີ້ພັກກໍ່ແມ່ນລູກ ພັກຄອມມມູຍນິດອິນໂດຈີນ, ລັດກໍເປັນຂອງແກວແດງ ແຕ່ງຕັ້ງແກວກັບເຈັກນີ້ມັນເຄີຍ ຈັດການກັນຢ່າງນັກຫນ່ວງມາກ່ອນແລ້ວ, ຈົນກະທັງໄດ້ຍ້າຍສູນ ສຳມະນາຢູ່ພົງສາລີມາຢູ່ສົບປານ, ແຕ່ລະຝ່າຍຕາຍປານແມງ ເມົ່າບິນເຂົ້າກອງໄຟ, ແນວໄດໃຫ້ແກວແລະເຈັກມາເຈິ້ກັນອີກ ໃນຍຸກໂລກາພິວັດນີ້, ບໍ່ມີທາງດອກວ່າຜູ້ໄດຈະຖອຍໃຫ້ກຽດ ພວກເພິ່ນ, ຊ້ຳບໍໍ່ພໍເຈັກມັນຍັງທຳລາຍແກ້ງເປັນທາງສາຍ ໄຫມອີກ, ເວົ້າລວມແລ້ວຜົລປະໂຍດເຂົ້າພວກເຂົາຫມົດ ທຸກຢ່າງ,ສຳລັບພວກພັກ-ລັດເຂົາພໍແຕ່ຖົ່ມນ້ຳລາຍໃສ່ປາກ ພໍໃຫ້ດີໃຈເປັນວັນໆໄປເເທົ່ານັ້ນແລ້ວ, ເຂົ້າໃຈແດ່ເດີສະຫາຍ ທັງຫລາຍເອີຍ!!!


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

May 15, 2017 05:22 PM

ເຕັມຫນ້າ