ນັກທ່ອງທ່ຽວຈີນນັບລ້ານ ທ່ຽວລາວ ປີ 2019

ໄມຊູລີ
2020-01-07
ອີແມວລ໌
ຄໍາເຫັນ
Share
ພິມ
ໂຄງການພັທນາ ການທ່ອງທ່ຽວ ໃນສປປລາວ
ໂຄງການພັທນາ ການທ່ອງທ່ຽວ ໃນສປປລາວ
RFA

ໃນປີ 2019 ມີນັກທ່ອງທ່ຽວເຂົ້າມາ ທ່ຽວລາວ ຫລາຍຂຶ້ນເປັນ 4,580,000 ຄົນ ເກິນເປົ້າໝາຍ ທີ່ທາງການ ຕັ້ງໄວ້ 4,500,00 ຄົນ ໃນນັ້ນ ໂດຍສະເພາະຄົນຈີນ ມີປະມານ 1 ລ້ານ 2 ໝື່ນ 2 ພັນ ກວ່າຄົນ, ເກີນເປົ້າໝາຍ1 ລ້ານຄົນ ຍ້ອນທາງການລາວ ມີການ ປັບປຸງ ດ້ານຄົມມະນາຄົມ, ການໂຄສະນາທ່ອງທ່ຽວ ແລະ ສ້າງກິຈກັມງານບຸນຕ່າງໆ ໃຫ້ຫຼາກຫຼາຍຂຶ້ນ, ອິງຕາມຄໍາເວົ້າ ຂອງ ເຈົ້າໜ້າທີ່ ກົມໂຄສະນາການທ່ອງທ່ຽວ ທ່ານນຶ່ງ ກ່າວຕໍ່ວິທຍຸ ເອເຊັຽເສຣີ ໃນວັນທີ່ 7 ມົກກະຣາ ນີ້:

“ກໍເພີ້ມຂຶ້ນຫລາຍຢູ່ ເພາະວ່າເຮົາມີການສົ່ງເສິມ ປີທ່ອງທ່ຽວ ລາວ-ຈີນ ແລະ ສ່ວນຫລາຍ ນັກທ່ອງທ່ຽວຈີນຫລາຍ ກໍມີຫລາຍກິຈກັມ ກະຕຸ້ນເມືອງທີ່ປິ້ນອ້ອມ ໃນການດຶງດູດ ນັກທ່ອງທ່ຽວ ຫັ້ນນະ ສ່ວນຫລາຍກໍຫລວງພຣະບາງ ເນາະ ກໍລົງມາ ທາງພາກກາງ ແຕ່ ສ່ວນພາກໃຕ້ ມັນຫທາງສວັນນະເຂດ ລົງໄປ.”

ເຈົ້າໜ້າທີ່ ທ່ອງທ່ຽວ ແຂວງຫລວງພຣະບາງ ທ່ານນ່ຶ່ງກ່າວວ່າ ສ່ວນໃຫຍ່ຄົນຈີນມາທ່ຽວ ຢູ່ຫລວງພຣະບາງ ຈໍານວນຫລາຍ ໂດຍເຂົ້າມາເປັນກຸ່ມ ຣົຖບັດຄັນໃຫຍ່ ບາງເທື່ອກໍຂັບຣົຖມາ ທ່ຽວເອງ ແຕ່ຍັງພົບບັນຫາ ໃນ ເຣື້ອງຣາຍຮັບ ຄືຍັງບໍ່ກະຈາຍ ໄປສູ່ຊຸມຊົນ ທັງນີ້ ຍ້ອນຄົນຈີນເຂົ້າມາທ່ຽວລາວນັ້ນ ມັກໄປພັກເຊົາໂຮງແຮມ ແລະ ເຂົ້າ ຮ້ານອາຫານ ທີ່ເປັນທຸຣະກິດ ຂອງເຂົາເອງ:

“ເຣື້ອງນັກທ່ອງທ່ຽວຈີນເຂົ້າມາ ເຣື້ອງຄ່າໃຊ້ຈ່າຍ ເຂົາເຈົ້າກໍສູງຢູ່ ແຕ່ສ່ວນໃຫ່ຍເຂົາເຈົ້າ ມານອນ ກໍນອນໄຮງແຮມຈີນ ກິນກໍກິນຢູ່ ຮ້ານອາຫານ ຈີນຈັ່ງຊີ້ນະ ການລົງທຶນຂອງຈີນຫັ້ນລະ ການໃຊ້ຈ່າຍນີ້ ອາດຈະບໍ່ເຖິງ ປະຊາຊົນທ້ອງຖິ່ນ ຮ້ອຍເປີເຊັນ ເນາະ.”

ຢ່າງໃດກໍຕາມ ທາງການກໍາລັງຄົ້ນຄວ້າສຶກສາ ເພື່ອແກ້ໄຂບັນຫາ ດັ່ງກ່າວ ກ່ຽວກັບການກະຈາຍຣາຍຣັບ ເຂົ້າສູ່ຊຸມຊົນ ເປັນຕົ້ນ: ການສົ່ງເສິມ ການຂາຍສິນຄ້າ ພື້ນບ້ານ, ສິນຄ້າຈາກ ການຜລິດ ເພື່ອໃຫ້ປະຊາຊົນມີຣາຍຮັບ.

ອິງຕາມ ການຣາຍງານຂ່າວ ຂອງທາງຫານລາວ ໃນວັນທີ່ 6 ມົກກະຣາ 2020 ທ່ານສູນ ມະນີວົງ ຫົວໜ້າ ກົມໂຄສະນາການ ທ່ອງທ່ຽວ ເວົ້າວ່າ ການເພີ້ມຂຶ້ນ ຂອງນັກທ່ອງທ່ຽວ ດັ່ງກ່າວ ກໍຍ້ອນມີການໂຄສະນາ ສົ່ງເສິມການທ່ອງທ່ຽວ ຊຶ່ງ ມີຫລາຍກິຈກັມ ບໍ່ວ່າ ຢູ່ປະເທດລາວ ແລະ ປະເທດຈີນ, ນອກຈາກນີ້ ປະເທດລາວ ຍັງມີການເປິດສາຍ ການບິນລາວ-ຈີນ ຢູ່ 8 ຕົວເມືອງ ຂອງ ຈີນນໍາອີກ ຮວມທັງ ສາຍການບິນ ລາວ ແລະ ຈີນ ມີ 27 ດ່ານສາກົນ ໃນທົ່ວປະເທດ ທີ່ ມີນັກທ່ອງທ່ຽວ ສາມາດເຂົ້າມາລາວ ໄດ້ ຢ່າງສະດວກສະບາຍ.

ເຕັມຫນ້າ