ໃບຕາດິນຊ້ຳຊ້ອນ ຍັງສ້າງ ບັນຫາ

ໄຊຍາ
2019-08-26
ອີແມວລ໌
ຄໍາເຫັນ
Share
ພິມ
ເຂດທີ່ດິນ ທີ່ມີການຂັດແຍງກັນ ກັບຄອບຄົວຊາວນາ ທີ່ ເຮັດໄຮ່ເຮັດນາໃສ່ ມາໄດ້ຫຼາຍສິບປີ ແລະ ກໍໄດ້ເສັຽພາສີນໍາໃຊ້ທີ່ດິນ ມາໂດຍຕລອດ
ເຂດທີ່ດິນ ທີ່ມີການຂັດແຍງກັນ ກັບຄອບຄົວຊາວນາ ທີ່ ເຮັດໄຮ່ເຮັດນາໃສ່ ມາໄດ້ຫຼາຍສິບປີ ແລະ ກໍໄດ້ເສັຽພາສີນໍາໃຊ້ທີ່ດິນ ມາໂດຍຕລອດ
RFA/TP

ຜ່ານມາທາງການລາວ ໄດ້ກວດພົບການອອກບຕາດິນຊ້ຳຊ້ອນ ແລະ ການປອມແປງໃບຕາດິນ ຮວມທັງໝົດ 80 ກໍຣະນີ ເປັນຕົ້ນການ ແຈ້ງວ່າໃບຕາດິນເສັຽ ລູກລັກເອົາໃບຕາດິນຂອງພໍ່ແມ່ ແລ້ວປ່ຽນເປັນຊື່ໂຕເອງ. ຕໍ່ບັນຫາດັ່ງກ່າວ ເຈົ້າໜ້າທີ່ ຊັພຍາກອນ ທັມມະຊາດ ແລະ ສິ່ງແວດລ້ອມ ໄດ້ກ່າວຕໍ່ RFA ໃນວັນທີ 26 ສິງຫາ ວ່າ:

"ຢູ່ກອງປະຊຸມສະພາເພິ່ນກາເວົ້າວ່າ ພົບບັນຫາໃບຕາດິນທັບຊ້ອນ ການຊື້ຂາຍດິນ ບໍ່ເຖິງນີ້ຫັ້ນນ່າ ໃບແຈ້ງເສັຽທີ່ດິນຫັ້ນນ່າ ບາງຕອນ ກາມີ, ຄັນເຣື່ອງເວົ້າໂດນການປອມແປງ ເອກກະສານ ສົມມຸດວ່າກໍຣະນີຂ້ອຍບໍ່ໄດ້ຍີນຍອມ ແຕ່ເຈົ້າມີຄວາມສາມາດ ເຈົ້າມີເທັກນິກ ເຈົ້າມີເງິນແລ້ວໄປປອມແປງກະມີ ໂທດອາຍາ."

ນອກຈາກນີ້ ເຈົ້າໜ້າທີ່ຍັງກວດພົບເຫັນ ການນຳເອົາໃບຕາດິນ ທີ່ປະຊາຊົນນຳເອົາໄປຈຳ ກູ້ຢືມເງິນນອກຣະບົບນັ້ນ ໄປຄ້ຳປະກັນ ກູ້ຢືມ ທະນາຄານ ໃນກໍຣະນີນີ້ພົບເຫັນ ເປັນຈຳນວນຫຼາຍ ເຊິ່ງຍັງບໍ່ສາມາດແກ້ໄຂໄດ້.

"ຢູ່ເຂດບ້ານນັ້ນ ບ້ານນີ້ ມັນກາຫຼາຍກ່ຽວກັບທີ່ດິນຫັ້ນ ເພິ່ນກາເວົ້າແລ້ວຫ້າມໃຫ້ຜູ້ປະກອບການ ຫຼືນັກທຸຣະກິດອອກເງິນກູ້ຢືມນອກຣະບົບ ຫ້າມປະຊາຊົນ ໃບແຈ້ງນີ້ບໍ່ມີສິດຊື້ ບໍ່ມີສິດຂາຍ ຫ້າມເອົາໄປມອບໂອນແລກປ່ຽນ ຫ້າມເອົາໄປຈຳກັບບຸກຄົນ ເວລາມີບັນຫາມາ ແລະ ມັນຍາກແນວນີ້ລະ ຄັນດຶງອຳນາດຣັຖ ເຂົ້າໄປແກ້ໄຂ ກໍ່ແກ້ໄຂໃນແງ່ກົດໝາຍ."

ກອງປະຊຸມສະໄໝສາມັນຄັ້ງທີ 7 ຂອງສະພາແຫ່ງຊາດ ຊຸດທີ 8 ເມື່ອເດືອນມິຖຸນາ ຜ່ານມາ ທ່ານ ສົມມາດ ພົນເສນາ ຣັຖມົນຕຣີກະຊວງ ຊັພຍາກອນທັມມະຊາດ ແລະ ສິ່ງແວດລ້ອມ ໄດ້ຣາຍງານວ່າ ກ່ຽວກັບການຄຸ້ມຄອງ ການອອກໃບຕາດິນ ແລະ ບັນຫາ ອອກໃບຕາດິນ ຊ້ຳຊ້ອນ ໃນໄລຍະຜ່ານມາ ແລະ ມາຕການແກ້ໄຂວ່າ ການຄຸ້ມຄອງທີ່ດິນໃນລາວ ແບ່ງອອກເປັນສາມໄລຍະ ຜ່ານການປະຕິບັດມາຮອດ ປັດຈຸບັນ ສາມາດອອກໃບຕາດິນໄດ້1.290.243 ຕອນ ແລະ ຂຶ້ນສຳມະໂນທີ່ດິນ ທົ່ວປະເທດ 3 ລ້ານປາຍຕອນ.

ອີງຕາມຂໍ້ມູນ ຈາກທະນາຄານແຫ່ງ ສປປ ລາວ ປັດຈຸບັນໃບຕາດິນ ຂອງນິຕິບຸກຄົນ ຫຼື ບຸກຄົນ ໄດ້ເອົາໄປຄ້ຳປະກັນ ການກູ້ຢືມ ຈາກ ທະນາຄານ ທຸຣະກິດ ຫຼື ສະຖານບັນການເງິນ ໃນຂອບເຂດທົ່ວປເທດ ມີທັງໝົດ 411.934 ຕອນ.

ຄໍາເຫັນ (1)
Share

(

ບັນຫາທີ່ດິນຢູ່ໃນລາວ ຈະບໍ່ແກ້ໄຂໄຫ້ມັນຕົກໄປໄດ້ຢ່າງເດັດຂາດ ແນ່ນອນຕາບໃດການປົກຄອງປະເທດ ຍັງເປັນການປົກຄອງແບບພະເດັດການຢູ່ ເພາະວ່າໃຜໆກໍຮູ້ນັບແຕ່ຂັ້ນເທີງລົງຮອດຂັ້ນລຸ່ມ ຂອງພັກຂອງລັດ ແມ່ນໄດ້ຮົບຮູ້ກັນໝົດເພາະພວກເພີ່ນ ໄຊ້ອໍານາດ ໄຊ້ບຸນຄຸນຂອງພັກຂອງລັດ ໄຊ້ບຸນຄຸນຂອງການປະຕິວັດມາແອບອ້າງ ແລະພວກພັກພວກລັດ ກໍໄຊ້ນະໂຍບາຍເຫຼົ່ານີ້ຕໍ່ພະນັກງານ ຂອງພັກຂອງລັດທົ່ວປະເທດ ຖ້າຜູ້ໄດຄອບຄົວໄດເຮັດການປະຕິວັດ, ຫຼືເຮັດການຕໍ່ສູ້ປົດປ່ອຍປະເທດຊາດມາ ຢາກໄດ້ເຮືອນຫຼັງໄດ, ດີນຕອນໄດ ທີ່ເຈົ້າຂອງບໍ່ຢູ່, ຫຼືໂຕນໜີໄປ, ພັກລັດກໍໄຫ້ພວກພະນັກງານປົດປ່ອຍຊາດ ເຂົ້າໄປຢູ່ ແລະຄອບຄອງເອົາເຮືອນ ເອົາດີນສ່ວນນັ້ນໄດ້ຕາມສະບາຍ ,ອັນນີ້ມັນເກີເຂື້ນມາຕັ້ງແຕ່ພວກເພີ່ນພາກັນເຂົ້າມາໄໝ່ໆພຸ້ນ ແລະຍັງມີມາຮອດປະຈຸບັນນີ້, ຂ້ອຍເອັງຍັງຈໍາໄດ້ດີ ແລະຍັງເຫັນກັນຢູ່ທຸກໆມື້, ຕົວຢ່າງຢູ່ຄຸ້ມທາດຂາວ, ເພີ່ນເຂົ້າມາທໍາອິດແຕ່ 30 ກ່າວປີພຸ້ນເພີ່ນບໍ່ໄດ້ມີຫຍັງເລີຍ ມີພໍ່ແມ່ແລະລູກ 3 ຄົນ ແລະເຫັນແຕ່ຜູ້ເປັນພໍ່ ພາຍແຕ່ປືນອາກາກະບອກດຽວ ແບະມາຮອດປະຈຸບັນນີ້ ມີທຸກຢ່າງມີດີນຢູ່ເຂດນອກເມືອງຫຼາຍຕອນ ມີບ້ານຫຼາຍຫຼັງມີລົດຫຼາຍຄັນ ມີໜ້າທີການງານ, ຂ້ອຍຈໍາໄດ້ເມື່ອເພີ່ນມາທໍາອິດ ພວກເພີ່ນຍັງບໍ່ເຂົ້າໃຈພາສາລາວວຽງຈັນເລີຍ, ມາປະຈຸບັນນີ້ກັບ 30 ກ່ວາປີຜ່ານມາ ມັນໄກກັນຫຼາຍແທ້ໆ, ຂ້ອຍປະຊາຊົນທໍາມະດາ ຢູ່ນີ້ມາ 60 ປີ ບໍ່ມີເຊື້ອສາຍປະຕິວັດ ກໍຢັງທຸກຢາກຢູ່ຄືເກົ່າ ຂີ່ແຕ່ລົດຖີບຄືເກົ່າ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Aug 29, 2019 05:31 AM

ເຕັມຫນ້າ