80 ຄອບຄົວ ຄອຍຄ່າຊົດເຊີຍ ເສຖກິຈ ພິເສດ ສວັນ-ເຊໂນ

ອຸ່ນແກ້ວ
2019-12-19
ອີແມວລ໌
ຄໍາເຫັນ
Share
ພິມ
ເຂດ ໂຮງງານ ອຸດສາຫະກັມ ສວັນ-ເຊໂນ
ເຂດ ໂຮງງານ ອຸດສາຫະກັມ ສວັນ-ເຊໂນ
ຮູບພາບຈາກ: ນັກຂ່າວພົລເມືອງ

ປະ​ຊາ​ຊົນ ປະ​ມານ​ 80 ຄອບ​ຄົວ ໃນ 8 ບ້ານ ທີ່​ໄດ້​ຮັບ ​ຜົລ​ກະ​ທົບ ​ຈາກໂຄງ​ການ ​ເຂດ​ເສ​ຖ​ກິຈ ​ພິ​ເສດ ສວັນ-ເຊ​ໂນ ຍັງ​ບໍ່​ໄດ້​ຮັບ ​ຄ່າ​ຊົດ​ເຊີຍ ​ທີ່​ດິນ ຂອງ​ເຂົາ​ເຈົ້າ ທີ່​ຖືກ​ໂຄງ​ການ ກວມ​ເອົາ ​ແຕ່​ປີ 2003.

ປະ​ຊາ​ຊົນ​ ຜູ້​ທີ່​ໄດ້​ຮັບ ​ຜົລກະ​ທົບ ໄດ້​ກ່າວ​ຕໍ່ ​ເອ​ເຊັຽ​ເສ​ຣີ ໃນ​ວັນ​ທີ 19 ທັນ​ວາ ວ່າ:

“ບ້ານ​ນາ​ທາດ, ບ້ານ​ໄຊ​ຍະ​ມຸງ​ຄຸນ ​ເນາະ, ບ້ານ​ຈອມ​ເພັດ, ບ້ານ​ເຊ​ໂນ, ບ້ານ​ໄຊ​ອຸ​ດົມ, ກໍ​ບໍ່​ຫຼາຍດອກ 3 ຄອບ​ຄົວ ເປັນ​ໄຮ່​ນາ​ຕໍ່​ກັນ​ນ່າ. ຖືກ​ເຂດ ​ເສ​ຖກິຈ ​ພິ​ເສດ ​ຈຸດ B ນີ້​ນ່າ. ແຕ່​ກ່ອນ​ ເພິ່ນ​ກໍ​ມາ, ເພິ່ນ​ກໍ​ຈະ ​ຊົດ​ເຊີຍ​ໃຫ້ ເພິ່ນ​ເວົ້າ​ຫັ້ນ​ນ່າ. ​ປະ​ຊາ​ຊົນ ກໍ​ຖ້າ​ຢູ່ ​ດຽວນີ້ ຍັງ​ບໍ່​ທັນ​ໄດ້​ຍິນ ​ຄຳ​ຕອບ​ ທາງ​ເທິງ​ເລີຍ ​ວ່າ​ ຈະ​ຊົດ​ເຊີຍ​ແບບ​ໃດ?”

ປະ​ຊາ​ຊົນ ​ທີ່​ໄດ້​ຮັບ ​ຜົລ​ກະ​ທົບ ທີ່ຍັງ​ບໍ່​ທັນ​ ໄດ້ຮັບ​ ຄ່າ​ຊົດ​ເຊີຍ ​ລວມ​ມີ ບ້ານ​ນາ​ທາດ 43 ຄອບ​ຄົວ, ບ້ານ​ຈອມ​ເພັດ 10 ຄອບ​ຄົວ, ບ້ານ​ໄຊ​ຍະ​ມຸ​ງ​ຄຸນ 9 ຄອບ​ຄົວ.

ສ່ວນວ່າ ​ບ້ານເຊ​ໂນ, ບ້ານ​ອຸ​ດົມ​ມີ​ໄຊ, ບ້ານ​ໄຊ​ອຸ​ດົມ, ບ້ານຈັນ​ທະ​ລັງ​ສີ, ບ້ານມະ​ນີ​ວົງ​ໄຊ ລວມ​​ທັງ​ໝົດ 20 ຄອບ​ຄົວ.

ທີ່​ຜ່ານ​ມາ, ເຈົ້າ​ໜ້າ​ທີ່ ​ເຄີຍ​ລົງ​ມາ ຮິບ​ໂຮມຂໍ້​ມູນ ນຳ​ຊາວ​ບ້ານ ໃນ​ປີ 2013-2014, ແຕ່​ຈົນ​ມາ​ເຖິງ ປັດ​ຈຸ​ບັນ ກໍ​ຍັງ​ບໍ່​ມີ​ ຄວາມ​ຄືບ​ໜ້າ​ ແນວ​ໃດ ກ່ຽວ​ກັບ​ເຣື້ອງນີ້. ດັ່ງ​ຊາວ​ບ້ານ ​ອີກ​ທ່ານ​ນຶ່ງ​ ໄດ້ກ່າວ​ຕໍ່ ​ເອ​ເຊັຽ​ເສ​ຣີ ວ່າ:

“ຄອບ​ຄົວ ທີ່​ຖືກ ​ຜົລ​ກະ​ທົບ​ຫັ້ນ ເພິ່ນ​ກໍ​ເອົາ ​ຂໍ້​ມູນ​ ໄປ​ຮຽບ​ຮ້ອຍ, ​ມີ​ບ້ານ​ນາ​ທາດ​ ແດ່ ​ເຊ​ໂນ ແດ່ ອັນ​ລວ​ມຢູ່​ໃນຫັ້ນ. ມັນ​ບໍ່​ແມ່ນ ​ດິນ​ປຸກ​ສ້າງ​ໄດ໋ ມັນ​ເປັນ​ດິນ ​ກະ​ສິ​ກັມ​, ເພິ່ນ​ເອົາ​ໄປ​ຕັ້ງ​ແຕ່ 2013-2014 ພຸ້ນ​ໄດ໋ ເພິ່ນ​ລົງ​ມາ​ເອົາ​ຂໍ້​ມູນ, ແຕ່​ດຽວນີ້ ​ເພິ່ນ​ກໍ​ຍັງ​ບໍ່​ມີ ​ການ​ຊົດ​ເຊີຍ ​ອີ່​ຫ​ຍັງ​ໃຫ້.”

ກ່ຽວ​ກັບ​ເຣື້ອງນີ້, ເຈົ້າ​ໜ້າ​ທີ່​ ເມືອງ​ອຸ​ທຸມ​ພອນ ກໍ​ຢາກ​ໃຫ້​ ຊາວ​ບ້ານ ​ໄດ້​ຮັບ​ຄ່າ​ຊົດ​ເຊີຍ, ດັ່ງ​ທ່ານ​ກ່າວ​ຕໍ່ ເອ​ເຊັຽ​ເສ​ຣີ ວ່າ:

“ເຮົາ​ກໍ​ຖາມ​ຢູ່ ເຫຕ​ຜົລ ​ຕໍ່​ການ​ຊ້າ ເປັນ​ຫ​ຍັງ​ເດ? ເພິ່ນ​ວ່າຈະ​ຊົດ​ເຊີຍບໍ່ ຫຼື ບໍ່​ຊົດ​ເຊີຍ ການ​ໂຄງ​ສ້າງບໍ່ ການ​ສ້າງ​ສາ ສ້າງໄປ​ເລີຍໆ​ໄດ໋​ ບາດນິ່​ນ່າ. ໂຕໄຮ່​ນາ​ ເຂົາ​ເຈົ້າ ກະ​ຍັງ​ບໍ່​ທັນໄດ້​ຄ່າ​ຊົດ​ເຊີຍໄດ໋. ​ກໍ​ເວົ້າ​ກັນ​ຢູ່​ ດຽວນີ້ ຈັກຊິ​ເຮັດແນວ​​ໃດ ກະຄາ. ຖ້າ​ຟັງ​ຄຳ​ຕອບ​ຂັ້ນ​ເທິງ.”

ໂຄງ​ການ​ເຂດ ​ເສ​​ຖກິຈ ​ພິ​ເສດ ສວັນ-ເຊ​ໂນ ມີ​ເນື້ອ​ທີ່​ ປະ​ມານ 1,000 ເຮັກ​ຕ້າ​ຣ໌ ເປັນ​ເຂດ ​ເສ​ຖ​ກິຈ​ ພິ​ເສດ ແຫ່ງ​ທຳ​ອິດ​ ຂອງ​ປະ​ເທດ​ລາວ. ເຣີ້ມ​ກໍ່​ສ້າງ ​ຕັ້ງ​ແຕ່ປີ 2003 ເປັນ​ຕົ້ນ​ມາ, ​ມູລ​ຄ່າການ​ລົງ​ທຶນ 74 ລ້ານ ໂດ​ລາຣ໌.

ຄໍາເຫັນ (1)
Share

(

You can wait, why can't you ?


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jan 02, 2020 06:07 AM

ເຕັມຫນ້າ