តុលាការ​ខេត្ត​រតនគិរី​គ្រោង​បើក​សវនាការ​រឿង​ឃាតកម្ម​អ្នក​កាសែត​វរជន​ខ្មែរ

តុលាការ​ខេត្ត​រតនគិរី គ្រោង​បើក​សវនាការ​ជា​ថ្មី​លើ​សំណុំ​រឿង​ឃាតកម្ម​អ្នក​សារព័ត៌មាន​វរជន​ខ្មែរ លោក ហង្ស សិរីឧត្តម នៅ​ថ្ងៃ​ទី២ ខែ​សីហា ខាង​មុខ​នេះ។ ព្រះរាជ​អាជ្ញា​រង​អម​តុលាការ​ខេត្ត​រតនគិរី លោក ជា សុភ័ក្រ ជា​អ្នក​ចោទ​ប្រកាន់​ក្នុង​រឿង​ក្តី​នេះ បាន​ធ្វើ​លិខិត​អញ្ជើញ​មេធាវី​ការពារ​ភាគី​ដើម​បណ្ដឹង កាល​ពី​ថ្ងៃ​ទី១០ ខែ​កក្កដា ដើម្បី​ចូលរួម​សវនាការ​នេះ។
ដោយ រដ្ឋា វិសាល
2013-07-11
អ៊ីម៉ែល
មតិ
Share
បោះពុម្ព
ពលរដ្ឋ​នាំ​គ្នា​មក​មើល​សាកសព​អ្នក​សារព័ត៌មាន "វីរជន​ខ្មែរ" លោក ហង្ស សិរីឧត្ដម ដែល​ត្រូវ​គេ​រក​ឃើញ​នៅ​ក្នុង​ឃ្លុប​ក្រោយ​រថយន្ត នា​ឃុំ​ចាអ៊ុង ស្រុក​អូរជុំ ខេត្ត​រតនគិរី នៅ​ថ្ងៃ​ទី​១១ ខែ​កញ្ញា ឆ្នាំ​២០១២។
ពលរដ្ឋ​នាំ​គ្នា​មក​មើល​សាកសព​អ្នក​សារព័ត៌មាន "វីរជន​ខ្មែរ" លោក ហង្ស សិរីឧត្ដម ដែល​ត្រូវ​គេ​រក​ឃើញ​នៅ​ក្នុង​ឃ្លុប​ក្រោយ​រថយន្ត នា​ឃុំ​ចាអ៊ុង ស្រុក​អូរជុំ ខេត្ត​រតនគិរី នៅ​ថ្ងៃ​ទី​១១ ខែ​កញ្ញា ឆ្នាំ​២០១២។
Adhoc Photo

មេធាវី​សមាគម​ការពារ​សិទ្ធិ​មនុស្ស​អាដហុក (ADHOC) លោក ហុក ផល្លា មាន​ប្រសាសន៍​បញ្ជាក់​ថា លោក​បាន​ទទួល​លិខិត​អញ្ជើញ​នោះ​ហើយ។ លោក​រំពឹង​ថា ក្រុម​ប្រឹក្សា​ជំនុំ​ជម្រះ​នៃ​តុលាការ​ខេត្ត នឹង​ធ្វើ​ការ​សម្រេច​ក្តី​លើក​ទី២ ជូន​កូន​ក្តី​លោក​ទទួល​បាន​យុត្តិធម៌​ត្រឹមត្រូវ៖ «ខ្ញុំ​ជឿ​ថា ក្រុម​ប្រឹក្សា​ជំនុំ​ជម្រះ លោក​នឹង​វិនិច្ឆ័យ​ឲ្យ​បាន​ច្បាស់​លាស់ ទាក់ទង​ទៅ​នឹង​ភស្តុតាង​ទាក់ទង​ទៅ​នឹង​ស៊ើប​អង្កេត​បន្ថែម​ថ្មីៗ ទៅ​លើ​ចម្លើយ​សាក្សី ហើយ​និង​ចម្លើយ​របស់​ក្រុម​គ្រួសារ​ជន​រងគ្រោះ ដែល​បាន​ឆ្លុះ​បង្ហាញ​ទៅ​លើ​ជន​សង្ស័យ​ទាំងអស់​ហ្នឹង ប្រហែល​ជា​គាត់​ពិចារណា​បាន​ច្បាស់​លាស់​ជាង​មុន។ ខ្ញុំ​ជឿ​ថា កូន​ក្តី​ខ្ញុំ នឹង​អាច​ទទួល​បាន​យុត្តិធម៌»

ក្រុម​ប្រឹក្សា​ជំនុំ​ជម្រះ​សាលា​ដំបូង​ខេត្ត​រតនគិរី លោក អ៊ី សុវណ្ណ កាល​ពី​ថ្ងៃ​ទី៣០ ខែ​មេសា កន្លង​ទៅ បាន​ចេញ​សាលក្រម​របៀប ឬ​ចាត់​របៀប​ឲ្យ​ស៊ើប​អង្កេត​បន្ថែម ទៅ​លើ​សំណុំ​រឿង​ក្តី​ចោទ​ប្រកាន់​មន្ត្រី​កង​រាជ​អាវុធហត្ថ លោក អ៊ាន ប៊ុនហេង ហៅ អេង និង​អ្នកស្រី ស៊ឹម ស្រីវ៉ី ជា​ភរិយា ពី​បទ​បាន​ប្រព្រឹត្ត​អំពើ​ឃាតកម្ម​គ្រោង​ទុក​ជា​មុន ទៅ​លើ​អ្នក​សារព័ត៌មាន​វរជន​ខ្មែរ។

អង្គហេតុ​ដែល​ក្រុម​ប្រឹក្សា​ជំនុំ​ជម្រះ​នៃ​តុលាការ​ខេត្ត​រតនគិរី ចាត់​ឲ្យ​ស៊ើប​សួរ​បន្ថែម រួម​មាន ឯកសារ​ផ្តល់​ដោយ​ក្រុមហ៊ុន​ទូរស័ព្ទ​ម៉ូប៊ីតែល (Mobitel) និង​ក្រុមហ៊ុន​មេហ្វហ្វូន (Metfone) ទាក់ទិន​លេខ​ទូរស័ព្ទ និង​ការ​ទំនាក់​ទំនង​តាម​ទូរស័ព្ទ​រវាង​ជន​ជាប់​ពាក់ព័ន្ធ​ក្នុង​រឿង​ក្តី។

សាក្សី​ជា​ជាង​រថយន្ត បំភ្លឺ​ពី​ឮ​សំឡេង​ស្រែក​ពី​ទីតាំង​សង្ស័យ​បង្ក​ហេតុ។ ចម្លើយ​បំភ្លឺ​របស់​ម្ចាស់​ភោជនីយដ្ឋាន​សាវាឌី ទាក់ទិន​ជន​សង្ស័យ​នាំគ្នា​ទៅ​ផឹក​ស៊ី​នៅ​ទីនោះ​នៅ​ថ្ងៃ​កើត​ហេតុ និង​ចម្លើយ​សាក្សី​ពាក់ព័ន្ធ​ជន​ជាប់​ចោទ និង​ជន​ជាប់​សង្ស័យ​ផ្សេង​ទៀត ដូច​ជា លោក សាត សឿង ហៅ សៀន ផែនដី មន្ត្រី​កង​រាជ​អាវុធហត្ថ​លោក គឺង សៀងឡៃ ជាដើម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល