ពលរដ្ឋ​នៅ​ប៉ៃលិន​ទាមទារ​ឲ្យ​តុលាការ​រក​យុត្តិធម៌​ដល់​ជន​សង្ស័យ​ក្នុង​ករណី​រំលោភ

ក្រុម​អ្នក​ភូមិ និង​មន្ត្រី​ការពារ​សិទ្ធិមនុស្ស ស្នើ​សុំ​ឲ្យ​តុលាការ​ខេត្ត​ប៉ៃលិន ពិចារណា​ឲ្យ​បាន​ត្រឹម​ត្រូវ​ មុន​ពេល​សម្រេច​ចោទ​ប្រកាន់​ជនសង្ស័យ ៣​នាក់ ដែល​សមត្ថកិច្ច​កង​រាជ​អាវុធហត្ថ​ចុះ​ទៅ​ចាប់​ដោយ​ចោទ​ថា បាន​សមគំនិត​ក្នុង​ករណី​ចាប់​រំលោភ​សេពសន្ថវៈ​លើ​ស្ត្រី​ម្នាក់​នៅ​ខេត្ត​ប៉ៃលិន។
ដោយ សួន សុផលមុន្នី
2013-02-25
អ៊ីម៉ែល
មតិ
Share
បោះពុម្ព

មន្ត្រី​កងរាជអាវុធហត្ថ​ខេត្ត​ប៉ៃលិន បាន​ចុះ​ទៅ​ចាប់​ខ្លួន​ប្រជាពលរដ្ឋ​ចំនួន​បី​នាក់។ ក្នុង​នោះ​មាន​ស្ត្រី​ពីរ​នាក់ ត្រូវ​គេ​ចោទ​ថា ជា​អ្នក​សមគំនិត​ដែល​នាំ​ឲ្យ​មាន​ការ​រំលោភ​សេពសន្ថវៈ និង​ក្មេង​ប្រុស​ម្នាក់​ទៀត ត្រូវ​គេ​ចោទ​ថា ​ជា​អ្នក​ប្រព្រឹត្ត​ផ្ទាល់​ក្នុង​ករណី​ចាប់​រំលោភ​ទៅ​លើ​ស្ត្រី​ម្នាក់​ជា​ប្រពន្ធ​ចុង​របស់​មន្ត្រី​ប៉ូលិស​ការពារ​ព្រំដែន​ម្នាក់​នៅ​ខេត្ត​ប៉ៃលិន។

ករណី​នេះ​​បាន​ធ្វើ​ឲ្យ​ក្រុម​អ្នក​ភូមិ​ប្រតិកម្ម​តវ៉ា​សុំ​ឲ្យ​ដោះលែង​មនុស្ស​ទាំង​បី​នោះ ដោយសារ​តែ​រឿង​នេះ​ពួក​គាត់​ដឹង​ថា ជា​ការ​មូល​បង្កាច់​ទម្លាក់​កំហុស​ដើម្បី​ផល​ប្រយោជន៍​អ្វី​មួយ។

សមត្ថកិច្ច​កងរាជអាវុធហត្ថ​ខេត្ត​ប៉ៃលិន កាល​ពី​ថ្ងៃ​ទី​២១ ខែ​កុម្ភៈ​ បាន​ចុះ​ទៅ​ចាប់​ខ្លួន​លោកស្រី កាក់ ពៅ និង​ស្ត្រី​ម្នាក់​ទៀត​ឈ្មោះ ចែ ស ដោយ​ចោទ​ថា ជា​អ្នក​សមគំនិត​នាំ​ឲ្យ​មាន​ការ​រំលោភ​សេពសន្ថវៈ។

លុះ​ដល់​ថ្ងៃ​ទី​២២ ខែ​កុម្ភៈ​ ប៉េអិម​បាន​ចុះ​ទៅ​ចាប់​ឈ្មោះ រិទ្ធ បូរិន អាយុ​ប្រហែល ២០​ឆ្នាំ​ ត្រូវ​ជា​កូន​ធម៌​របស់​លោកស្រី កាក់ ពៅ ដោយ​ចោទ​ថា ​ជា​អ្នក​ប្រព្រឹត្ត​ផ្ទាល់​ក្នុង​ការ​ចាប់​រំលោភ​ស្ត្រី​ម្នាក់​ឈ្មោះ រី ណាវី។ ប៉ុន្តែ​ក្រុម​អ្នក​ភូមិ​បាន​បដិសេធ​ចោល ដោយ​អះអាង​ថា ​ស្ត្រី​ឈ្មោះ រី ណាវី គឺ​ជា​អ្នក​រៀប​ចំ​ផែន​ការ​នេះ​ឡើង។

លោកស្រី ច័ន្ទ សោភណ្ឌភាព រស់​នៅ​ភូមិ​ផ្សារ​ព្រំ ឃុំ​ស្ទឹងកាច់ ស្រុក​សាលាក្រៅ ខេត្ត​ប៉ៃលិន។ លោក​បាន​រៀបរាប់​ថា នៅ​ព្រឹក​ថ្ងៃ​ទី​២១ ខែ​កុម្ភៈ​ ស្ត្រី​ឈ្មោះ រី ណាវី បាន​យក​សំបុត្រ​ខួប​​កំណើត​កូន​ ទៅ​ប្រាប់​ភ្ញៀវ។ នៅ​ពេល​ដល់​ផ្ទះ​ ចែ ស ស្រាប់​តែ​ឈ្មោះ រី ណាវី ក៏​បាន​ទៅ​ទិញ​ស្រាបៀ​កន្លះ​កេះ​បបួល​គេ​ឯង​ផឹក​ជាមួយ​គ្នា ដោយ​យល់​ឃើញ​ថា ម្ចាស់​ផ្ទះ​ឈ្មោះ ចែ ស នោះ ធ្លាប់​ត្រូវ​ជា​ម្ដាយ​ធម៌​ពី​មុន​មក។ ក្រោយ​ពី​ការ​ផឹក​ស្រាបៀ អស់​កន្លះ​កេះ​នោះ​រួច​មក ​ស្រាប់តែ​ឈ្មោះ រី ណាវី ស្រវឹង ហើយ​ លោកស្រី កាក់ ពៅ ក៏​ហៅ​ម៉ូតូ​ឲ្យ​ឌុប ជូន​ទៅ​ផ្ទះ​វិញ។

លោកស្រី ច័ន្ទ សោភណ្ឌភាព៖ «ដល់​ពេល​ទិញ​ញ៉ាំ កាក់ ពៅ ទៅ​តាម ក្រោយ ​ក៏​ញ៉ាំ​ជុំ​គ្នា​ពេល​នោះ ​ស្រាប់​តែ​ស្រវឹង ស្រវឹង​ទៅ ជន​ដើម​ចោទ​នោះ​គេ​ថា​ ស្រវឹង​ខ្លាំង ហើយ​គេ​ចង់​រក​ម៉ូតូ​ឌុប​ជិះ​ទៅ​ផ្ទះ កាក់ ពៅ ក៏​ហៅ​ម៉ូតូ​ឌុប​ដាក់ ហើយ​ក៏​អោប​ពី​ក្រោយ​ទៅ​ទៀត ទៅ​ដល់​កន្លែង​ផ្ទះ​សំណាក់ កាក់ ពៅ មិន​ដឹង​ថា ផ្ទះ​ជន​ដើម​ចោទ​នៅ​ត្រង់​ណា​ទេ»

សាក្សី​​ជា​អ្នក​រត់​ម៉ូតូ​ឌុប ឈ្មោះ ឡុង ឆេង បញ្ជាក់​ថា នៅ​ពេល​គាត់​ឌុប ឈ្មោះ រី ណាវី ទៅ​ផ្ទះ​នោះ​បែរ​ជា​គាត់​និយាយ​ថា រក​ផ្ទះ​ខ្លួន​ឯង​មិន​ឃើញ​ទៅ​វិញ។ ចំណុច​នេះ​អាច​ធ្វើ​ឲ្យ​គេ​សង្ស័យ​ថា ហេតុ​អ្វី​ ស្ត្រី​ឈ្មោះ រី ណាវី ទៅ​ប្រាប់​សំបុត្រ​ខួប​កំណើត​របស់​កូន ហើយ​សុខ​ចិត្ត​ទិញ​ស្រាបៀ​ឲ្យ​គេ​​ផឹក​នៅ​ពេល​ស្រវឹង​បែរ​ជា​ប្រាប់​ថា រក​ផ្ទះ​មិន​ឃើញ​ទៅ​វិញ។

លោក ឡុង ឆេង៖ «ពេល​យើង​ដឹក​ទៅ​ដល់​កន្លែង​ផ្លូវ​ផ្ទះ​វ៉ិកតូរីយ៉ា យើង​ដាក់​ចុះ​ហើយ គាត់​ថា​ អត់​ទេ គាត់​ធ្វើ​ស្រវឹង ឈរ​គ្រវី​ក្បាល។ ខ្ញុំ​សួរ​ថា បន្ទប់​នៅ​ណា ផ្ទះ​នៅ​ណា​ខ្ញុំ​ជូន​ទៅ? គាត់​ប្រាប់​ថា រក​ផ្ទះ​អត់​ឃើញ មិន​ដឹង​ផ្ទះ​នៅ​ណា​ទេ អ៊ីចឹង​មក​ដេក​ផ្ទះ​របស់ កាក់ ពៅ មក ដឹក​មក​ដល់​ដាក់​ចូល​នៅ​ផ្ទះ ហើយ​ខ្ញុំ​ក៏​ចេញ​ទៅ​វិញ​ទៅ»

ក្រុម​អ្នក​ភូមិ​បាន​អះអាង​ថា នៅ​ពេល​ស្នាក់​ផ្ទះ​របស់​លោកស្រី កាក់ ពៅ នោះ ស្រាប់​តែ​ឈ្មោះ រី ណាវី ដំបូង​បាន​ទូរស័ព្ទ​ទៅ​ប្រាប់​ប្ដី​ថា មាន​គេ​ចាប់​ជំរិត ក្រោយ​មក​កែ​ថា មាន​គេ​ចាប់​រំលោភ​វិញ។សមត្ថកិច្ច​កងរាជអាវុធហត្ថ ក៏​បាន​ចុះ​ទៅ​ចាប់​ឈ្មោះ កាក់ ពៅ មុន​គេ បន្ទាប់​មក​ចាប់​ឈ្មោះ ចែ ស និង​បន្ត​ទៅ​ចាប់​ឈ្មោះ រិទ្ធ បូរិន ដែល​ត្រូវ​ជា​កូន​ធម៌​របស់​ឈ្មោះ កាក់ ពៅ។

ក្រុម​អ្នកភូមិ ​បញ្ជាក់​ថា ​ឈ្មោះ រិទ្ធ បូរិន មាន​អាយុ​ក្រោម ២០​ឆ្នាំ ជា​ក្មេង​ស្លូតបូត​ត្រឹមត្រូវ ហើយ​នៅ​ថ្ងៃ​កើត​ហេតុ ក្មេង​ប្រុស​នោះ​មិន​ស្ថិត​នៅ​ក្នុង​ផ្ទះ​ទេ​ គឺ​គាត់​កំពុង​រៀន​ជួសជុល​ទូរស័ព្ទ​នៅ​ផ្ទះ​ក្បែរ​គ្នា​ក្នុង​ភូមិ៖ «បូរិន ក្មេង​ជំទង់ ស្លូត​បំផុត​នៅ​ក្នុង​ភូមិ។ អ្នក​ស្រុក​អ្នក​ភូមិ​ធ្វើ​សាក្សី​ឲ្យ​គ្រប់​គ្នា​ គាត់​នៅ​ធ្វើ​ទូរស័ព្ទ​ផ្ទះ​ជាង​ទូរស័ព្ទ​ទេ ប្រហែល​ជា ៧ ទៅ ៨​ម៉ែត្រ​ពី​ផ្ទះ​កើត​ហេតុ។ មុន​កើត​ហេតុ រិទ្ធ បូរិន ដេក​នៅ​ផ្ទះ​នោះ​មែន តែ​ដល់​មនុស្ស​ស្រវឹង​ទៅ វា​ដើរ​ចេញ​មក​ធ្វើ​ទូរស័ព្ទ​មក ​ខ្ញុំ​ក៏​បាន​ដើរ​ទៅ​ទិញ​កាត​ទូរស័ព្ទ​ រិទ្ធ បូរិន ហ្នឹង​ដែរ។ រឿង​នេះ​មិន​ពិត ក្លែង​បន្លំ​ទាំង​អស់ ​ចាប់​មនុស្ស​ទៅ​ខុស ​ក្លែង​បន្លំ​មក​ដេក​ផ្ទះ​គេ​ហើយ​ យក​ទុក្ខ​ទោស​ដាក់​ម្ចាស់​ផ្ទះ​គេ​អ៊ីចឹង ​ហើយ​មក​ចោទ​ថា ​មនុស្ស​ប្រុស​ហ្នឹង​ចាប់​រំលោភ ខ្ញុំ​សូម​បដិសេធ​ចោល ប្រជាពលរដ្ឋ​ច្រើន​ណាស់​ទៅ​ធ្វើ​សាក្សី​នៅ​កន្លែង​ប៉េអិម​ពី​ម្សិល ទៅ​ដល់​គេ​ដេញ​ចេញ​គេ​មិន​ឲ្យ​ចូល»

លោក ជា ប៊ុននឿន ជា​សាក្សី​ម្នាក់​ទៀត​អះអាង​ថា នៅ​ពេល​ស្ត្រី​ឈ្មោះ រី ណាវី ស្នាក់​នៅ​ផ្ទះ​របស់​លោកស្រី កាក់ ពៅ ឈ្មោះ រិទ្ធ បូរិន ​ដែល​គេ​ចោទ​ប្រកាន់​នោះ ​កំពុង​រៀន​ជួសជុល​ទូរស័ព្ទ​នៅ​ផ្ទះ​អ្នក​ភូមិ​ក្បែរ​គ្នា។

លោក នឿន អះអាង​ថា រិទ្ធ បូរិន មិន​បាន​ប្រព្រឹត្ត​ដូច​ការ​ចោទ​ប្រកាន់​នោះ​ឡើយ៖ «រិន ហ្នឹង​នៅ​រៀន​ធ្វើ​ទូរស័ព្ទ គ្នា​ជា​ក្មេង មិន​ដឹង​អី​គ្នា។ រឿង​នេះ​ជា​រឿង​ចោទ​ប្រកាន់​ដើម្បី​ជំរិត​យក​លុយ​យក​កាក់ ជា​រឿង​អយុត្តិធម៌ ហើយ​ឥឡូវ​នេះ​ប្រជាពលរដ្ឋ​បំណង​ថា ​នឹង​ផ្ដិត​មេដៃ​ធ្វើ​បាតុកម្ម​ឡើង​ទៅ​ថ្នាក់​លើ ឥឡូវ​គេ​កំពុង​ផ្ដិត​មេដៃ​ដែល​ស្គាល់​ឈ្មោះ រិន ហ្នឹង​ ជា​មនុស្ស​ល្អ វា​ដូច​អយុត្តិធម៌​ពេក»

វិទ្យុ​អាស៊ី​សេរី នៅ​ពុំ​អាច​ទាក់ទង​លោក រី ណាវី ដែល​ជា​ភាគី​ដើម​ចោទ​ដើម្បី​បញ្ជាក់​បន្ថែម​ជុំវិញ​បញ្ហា​នេះ​បាន​ទេ។ ចំណែក​ឯ ជុំ សែនសទ្ធា ព្រះរាជ​អាជ្ញា​អម​សាលា​ដំបូង​ខេត្ត​ប៉ៃលិន បដិសេធ​មិន​លើក​ទូរស័ព្ទ​ធ្វើ​អត្ថាធិប្បាយ​ជុំ​វិញ​បញ្ហា​នេះ​ឡើយ។

អ្នក​សម្រប​សម្រួល​អង្គការ​សិទ្ធិ​មនុស្ស​អាដហុក ប្រចាំ​ខេត្ត​ប៉ៃលិន អ្នកនាង ប្រាក់ សុភិមា បាន​ថ្លែង​ថា យើង​យល់​ឃើញ​ថា នៅ​ក្នុង​រឿង​នេះ​មាន​ភាព​មិន​ប្រក្រតី​ច្រើន។

ចំណុច​ទី​១ តាម​ផ្លូវ​ច្បាប់​ បើ​សិន​គេ​​ចាប់​ជន​សង្ស័យ​ដែល​ជា​អ្នក​សមគំនិត​បាន លុះ​ត្រា​ចាប់​ជន​សង្ស័យ​ជា​ចារី​បាន​ជា​មុន​សិន ប៉ុន្តែ​នេះ​បែរ​ជា​ចាប់​ជន​សង្ស័យ​ដែល​ជា​អ្នក​សមគំនិត​មុន​ជនសង្ស័យ​ដែល​ជា​ចារី​វិញ។ នេះ​ប្រសិន​បើ​មាន​ករណី​បទ​ល្មើស​កើត​ឡើង​មែន​នោះ។ ចំណុច​គួរ​ឲ្យ​គត់​សម្គាល់​មួយ​ទៀត គឺ​ថា​ នៅ​ក្រោយ​រយៈ​ពេល ២៤​ម៉ោង​ និង ៣៦​ម៉ោង​ ក្រោយ​ពី​ការ​ចាប់​ខ្លួន ​សមាគម​អាដហុក បាន​ព្យាយាម​សុំ​ការ​អនុញ្ញាត​ពី​សមត្ថកិច្ច​ប៉េអិម ដើម្បី​ធ្វើការ​ជួប​សម្ភាសន៍​ជា​មួយ​ជន​ សង្ស័យ​ដែល​គេ​ចោទ​ថា ជា​ជន​សមគំនិត ប៉ុន្តែ​សមត្ថកិច្ច​មិន​អនុញ្ញាត​ឲ្យ​អាដហុក ជួប​ទេ ដោយ​បញ្ជាក់​ថា ​ចាំ​ជួប​នៅ​តុលាការ។

អ្នកនាង ប្រាក់ សុភិមា៖ «...នេះ​គឺ​ជា​ការ​ចាប់​ខ្លួន​ខុស​នីតិវិធី។ ឲ្យ​តុលាការ​ធ្វើការ​ពិចារណា​ឲ្យ​បាន​ល្អិតល្អន់​ចំពោះ​បញ្ហា​ហ្នឹង​ ព្រោះ​ធម្មតា​ យើង​ចង់​ឲ្យ​មាន​យុត្តិធម៌​ចំពោះ​ជន​រង​គ្រោះ​ដែល​ពិត​ប្រាកដ ព្រោះ​បើ​សិន​ជា​មាន​បទល្មើស​ឧក្រិដ្ឋ​ មិន​មែន​ឃុំ​មួយ​ថ្ងៃ​ ឬ​ក៏​មួយ​ខែ​នោះ​ទេ អ៊ីចឹង​បើ​សិន​ជា​រឿង​ហ្នឹង​ជា​រឿង​ចោទ​ប្រកាន់ វា​អត់​មាន​យុត្តិធម៌​សម្រាប់​អ្នក​ជាប់​ឃុំ​ទេ»

ជន​សង្ស័យ​ទាំង​បី​នាក់ បច្ចុប្បន្ន​ត្រូវ​គេ​ឃុំ​ខ្លួន​ទី​បញ្ជា​ការដ្ឋាន​កងរាជអាវុធហត្ថ​ខេត្ត​ប៉ៃលិន។ ក្រុម​អ្នក​ភូមិ​អះអាង​ថា​ ពួកគាត់​នឹង​លើក​គ្នា​ធ្វើការ​តវ៉ា​នៅ​ពេល​ខាង​មុខ​នេះ​ទៀត​ ដើម្បី​សុំ​ដោះលែង​លោកស្រី កាក់ ពៅ និង​ក្មេង​ប្រុស​ឈ្មោះ ​រិទ្ធ បូរិន។ ករណី​នេះ ​ពួកគាត់​យល់​ថា ភាគី​ដើម​ចោទ​ជា​អ្នក​រៀបចំ​គម្រោង​ទម្លាក់​កំហុស​ដើម្បី​ចាប់​ខ្លួន​មនុស្ស​ទាំង​បំពាន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល