តើ​ទារក​ដែល​មាន​ម្ដាយ​ឬ​ឪពុក​រៀប​ការ​ជាមួយ​ជន​បរទេស​អាច​ទទួល​សញ្ជាតិ​ខ្មែរ​ឬ​ទេ?

ច្បាប់​នៅ​ប្រទេស​កម្ពុជា បាន​ចែង​អំពី​ការ​ការពារ​សញ្ជាតិ​ខ្មែរ ចំពោះ​ពលរដ្ឋ​ទាំងអស់ និង​មាន​ទាំង​ការ​បើក​ចំហ ដើម្បី​ទទួល​យក​ជន​បរទេស​ចូល​សញ្ជាតិ​ខ្មែរ​ទៀត​ផង។ មាន​ប្រជាពលរដ្ឋ​ខ្មែរ​ខ្លះ​មាន​ស្វាមី ឬ​ភរិយា​ជា​ជន​បរទេស ហើយ​នៅ​ពេល​មាន​កូន​មក ពួក​គាត់​មិន​ដឹង​ថា តើ​កូន​របស់​គាត់​អាច​ទទួល​បាន​សញ្ជាតិ​ខ្មែរ​បាន​ឬ​អត់?
ដោយ កែវ និមល
2013-09-03
អ៊ីម៉ែល
មតិ
Share
បោះពុម្ព
ទារក​ដែល​ទើប​នឹង​សម្រាល​ហើយ នៅ​មន្ទីរពេទ្យ​ឯកជន​មួយ នា​រាជធានី​ភ្នំពេញ។
ទារក​ដែល​ទើប​នឹង​សម្រាល​ហើយ នៅ​មន្ទីរពេទ្យ​ឯកជន​មួយ នា​រាជធានី​ភ្នំពេញ។
Photo: RFA

នៅ​ក្នុង​សម័យ​បច្ចុប្បន្ន ដោយសារ​ប្រទេស​កម្ពុជា ប្រកាន់​របប​នយោបាយ​សេរី មាន​ប្រជាពលរដ្ឋ​ខ្មែរ​ប្រុស​ស្រី​ជាច្រើន​នាក់ បាន​រៀប​ការ​ជាមួយ​ជន​បរទេស។ ការ​រៀប​ការ​ជាមួយ​ជន​បរទេស​នោះ ច្បាប់​នៅ​ប្រទេស​កម្ពុជា មិន​បាន​ហាម​ប្រាម​ឡើយ គឺ​មាន​ការ​លើក​ទឹក​ចិត្ត​ទៀត​ផង ប៉ុន្តែ​ត្រូវ​មាន​លក្ខខណ្ឌ​មួយ​ចំនួន ដែល​ត្រូវ​គោរព​តាម និង​បំពេញ។

ការ​រៀប​ការ​ជាមួយ​ជន​បរទេស គឺ​មាន​នារី​ខ្មែរ​ខ្លះ​បាន​កសាង​គ្រួសារ មាន​កូន​ជាមួយ​ជន​បរទេស​នោះ​ទៀត​ផង។ ប៉ុន្តែ មាន​នារី​ខ្មែរ​ខ្លះ ដែល​រៀប​ការ​ជាមួយ​ជន​បរទេស មាន​ចម្ងល់​ទាក់ទង​ជាមួយ​កូន​របស់​នាង ដែល​កើត​មក​នោះ តើ​អាច​មាន​សញ្ជាតិ​ខ្មែរ​ឬ​ទេ? សូម​ស្តាប់​ចម្ងល់​របស់​នារី​ខ្មែរ​មួយ​រូប​ឈ្មោះ ឆែម ដាលីន ដែល​មាន​ស្វាមី​ជា​ជន​បរទេស ហើយ​ចង់​ធ្វើ​សំបុត្រ​កំណើត​សញ្ជាតិ​ខ្មែរ ឲ្យ​កូន​ដែល​កើត​មក​នោះ។

សំណួរ​របស់​មិត្ត​អ្នក​ស្តាប់​នេះ បាន​សរសេរ​ជា​សារ​អេឡិចត្រូនិក​ផ្ញើ​មក​វិទ្យុ​អាស៊ីសេរី ហើយ​អាន​ដោយ​អ្នក​ធ្វើ​ការ​នៅ​វិទ្យុ​អាស៊ីសេរី ដូច​ត​ទៅ៖ «នាង​ខ្ញុំ​ឈ្មោះ ឆែម ដាលីន មាន​សំណួរ​ខ្លះ​អំពី​ការ​ធ្វើ​សំបុត្រ​កំណើត​អោយ​កូន​របស់​ខ្ញុំ។ នាង​ខ្ញុំ​បាន​រៀប​ការ​នៅ​ស្រុក​ខ្មែរ តែ​មិន​បាន​ចុះ​អេតាស៊ីវិល​នៅ​ខ្មែរ​ទេ។ ពេល​នេះ នាង​ខ្ញុំ​មាន​បុត្រ​ជាមួយ​ប្ដី​បរទេស ដោយ​បាន​ប្រសូត​កូន​នៅ​ឯ​បរទេស​ផង​ដែរ។ ដោយ​ស្ថានភាព​រស់នៅ​ស្រុក​គេ​ពិបាក​សម្រាប់​នាង​ខ្ញុំ ក៏​សម្រេច​មក​រស់នៅ​ស្រុក​ខ្មែរ​វិញ។ តើ​កូន​របស់​ខ្ញុំ​អាច​ធ្វើ​សំបុត្រ​កំណើត​នៅ​ខ្មែរ​ទេ? ពីព្រោះ នាង​ខ្ញុំ​ចង់​អោយ​កូន​នាង​ខ្ញុំ​រស់នៅ​ជាមួយ និង​បាន​ចូល​រៀន​នៅ​ស្រុក​ខ្មែរ។ ពី​នាង​ខ្ញុំ ដាលីន»

ឆ្លើយ​តប​ចំពោះ​ចម្ងល់​មិត្ត​អ្នក​ស្តាប់​នេះ លោក សុក សំអឿន ជា​មេធាវី និង​ជា​នាយក​អង្គការ​ក្រុម​អ្នក​ច្បាប់​ការពារ​សិទ្ធិ​កម្ពុជា បាន​ពន្យល់​ថា កូន​ដែល​កើត​មក​ពី​ម្តាយ​ដែល​មាន​សញ្ជាតិ​ខ្មែរ​នោះ អាច​ទទួល​បាន​សញ្ជាតិ​ខ្មែរ​បាន។

លោក សុក សំអឿន បាន​ពន្យល់​ទៀត​ថា បើ​សិន​ជា​កូន​នោះ​កើត​នៅ​បរទេស ក្មេង​នោះ​អាច​ទទួល​បាន​សញ្ជាតិ​២ គឺ​សញ្ជាតិ​ខ្មែរ​ផង និង​សញ្ជាតិ​ប្រទេស​ដែល​ក្មេង​នោះ​កើត​ផង។

ច្បាប់​ស្ដីពី​សញ្ជាតិ​របស់​ប្រទេស​កម្ពុជា ក្នុង​ជំពូក​ទី២ អំពី​សញ្ជាតិ​ខ្មែរ​ពី​កំណើត មាត្រា​៤ បាន​ចែង​ថា ទី១ ត្រូវ​បាន​សញ្ជាតិ​ខ្មែរ ទោះ​បី​កើត​នៅ​ទីណា​ក៏ដោយ កូន​មាន​ខាន់ស្លា​ដែល​កើត​មក​ពី​ឪពុក ឬ​ម្តាយ​មាន​សញ្ជាតិ​ខ្មែរ ឬ​កូន​ឥត​ខាន់ស្លា ដែល​កើត​មក​ពី​ឪពុក ឬ​ម្តាយ មាន​សញ្ជាតិ​ខ្មែរ​ទទួល​ស្គាល់ ឬ​កូន​ដែល​មាន​ឪពុក​ម្តាយ​មិន​ទទួល​ស្គាល់ កាល​បើ​តុលាការ​បាន​ចេញ​សាលក្រម​ថា កូន​នោះ​ពិត​ជា​កើត​ចេញ​ពី​ឪពុក ឬ​ម្តាយ​ដែល​មាន​សញ្ជាតិ​ខ្មែរ។ ទី២ ត្រូវ​បាន​សញ្ជាតិ​ខ្មែរ ដោយ​កើត​នៅ​ក្នុង​ព្រះរាជាណាចក្រ​កម្ពុជា ក). កូន​ដែល​កើត​ពី​ឪពុក និង​ម្តាយ​បរទេស ដែល​កើត និង​រស់នៅ​ស្រប​ច្បាប់​ក្នុង​ព្រះរាជាណាចក្រ​កម្ពុជា និង ខ). កូន​កើត​ពី​ឪពុក​ម្តាយ​មិន​ស្គាល់ និង​កូន​ទើប​នឹង​កើត​ដែល​គេ​រើស​បាន​នៅ​ក្នុង​ព្រះរាជាណាចក្រ​កម្ពុជា ត្រូវ​ចាត់​ទុក​ថា កើត​ក្នុង​ព្រះរាជាណាចក្រ​កម្ពុជា ដែរ។

មាត្រា២ នៃ​ច្បាប់​ស្ដីពី​សញ្ជាតិ បាន​ចែង​ថា ជន​ណា​មាន​សញ្ជាតិ​ខ្មែរ​ជា​ប្រជាពលរដ្ឋ​ខ្មែរ។ ប្រជាពលរដ្ឋ​ខ្មែរ មិន​អាច​ត្រូវ​បាន​ដក​សញ្ជាតិ និរទេស ឬ​ត្រូវ​ចាប់​ខ្លួន​ទៅ​ឲ្យ​ប្រទេស​ក្រៅ​ណា​មួយ​ឡើយ លើក​លែង​តែ​មាន​កិច្ច​ព្រមព្រៀង​ជាមួយ​គ្នា​ទៅ​វិញ​ទៅ​មក។

ចំពោះ​បុរស ឬ​ស្ត្រី​បរទេស​ដែល​ចង់​បាន​សញ្ជាតិ​ខ្មែរ តាម​រយៈ​ការ​រៀប​អាពាហ៍ពិពាហ៍ គឺ​អាច​ទទួល​បាន។ មាត្រា​៥ នៃ​ច្បាប់​ស្ដីពី​សញ្ជាតិ បាន​ចែង​ថា ស្ត្រី ឬ​បុរស​បរទេស​ដែល​យក​ប្ដី ឬ​ប្រពន្ធ​ខ្មែរ ដោយ​មាន​រៀប​អាពាហ៍ពិពាហ៍ អាច​ទាមទារ​សញ្ជាតិ​ខ្មែរ​បាន លុះ​ណា​តែ​បុរស ឬ​ស្ត្រី​នោះ​រស់នៅ​ជាមួយ​គ្នា​រយៈពេល ៣​ឆ្នាំ ក្រោយ​ពេល​ចុះ​សំបុត្រ​អាពាហ៍ពិពាហ៍។ បែបបទ និង​នីតិវិធី​នៃ​ការ​ទាមទារ​សញ្ជាតិ​ខ្មែរ ត្រូវ​កំណត់​ដោយ​អនុក្រឹត្យ។ ការ​ផ្តល់​សញ្ជាតិ​ខ្មែរ​តាម​ករណី​ទាមទារ​សញ្ជាតិ ត្រូវ​សម្រេច​ដោយ​ព្រះរាជក្រឹត្យ។ មាត្រា​៦ បាន​ចែង​ថា ប្រជាពលរដ្ឋ​ខ្មែរ​មិន​បាត់​សញ្ជាតិ​ខ្មែរ ដោយសារ​ការ​រៀប​អាពាហ៍ពិពាហ៍​ជាមួយ​ជន​បរទេស​ទេ។

ចំពោះ​ទោស​បញ្ញត្តិ​ទាក់ទង​ជាមួយ​ការ​ក្លែង​បន្លំ​សញ្ជាតិ​ខ្មែរ​វិញ មាត្រា​១៩ បាន​ចែង​ថា មាន​តែ​ប្រជាពលរដ្ឋ​ខ្មែរ​ទេ​ទើប​មាន​សិទ្ធិ​ទទួល និង​កាន់​កាប់​អត្តសញ្ញាណប័ណ្ណ​សញ្ជាតិ​ខ្មែរ និង​លិខិត​ឆ្លង​ដែន​នៃ​ព្រះរាជាណាចក្រ​កម្ពុជា។ ហើយ​ជន​បរទេស​ណា​ដែល​កាន់​កាប់ និង​ប្រើប្រាស់​អត្តសញ្ញាណប័ណ្ណ​សញ្ជាតិ​ខ្មែរ ឬ​លិខិត​ឆ្លង​ដែន​នៃ​ព្រះរាជាណាចក្រ​កម្ពុជា ត្រូវ​ផ្ដន្ទាទោស​ដាក់​ពន្ធនាគារ​ពី ៥​ឆ្នាំ ដល់ ១០​ឆ្នាំ តាម​មាត្រា​២០។ ចំណែក​មាត្រា​២១ បាន​ចែង​ថា ជន​ណា​ដែល​ក្លែង​ធ្វើ​ការ​កោស​លុប សរសេរ​ត្រួត ឬ​ឲ្យ​គេ​ខ្ចី ឬ​សរសេរ​ឈ្មោះ​ក្លែង​ក្លាយ​នៅ​ក្នុង​អត្តសញ្ញាណប័ណ្ណ​សញ្ជាតិ​ខ្មែរ ឬ​លិខិត​ឆ្លង​ដែន​នៃ​ព្រះរាជាណាចក្រ​កម្ពុជា ឬ​មួយ​ប្រើប្រាស់​ឯកសារ​ទាំង​នោះ ត្រូវ​ផ្ដន្ទាទោស​ដាក់​ពន្ធនាគារ​ពី ៥​ឆ្នាំ ដល់ ១០​ឆ្នាំ។

លោក​អ្នក​ស្តាប់​ជា​ទី​មេត្រី បើ​លោក​អ្នក​មាន​ចម្ងល់​ផ្សេងៗ ទាក់ទង​រឿង​ច្បាប់ លោក​អ្នក​អាច​ទូរស័ព្ទ​មក​សាកសួរ​តាម​លេខ ០១៦ ២៦ ១២ ៧៣៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (4)
Share

អ្នក​អាន​អនាមិក

My wife is US citizen. I am Canadian. After we married, we moved to Toronto, Canada. We have two children born in Canada. They are Canadian citizen but they also obtained US citizen as children born abroad, to my wife.
They hold both passport, Canadian's an US.

Sep 03, 2013 02:16 PM

heanmam@sbcglobal.net

ពី Joliet,IL 60435

Dear RFA friends.
It's very interesting.
Of course, I am originally nationality Cambodia. Born in Cambodia.
When I arrived and lived in the US, 5 years later, I applied and became a US.Citizen, but I am still clearly speaking and writing in Khmer language.
When I went back home, they called me "Alien".
How should I do in claiming back my original nationality, if I want to buy home, land, etc..to be my legal assets in Cambodia ?.
Thank you for kindly answer.

Hean Mam

Sep 03, 2013 01:42 PM

អ្នក​អាន​អនាមិក

ទារកដែលកើតចេញពីឳពុកឬម្តាយដែលជាជនបរទេសកើតនៅស្រុកខ្មែមានសញ្ជាតិជាខ្មែរ។

Sep 03, 2013 07:55 AM

អ្នក​អាន​អនាមិក

អាចបាន

Sep 03, 2013 06:30 AM

គេហទំព័រ​ទាំងមូល