សង្គម​ស៊ីវិល​ស្នើ​ឲ្យ​ចាត់​ការ​ម្ចាស់​បុរី​សុភមង្គល​ករណី​ប្រើ​ហិង្សា

ដោយ សុ ជីវី
2013-03-22
អ៊ីម៉ែល
មតិ
Share
បោះពុម្ព

អង្គការ​មិន​មែន​រដ្ឋាភិបាល​ចំនួន​៤ ធ្វើ​ការងារ​ផ្នែក​លើក​កម្ពស់​ការ​គោរព​សិទ្ធិ​ស្ត្រី ជំរុញ​រដ្ឋាភិបាល ប្រព័ន្ធ​តុលាការ និង​ស្ថាប័ន​ពាក់ព័ន្ធ ចាត់​វិធានការ​បន្ទាន់​ដើម្បី​ផ្ដល់​យុត្តិធម៌​ដល់​ក្មេង​ស្រី ២​នាក់​ជា​ជន​រងគ្រោះ​ដោយ​ការ​រំលោភ​បំពាន​សិទ្ធិ​នៅ​ពេល​ពួក​គេ​ធ្វើ​ជា​អ្នក​បម្រើ​តាម​ផ្ទះ។

ការ​ជំរុញ​នេះ ធ្វើ​ឡើង​នៅ​ពេល​ក្មេង​ស្រី​រង​គ្រោះ​ទាំង​ពីរ​នាក់ ដែល​អះអាង​ថា ត្រូវ​បាន​វាយ​ដំ​ពី​សំណាក់​គ្រួសារ​ឧកញ៉ា វ៉េង លីតិចឡាយ កំពុង​រស់​ក្នុង​ភាព​ភ័យ​ខ្លាច និង​បារម្ភ​ចំពោះ​សុវត្ថិភាព​នៅ​ពេល​អ្នក​ដែល​បាន​ធ្វើ​ទារុណ​កម្ម​លើ​រាងកាយ​ពួក​គេ​នោះ ទំនង​បាន​គេច​ខ្លួន។

អង្គការ​មិន​មែន​រដ្ឋាភិបាល​ចំនួន​៤ ហៅ​ការ​ប្រើប្រាស់​ហិង្សា​លើ​ក្មេង​ស្រី​ជា​អ្នក​បម្រើ​តាម​ផ្ទះ ប្រព្រឹត្ត​ដោយ​គ្រួសារ​ឧកញ៉ា​ម្ចាស់​បុរី​វិមាន​សុភមង្គល ថា​ជា​ករណី​រំលោភ​សិទ្ធិ​មនុស្ស​ធ្ងន់ធ្ងរ។

មន្ត្រី​អង្គការ​ទាំង​នោះ​បាន​ទាមទារ​ឲ្យ​រដ្ឋាភិបាល​ចាត់​វិធាន​ការ​បន្ទាន់ ដើម្បី​នាំ​ជន​ល្មើស​មក​ផ្ដន្ទាទោស និង​បញ្ចប់​ភាព​ភ័យ​ខ្លាច​របស់​ជន​រង​គ្រោះ។

សេចក្ដី​ថ្លែងការណ៍​រួម​ចេញ​ថ្ងៃ​ទី២២ ខែ​មីនា ឲ្យ​ដឹង​ថា ពួក​គេ​ព្រួយ​បារម្ភ​ពី​សុវត្ថិភាព​ក្មេង​ស្រី និង​ក្រុម​គ្រួសារ ព្រោះ​ឧកញ៉ា វ៉េង លីតិចឡាយ ដែល​មាន​ប្រពន្ធ​ឈ្មោះ លី ពៅ ជា​ម្ចាស់​បុរី​វិមាន​សុភមង្គល ព្យាយាម​ចរចា​គំរាម​កំហែង​ជន​រងគ្រោះ និង​ក្រុម​គ្រួសារ ឲ្យ​ដោះស្រាយ​ករណី​នេះ​ក្រៅ​ប្រព័ន្ធ​តុលាការ។ ករណី​នេះ អង្គ​ការ​ទាំង​បួន​ស្នើ​ឲ្យ​តុលាការ​ចាត់​ការ​តាម​ច្បាប់ ដោយ​គោរព​នូវ​រាល់​បញ្ញត្តិ​ដែល​មាន​ចែង​ក្នុង​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា អនុសញ្ញា​អន្តរជាតិ​ផ្សេងៗ។

នាយិកា​ប្រតិបត្តិ​អង្គការ​យេនឌ័រ និង​អភិវឌ្ឍន៍​ដើម្បី​កម្ពុជា (GAD/C) និង​ជា​អគ្គលេខាធិការដ្ឋាន​នៃ​បណ្ដាញ​យេនឌ័រ និង​អភិវឌ្ឍន៍ អ្នកស្រី រស់ សុភាព មាន​ប្រសាសន៍​ថា សង្គម​ស៊ីវិល​ព្រួយ​បារម្ភ​ពី​សុវត្ថិភាព​ជន​រងគ្រោះ ព្រោះ​ប្រពន្ធ​លោក​ឧកញ៉ា​នោះ​មិន​ព្រម​ចូល​ទៅ​បំភ្លឺ​តាម​ដីកា​កោះ​ហៅ​របស់​តុលាការ​ទេ។ អ្នកស្រី​បន្ត​ថា ដើម្បី​រក​យុត្តិធម៌​ដល់​ជន​រង​គ្រោះ ចាំ​បាច់​ត្រូវ​តុលាការ​ពន្លឿន​ដំណើរ​ការ​សំណុំ​រឿង​នេះ។

ក្មេង​ស្រី​រង​គ្រោះ ២​នាក់ ដែល​ម្នាក់​មាន​អាយុ ១៧​ឆ្នាំ និង​ម្នាក់​ទៀត​មាន​អាយុ ២៥​ឆ្នាំ បាន​ប្ដឹង​ឧកញ៉ា វ៉េង លីតិចឡាយ និង​ប្រពន្ធ​ឈ្មោះ លី ពៅ ថា​បាន​វាយ​ដំ​ធ្វើ​បាប​លើ​រូប​រាង​កាយ​ពួក​គេ​អស់​រយៈពេល​ប្រមាណ ១០​ឆ្នាំ​មក​ហើយ និង​បណ្ដាល​ឲ្យ​មាន​របួស​ស្ទើរ​ពេញ​រាង​កាយ។ នៅ​ក្រោយ​ពេល​គេច​ខ្លួន​ចេញ​ពី​ផ្ទះ​ឧកញ៉ា វ៉េង លីតិចឡាយ កាល​ពី​ខែ​កុម្ភៈ ក្មេង​ស្រី​ទាំង​ពីរ​បាន​ប្រាប់​នគរបាល​ពី​អំពើ​ហិង្សា និង​បង្ហាញ​ស្នាម​ដាច់ ស្នាម​ជាំ​នៅ​លើ​ខ្នង និង​ភ្លៅ។

មេធាវី​ការពារ​ជន​រងគ្រោះ​នៃ​អង្គការ​ស៊ើប​អង្កេត​អាស៊ី ដើម្បី​សកម្មភាព​សង្គម និង​មនុស្សធម៌ (SISHA) កញ្ញា អ៊ុង ចក្រដេត បាន​អោយ​ដឹង​ថា នៅ​ពេល​នេះ​ក្មេង​ស្រី​ទាំង​២ កំពុង​ស្នាក់នៅ​ទី​កន្លែង​មាន​សុវត្ថិភាព។ ចក្រដេត បន្ត​ថា ពួក​គេ​នឹង​ត្រូវ​ចូល​ទៅ​បំភ្លឺ​នៅ​សាលា​ដំបូង​រាជធានី​ភ្នំពេញ នៅ​ថ្ងៃ​ទី២៧ ខែ​មីនា។

ក្រុម​អង្គការ​ដែល​បាន​ចេញ​សេចក្ដី​ថ្លែង​ការណ៍​រួម ដើម្បី​ស្វែង​រក​យុត្តិធម៌​សម្រាប់​ក្មេង​ស្រី​រង​គ្រោះ​នេះ រួម​មាន​បណ្ដាញ​យេនឌ័រ និង​អភិវឌ្ឍន៍ សកម្ម​យុវនារី​កម្ពុជា​លើ​កិច្ចការ​អាស៊ាន (CYWA) ខេម​អាស៊ាន (CamASEAN) និង​បណ្ដាញ​ពង្រឹង​សិទ្ធិ​អំណាច​ស្ត្រី​វ័យក្មេង​នៅ​កម្ពុជា (CYWEN)៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

Why it happen to this Oknha family. What is the benefit for them? If they are not happy, why don't they change their servants instead of physical punishment? If it happen so, this family is really bad.

Mar 23, 2013 05:58 AM

គេហទំព័រ​ទាំងមូល