គ.ខ.ប​ខេត្ត​កំពត​បដិសេធ​ការ​ចាប់​បុរស​៦​នាក់​ថា​មិន​មែន​រឿង​នយោបាយ

អាជ្ញាធរ​មាន​សមត្ថកិច្ច បាន​ចាប់​មនុស្ស ៦​នាក់ ជា​សមាជិក​គណបក្ស​សង្គ្រោះ​ជាតិ ដែល​ដឹក​ឈើ​តាម​រទេះគោ កាល​ពី​ថ្ងៃ​ទី២៧ ខែ​មិថុនា។ ការ​ចាប់​ខ្លួន​នេះ ត្រូវ​តំណាង​គណបក្ស​សង្គ្រោះ​ជាតិ ចោទ​ថា​ជា​រឿង​នយោបាយ តែ​គណៈកម្មការ​រៀបចំ​ការ​បោះឆ្នោត​ខេត្ត​កំពត និយាយ​ថា​ជា​រឿង​កាប់​ឈើ​ខុស​ច្បាប់។
ដោយ អ៊ុក សាវបូរី
2013-07-11
អ៊ីម៉ែល
មតិ
Share
បោះពុម្ព

គណៈកម្មការ​រៀបចំ​ការ​បោះឆ្នោត​ខេត្ត​កំពត បាន​អះអាង​ថា ការ​ដែល​អង្គភាព​មាន​សមត្ថកិច្ច​ចាប់​មនុស្ស ៦​នាក់ ជា​សមាជិក​គណបក្ស​សង្គ្រោះ​ជាតិ ដឹក​ឈើ​តាម​រទេះ មិន​មែន​ជា​រឿង​នយោបាយ​ទេ ប៉ុន្តែ​ជា​រឿង​ព្រហ្មទណ្ឌ​ដែល​ត្រូវ​ផ្ដន្ទាទោស​តាម​ផ្លូវ​តុលាការ។ ប៉ុន្តែ​ការ​ចាប់​ខ្លួន​នេះ ត្រូវ​តំណាង​គណបក្ស​សង្គ្រោះ​ជាតិ និង​អង្គការ​មិន​មែន​រដ្ឋាភិបាល បាន​និយាយ​ថា​ជា​រឿង​នយោបាយ។

អនុប្រធាន​គណៈកម្មការ​រៀបចំ​ការ​បោះឆ្នោត​ខេត្ត​កំពត លោក អ៊ុង វិសាល ថ្លែង​ថា ករណី​ចាប់​ខ្លួន​អ្នក​គាំទ្រ​គណបក្ស​សង្គ្រោះ​ជាតិ នៅ​ក្នុង​ខេត្ត​កំពត ក្នុង​យុទ្ធនាការ​ឃោសនា​បោះឆ្នោត​នោះ ទាក់ទង​នឹង​រឿង​គំរាម​សម្លាប់ និង​រឿង​រដ្ឋបាល​ព្រៃ​ឈើ ចាប់​អ្នក​រក​ស៊ី​ឈើ​ខុស​ច្បាប់។ លោក​ថា បច្ចុប្បន្ន​ជន​ទាំង ៦​នាក់​នោះ​នៅ​ក្នុង​ការ​អនុវត្ត​ច្បាប់​របស់​តុលាការ មិន​នៅ​ក្នុង​ការងារ​បោះឆ្នោត​ទេ៖ «រឿង​បទ​ល្មើស​ព្រៃ​ឈើ​ទេ ហើយ​បណ្ដឹង​នោះ​ក៏​អត់​បាន​ដាក់​មក ស៊ិក (CEC) យើង​ដែរ ជា​រឿង​របស់​មេ​ព្រៃ​ទេ របស់​រាជ​រដ្ឋាភិបាល រឿង​ដឹក​ឈើ​ខុស​ច្បាប់​ទេ មិន​មែន​ពាក់ព័ន្ធ​នឹង​ការងារ​បោះឆ្នោត​ទេ»

មន្ត្រី​សម្រប​សម្រួល​អង្គការ​លីកាដូ (Licadho) ខេត្ត​កំពត លោក យន់ ផល្លី ឲ្យ​ដឹង​ថា កាល​ពី​ថ្ងៃ​ទី២៧ ខែ​មិថុនា ក្នុង​យុទ្ធនាការ​ឃោសនា​បោះឆ្នោត​ថ្ងៃ​ដំបូង បុរស​នៅ​ខេត្ត​កំពង់ស្ពឺ ៤​នាក់ បាន​ដឹក​ឈើ​តាម​រទេះគោ ហើយ​គណបក្ស​សង្គ្រោះ​ជាតិ បាន​ឃោសនា​ចែក​ខិត្តប័ណ្ណ​ឃោសនា​ទៅ​អ្នក​ដឹក​ឈើ​នោះ។ បុរស​ទាំង ៤​នាក់​នោះ បាន​យក​ក្រដាស​ឃោសនា​គោលការណ៍ ៧​ចំណុច​របស់​គណបក្ស​សង្គ្រោះ​ជាតិ ទៅ​សៀត​ក្នុង​ដើម​ឈើ​ដែល​កំពុង​ដឹក ក៏​ត្រូវ​សមត្ថកិច្ច​ខេត្ត​កំពត តាម​ចាប់​ដោយ​ចោទ​ថា បាន​ដឹក​ឈើ​ឲ្យ​គណបក្ស​សង្គ្រោះ​ជាតិ។ បុរស​ទាំង ៤​នាក់ មាន​ឈ្មោះ បូ ឧត្តម អាយុ ២១​ឆ្នាំ ឈ្មោះ ទិត ផា អាយុ ៣៩​ឆ្នាំ ឈ្មោះ សេង អឿន អាយុ ២៩​ឆ្នាំ និង​ឈ្មោះ ញាញ ណាង។

លោក​បន្ត​ថា មាន​បុរស ២​នាក់​ទៀត រស់នៅ​ក្នុង​ខេត្ត​កំពត ក៏​ត្រូវ​សមត្ថកិច្ច​ខេត្ត​នេះ​ចាប់​ខ្លួន​ដែរ មាន​ឈ្មោះ ស៊ូ តន រង​នូវ​ការ​ចោទ​ពី​បទ​កែច្នៃ​ឈើ​ធ្វើ​អាជីវកម្ម​ខុស​ច្បាប់ និង​បុរស​ម្នាក់​ទៀត​ឈ្មោះ ហុង វីរ៉ាវុធ រង​នូវ​ការ​ចោទ​ថា បាន​គំរាម​តាម​ទូរស័ព្ទ​សម្លាប់​លោក ជុំ ប៊ុនថាន ហៅ ថុង ជា​សកម្មជន​គណបក្ស​ប្រជាជន​កម្ពុជា នៅ​ក្នុង​ស្រុក​អង្គរជ័យ។ អ្នក​ទាំង ៦​នាក់ កំពុង​ជាប់​ពន្ធនាគារ​ខេត្ត​កំពត៖ «យើង​ជួប​ទៅ​ក្រុម​គ្រួសារ ម្ដាយ​របស់​គាត់ បើ​សិន​ជា​គាត់​ចុះ​ចូល​ជាមួយ​គណបក្ស​ប្រជាជន នោះ ហុង វីរ៉ាវុធ ត្រូវ​បាន​ដោះ​លែង ប៉ុន្តែ​ការ​សន្យា​នេះ​គេ​បាន​ថា​ទាល់​តែ​ក្រោយ​បោះឆ្នោត»

ក្រុម​គ្រួសារ​លោក ហុង វីរ៉ាវុធ ឲ្យ​ដឹង​ថា មាន​គេ​ខ្ចី​ទូរស័ព្ទ ហុង វីរ៉ាវុធ ទៅ​ប្រើ​នៅ​ពេល​ដែល​លោក ហុង វីរ៉ាវុធ ចេញ​ទៅ​ទិញ​ដែក ដើម្បី​បោះពុម្ព​ស្លាក​គណបក្ស​សង្គ្រោះ​ជាតិ។ ពួក​គាត់​បន្ត​ថា មាន​ក្រុម​មនុស្ស​មក​លួងលោម​ឲ្យ​ក្រុម​គ្រួសារ ហុង វីរ៉ាវុធ នេះ ចុះ​ចូល​ជាមួយ​គណបក្ស​ប្រជាជន​កម្ពុជា បើ​ចង់​ចេញ​ក្រៅ​ឃុំ​ឆាប់ ឬ​សម្រួល​តុលាការ​មិន​ឲ្យ​ចាត់​ការ​បណ្ដឹង​នោះ​ជា​ដើម៖ «ខ្ញុំ​សុខ​ចិត្ត ខ្លួន​ខ្ញុំ​ហ្នឹង​ចុះ​ចូល​ហើយ ឥឡូវ​ហ្នឹង គឺ​ចូល​អស់​ហើយ​ពួក​ខ្ញុំ​ហ្នឹង យក​ស្អីៗ​ដាក់​អា​លេខ​អត្តសញ្ញាណប័ណ្ណ គេ​យក​ទៅ​កត់​របស់​ពួក​ខ្ញុំ​អស់​ហើយ​ណា»

លោក ជុំ ប៊ុនថាន ហៅ ថុង រស់នៅ​ភូមិ​ពោធិ ឃុំ​ភ្នំកុង ស្រុក​អង្គរជ័យ ដែល​ជា​ដើម​ចោទ​ថា លោក ហុង វីរ៉ាវុធ បាន​គំរាម​សម្លាប់​រូប​គាត់​តាម​ទូរស័ព្ទ​នោះ មិន​ធ្វើ​អត្ថាធិប្បាយ​ទេ នៅ​ថ្ងៃ​ទី៩ និង​ទី១០ ខែ​កក្កដា ព្រោះ​លោក​កំពុង​បារម្ភ​ពី​សុវត្ថិភាព​ផ្ទាល់​ខ្លួន៖ «ខ្ញុំ​ខ្លាច​ការ​គំរាម​ស្អីៗ​អីចឹង តាំង​ពី​ហ្នឹង​មក ខ្ញុំ​ខ្លាច​ខ្ញុំ​លែង​ហ៊ាន​និយាយ​ស្តី​អី​ពិស្ដារ​ទេ ហើយ​ខ្ញុំ​នៅ​តែ​ផ្ទះ​ទៅ​មិន​សូវ​ហ៊ាន​នេះ​ទេ ព្រោះ​ខ្ញុំ​ខ្លាច»

ក្រុម​ការងារ​គណបក្ស​សង្គ្រោះ​ជាតិ និង​ជា​បេក្ខជន​លេខ​រៀង​ទី១ ប្រចាំ​ខេត្ត​កំពត លោក ជា ប៉ូច ថ្លែង​ថា សកម្មជន និង​អ្នក​គាំទ្រ​គណបក្ស​សង្គ្រោះ​ជាតិ ចំនួន ៦​នាក់ ដែល​សមត្ថកិច្ច​ខេត្ត​កំពត បាន​ចាប់​ខ្លួន​នៅ​អំឡុង​ពេល​ឃោសនា​បោះឆ្នោត​នោះ​ជា​រឿង​នយោបាយ៖ «ខ្ញុំ​មាន​ជំនឿ​ថា សកម្មជន​ទាំង ៦​នាក់​របស់​គណបក្ស​សង្គ្រោះ​ជាតិ គឺ​ដាច់​ខាត​គាត់​ដាច់​ខាត​អត់​ចូល​ទៅ​គណបក្ស​ប្រជាជន​ទេ ប៉ុន្តែ​ការ​បង្ខិត​បង្ខំ​ខ្ញុំ​ជឿ​ថា យើង​មាន​មេធាវី គាត់​នឹង​បដិសេធ​នៅ​ថ្ងៃ​អនាគត​នេះ​វិញ»

ប្រធាន​ស៊ើប​អង្កេត​សមាគម​ការពារ​សិទ្ធិ​មនុស្ស​អាដហុក (Adhoc) ខេត្ត​កំពត លោក ប្រាក់ សារ៉ាន់ ថ្លែង​ថា ប្រសិន​បើ​មាន​ការ​អូស​ទាញ លោក ហុង វីរ៉ាវុធ ឲ្យ​ចូល​គាំទ្រ​គណបក្ស​ប្រជាជន​កម្ពុជា ដូច​ការ​លើក​ឡើង​របស់​ក្រុម​គ្រួសារ​នោះ​មែន តុលាការ​ខេត្ត​កំពត គួរ​ពិចារណា​រឿង​នេះ​ឡើង​វិញ។

លោក​បន្ត​ថា ទោះ​ជា​យ៉ាង​ណា មេធាវី​របស់​អង្គការ​នេះ​កំពុង​រៀប​ចំ​ឯកសារ និង​ភស្តុតាង ដើម្បី​ការពារ​ជន​សង្ស័យ​ទាំង​នោះ និង​សុំ​ឲ្យ​តុលាការ​ពន្លឿន​បើក​សវនាការ​ឲ្យ​បាន​មុន​ថ្ងៃ​បោះឆ្នោត ដើម្បី​ឲ្យ​ជន​សង្ស័យ​ទាំង ៦​នាក់ បាន​ចូលរួម​បោះឆ្នោត​ដោយ​សេរី គ្មាន​ការ​រើសអើង​គណបក្ស៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

អ្នក​អាន​អនាមិក

The pitiful political of cpp,people all over the world has never understood,it's one big shame.
I tell you a little story,after 28 07 2013 you are all go to hell for see khadafi Mohamed,and sadame husen,but do not Forget take youne invader with you.


Jul 11, 2013 12:46 PM

Obasen

ពី Bangkok

Dear respected citizens, please talk about the criminal, chhouk bundith in public so that other people are aware of this and they start to provide information that leads to capture the criminal, chhouk bundith. Please be informed that private citizens offer 7,000,000.00 Riels as a reward for governor convicted in shooting and injuring 3 of factory workers in Svay Rieng province.

Jul 11, 2013 05:42 AM

គេហទំព័រ​ទាំងមូល