ក្រសួង​បរិស្ថាន​គ្រោង​ធ្វើ​ច្បាប់​មួយ​ដែល​អនុញ្ញាត​ឲ្យ​ពលរដ្ឋ​ចិញ្ចឹម​សត្វព្រៃ

ដោយ ប្រាជ្ញ ចេវ
2016-03-19
អ៊ីម៉ែល
មតិ
Share
បោះពុម្ព
រដ្ឋមន្ត្រី​ក្រសួង​បរិស្ថាន លោក សាយ សំអាល់ ថ្លែង​ក្នុង​ទិវា​សត្វព្រៃ​ពិភពលោក នា​រាជធានី​ភ្នំពេញ នៅ​ថ្ងៃ​ទី​១៩ ខែ​មីនា ឆ្នាំ​២០១៦។
រដ្ឋមន្ត្រី​ក្រសួង​បរិស្ថាន លោក សាយ សំអាល់ ថ្លែង​ក្នុង​ទិវា​សត្វព្រៃ​ពិភពលោក នា​រាជធានី​ភ្នំពេញ នៅ​ថ្ងៃ​ទី​១៩ ខែ​មីនា ឆ្នាំ​២០១៦។
RFA/Brach Chev

រដ្ឋមន្ត្រី​ក្រសួង​បរិស្ថាន នឹង​ធ្វើ​ច្បាប់​មួយ​ដែល​អនុញ្ញាត​ឲ្យ​ពលរដ្ឋ និង​មាន​កសិដ្ឋាន​អាច​ចិញ្ចឹម​សត្វព្រៃ​នៅ​តាម​តំបន់​របស់​ខ្លួន ដើម្បី​កាត់​បន្ថយ​ការ​បរ​បាញ់​សត្វ​ពី​ក្នុង​ព្រៃ។ ប៉ុន្តែ​សង្គម​ស៊ីវិល​ធ្វើ​ការងារ​ពាក់ព័ន្ធ​នឹង​សត្វ​ព្រៃ​យល់​ថា ប្រសិន​ច្បាប់​ចែង​មិន​ច្បាស់ និង​ការ​អនុវត្ត​មិន​បាន​ត្រឹមត្រូវ កន្លែង​ចិញ្ចឹម​សត្វព្រៃ​នឹង​ក្លាយ​ជា​កន្លែង​ជួញដូរ​សត្វព្រៃ​ដែល​ឈ្មួញ​បរបាញ់​បាន​ពី​ក្នុង​ព្រៃ។

ច្បាប់​ដែល​ក្រសួង​បរិស្ថាន នឹង​ធ្វើ​ច្បាប់​មួយ​មាន​ឈ្មោះ​ថា "ក្រម​បរិស្ថាន" ដែល​រដ្ឋមន្ត្រី​ក្រសួង​បរិស្ថាន ថា នឹង​ធ្វើ​ឲ្យ​ចេញ​នៅ​ក្នុង​អាណត្តិ​លោក​ធ្វើ​ជា​រដ្ឋមន្ត្រី​ក្រសួង​នេះ។

រដ្ឋមន្ត្រី​ក្រសួង​បរិស្ថាន លោក សាយ សំអាល់ ថ្លែង​ថា ច្បាប់​នេះ​គឺ​ដើម្បី​ធានា​ការពារ​ធនធាន​ធម្មជាតិ ហើយ​ច្បាប់​នេះ​នឹង​ការពារ​សិទ្ធិ​មនុស្ស សិទ្ធិ​រស់​នៅ​របស់​ប្រជាពលរដ្ឋ​នៅ​តំបន់​ឧទ្យាន​ជាតិ និង​តំបន់​ដែន​ជម្រក​សត្វ​ព្រៃ។ លោក​បន្ត​ថា ច្បាប់​នេះ​នឹង​ផ្លាស់ប្ដូរ​ការ​គិត​របស់​ពលរដ្ឋ​ពី​ការ​បរបាញ់​សត្វ​ក្នុង​ព្រៃ​បែរ​មក​ចិញ្ចឹម​សត្វ​ព្រៃ​តាម​ផ្ទះ និង​កសិដ្ឋាន ដែល​ជា​ការ​ផ្គត់ផ្គង់​តម្រូវ​ការ​អាហារ​របស់​មនុស្ស៖ «ច្បាប់​នេះ​នឹង​ប្ដូរ​ការ​គិត​របស់​មនុស្ស​តែម្ដង។ ពី​មុន​ជ្រូក​ព្រៃ​នៅ​ក្នុង​ព្រៃ ប៉ុន្តែ​ពេល​នេះ បង​ប្អូន​នៅ​រតនគិរី មណ្ឌលគិរី គឺ​ជា​សត្វស្រុក​របស់​គាត់»

ក្រុម​យុវជន​ចូល​រួម​ទិវា​សត្វព្រៃ​ពិភពលោក នា​រាជធានី​ភ្នំពេញ នៅ​ថ្ងៃ​ទី​១៩ ខែ​មីនា ឆ្នាំ​២០១៦។ RFA/Brach Chev
ក្រុម​យុវជន​ចូល​រួម​ទិវា​សត្វព្រៃ​ពិភពលោក នា​រាជធានី​ភ្នំពេញ នៅ​ថ្ងៃ​ទី​១៩ ខែ​មីនា ឆ្នាំ​២០១៦។ RFA/Brach Chev

លោក សាយ សំអាល់ ពន្យល់​ទៀត​ថា នៅ​តំបន់​ខ្លះ សត្វព្រៃ​បាន​ក្លាយ​ជា​សត្វ​ស្រុក​របស់​អ្នក​ភូមិ​ទៅ​ហើយ ដែល​សត្វ​ទាំង​នោះ រួម​មាន​ជ្រូកព្រៃ អណ្ដើក ទន្សាយ​ជាដើម។ លោក​ថ្លែង​ដូច​នេះ​ក្នុង​ទិវា​សត្វព្រៃ​ពិភពលោក នៅ​ថ្ងៃ​ទី​១៩ ខែ​មីនា។ លោក​ឲ្យ​ដឹង​ដែរ​ថា សព្វថ្ងៃ​នេះ​ក្រសួងបរិស្ថាន​បាន​អនុញ្ញាត​ឲ្យ​មាន​ការ​ចិញ្ចឹម​ជ្រូកព្រៃ​នៅ​ខេត្ត​ព្រះវិហារ ដោយ​ព័ទ្ធ​របង​ដី​ជាង ១០​ហិកតារ៖ «យើង​បាន​ចាប់​ផ្ដើម​កម្មវិធី​មួយ គឺ​អនុញ្ញាត​ឲ្យ​ចិញ្ចឹម​ជ្រូក​ព្រៃ បើ​មនុស្ស​ចូល​ចិត្ត​ជ្រូក​ព្រៃ គាត់​អាច​រក​ចំណូល​បាន»

នាយក​អង្គការ​ប្រចាំ​ប្រទេស នៃ​អង្គការ​សត្វព្រៃ និង​រុក្ខជាតិ​អន្តរជាតិ-​កម្ពុជា លោក ទុយ សេរីវឌ្ឍនា យល់​ថា ការ​ផ្លាស់ប្ដូរ​ផ្នត់​គំនិត​ពី​ការ​បរបាញ់​សត្វព្រៃ បែរ​មក​ចិញ្ចឹម​សត្វព្រៃ​ក្នុង​កសិដ្ឋាន​ជា​រឿង​ល្អ។ ប៉ុន្តែ​លោក​ព្រួយ​បារម្ភ​ថា ការ​អនុវត្ត​មិន​បាន​ត្រឹមត្រូវ នឹង​ធ្វើ​ឲ្យ​កសិដ្ឋាន​ក្លាយ​ជា​កន្លែង​បំផ្លាញ​សត្វព្រៃ ដោយ​យក​សត្វព្រៃ​មក​ទុក​ក្នុង​កសិដ្ឋាន រួច​ហើយ​ទើប​នាំ​ចេញ​ទៅ​លក់​ស្រប​ច្បាប់៖ «នេះ ​ជា​ការ​គំរាម​មួយ​ដល់​ការ​អភិរក្ស​សត្វ បើ​កសិដ្ឋាន​នោះ​ពុំ​មាន​តម្លាភាព គេ​អាច​យក​សត្វ​ពី​ក្នុង​ព្រៃ​ដាក់​ក្នុង​កសិដ្ឋាន ហើយ​បន្ទាប់​មក​គេ​អាច​ធ្វើ​អាជីវកម្ម​លើ​ហ្នឹង អស់​ហើយ​ចាប់​មក​ទៀត»

សង្គម​ស៊ីវិល​រូប​នេះ ទាមទារ​ឲ្យ​កសិដ្ឋាន​ចិញ្ចឹម​សត្វព្រៃ​ទាំង​នោះ មាន​បច្ចេកទេស​ត្រឹមត្រូវ មាន​គោលនយោបាយ​ច្បាស់​លាស់ ម្ចាស់​កសិដ្ឋាន​មាន​ឆន្ទៈ​ពិតប្រាកដ។ ជាង​នេះ​ទៅ​ទៀត លោក​ស្នើ​ឲ្យ​ច្បាប់​នោះ​ចែង​ឲ្យ​ច្បាស់លាស់​ថា សត្វ​ណា​អាច​ចិញ្ចឹម​បាន និង​សត្វ​ណា​មិន​អាច​ចិញ្ចឹម​បាន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

ហានិភ័យ

ពី តាកែវ

មិនខុសពីក្រុមហ៊ុនទ្រីភាព មានសិទ្ធទិញឈើដែលរិបអូសបាន តែក៏ជាកន្លែងចល័តឈើខុសច្បាប់ ក្លាយមកជាឈើស្របច្បាប់។

Mar 19, 2016 03:29 PM

អ្នក​អាន​អនាមិក

The most stupidest idea I've ever heard. So people can have their own zoo? Can they raise danger specie animals? And what are they going to do with these animals? Sell them?

Mar 19, 2016 12:38 PM

គេហទំព័រ​ទាំងមូល