បញ្ជូន​ជន​សង្ស័យ​៦​នាក់​ទៅ​ពន្ធនាគារ​ចោទ​ប្រឆាំង​រដ្ឋាភិបាល

ដោយ ខែ សុណង
2013-03-19
អ៊ីម៉ែល
មតិ
Share
បោះពុម្ព

សាលា​ដំបូង​រាជធានី​ភ្នំពេញ បាន​បញ្ជូន​ជន​ភៀស​ខ្លួន ៦​នាក់ ដែល​ភាគ​ច្រើន​ជា​ខ្មែរ​កម្ពុជា​ក្រោម ទៅ​ឃុំ​ខ្លួន​បណ្ដោះ​អាសន្ន​នៅ​ពន្ធនាគារ​ព្រៃស បន្ទាប់​ពី​បាន​សាកសួរ​រួច​មក។ អាជ្ញាធរ​ថៃ សហការ​ជាមួយ​អាជ្ញាធរ​កម្ពុជា បាន​ចាប់​ខ្លួន​អ្នក​ទាំង ៦​នោះ បញ្ជូន​មក​ប្រទេស​កម្ពុជា ភ្លាមៗ ដោយ​សង្ស័យ​ថា​ពួក​គេ​ជាប់​ពាក់ព័ន្ធ​ក្នុង​រឿង​បង្កើត​ក្រុម​ភេរវកម្ម និង​រៀបចំ​កម្លាំង​ប្រដាប់​អាវុធ​ខុស​ច្បាប់​ប្រឆាំង​រដ្ឋាភិបាល​កម្ពុជា។

អគ្គស្នងការ​នគរបាល​ជាតិ បាន​ឲ្យ​ដឹង​នៅ​ថ្ងៃ​ទី១៩ មីនា ថា សមត្ថកិច្ច​កម្ពុជា កំពុង​ស្វែង​រក​ចាប់​ខ្លួន​ជន​សង្ស័យ​បន្ថែម​ទៀត ដែល​ជាប់​ពាក់ព័ន្ធ​រឿង​បង្កើត​កម្លាំង​ប្រដាប់​អាវុធ​ខុស​ច្បាប់​ប្រឆាំង​រដ្ឋាភិបាល​មួយ​ចំនួន​ទៀត។

អ្នក​នាំ​ពាក្យ​អគ្គស្នងការ​នគរបាល​ជាតិ លោក គៀត ច័ន្ទថារិទ្ធិ បាន​អះអាង​ថា រដ្ឋាភិបាល​កម្ពុជា មាន​ភស្តុតាង​គ្រប់គ្រាន់​ចំពោះ​ការ​ចាប់​ខ្លួន​មុខ​សញ្ញា​មួយ​ចំនួន​ទៀត៖ «យើង​នឹង​បន្ត​ស៊ើប​អង្កេត​បន្ថែម ពាក់ព័ន្ធ​នឹង​រណសិរ្ស​រំដោះ​ជាតិ​ខ្មែរ​ហ្នឹង។ យើង​មាន​បញ្ជី​ឈ្មោះ​មុខ​សញ្ញា​ផ្សេងៗ​ទៀត យើង​មាន​ឯកសារ​មុខ​សញ្ញា​មួយ​ចំនួន​ទៀត យើង​នឹង​បន្ត​ធ្វើ​ការងារ​ហ្នឹង​បន្ត​ទៀត»

ការ​បន្ត​ស្វែង​រក​ចាប់​ខ្លួន​ជន​សង្ស័យ​បន្ថែម​ទៀត​នេះ បន្ទាប់​ពី​សមត្ថកិច្ច​កម្ពុជា បាន​សហការ​គ្នា​ជាមួយ​សមត្ថកិច្ច​ថៃ បាន​ចាប់​ខ្លួន​មនុស្ស​ចំនួន ៦​នាក់ បញ្ជូន​មក​កម្ពុជា កាល​ពី​ថ្ងៃ​ទី១៤ មីនា តាម​ដីកា​ចាប់​ខ្លួន​របស់​តុលាការ​ចោទ​ប្រកាន់​ពី​បទ​ភេរវកម្ម បាច​ខិត្តប័ណ្ណ ហើយ​និង​ពាក់ព័ន្ធ​ការ​ដាក់​គ្រឿង​ផ្ទុះ​កសាង​កម្លាំង​ប្រដាប់​អាវុធ​ខុស​ច្បាប់ និង​បង្កើត​រណសិរ្ស​រំដោះ​ជាតិ​ខ្មែរ។ អ្នក​ទាំង​នោះ​ត្រូវ​បាន​បញ្ជូន​មក​សាលា​ដំបូង​រាជធានី​ភ្នំពេញ សាកសួរ កាល​ពី​ថ្ងៃ​ទី១៥ និង​ថ្ងៃ​ទី១៦ មីនា។

វិទ្យុ​អាស៊ីសេរី មិន​អាច​ទាក់ទង​មន្ត្រី​សាលា​ដំបូង​រាជធានី​ភ្នំពេញ ដើម្បី​បំភ្លឺ​ទាក់ទង​ទៅ​នឹង​ការ​ចាប់​ខ្លួន​នេះ​បាន​ទេ នៅ​ថ្ងៃ​អង្គារ ទី១៩ មីនា។

ជន​សង្ស័យ​ទាំង ៦​នាក់ មាន​ព្រះសង្ឃ ៣​អង្គ និង​គ្រហស្ថ ៣​នាក់ ត្រូវ​អាជ្ញាធរ​ថៃ ចាប់ រួម​មាន​ឈ្មោះ យ៉ន គឹមស្រ៊ុន ហៅ យ៉ាញ់ គឹមស្រ៊ុន និង​ហៅ កែវ យ៉ាន អាយុ ២៧​ឆ្នាំ ឈ្មោះ យ៉ាញ់ យឿប ហៅ តក់ អាយុ ២៥​ឆ្នាំ មាន​ស្រុក​កំណើត​នៅ​ខេត្ត​តាកែវ ឈ្មោះ ថាច់ កុងភួង ហៅ ថាច់ វ៉ាង និង​ហៅ ថាច់ កុសល្យ អាយុ ៣៧​ឆ្នាំ មាន​កំណើត​ជា​ខ្មែរ​កម្ពុជា​ក្រោម និង ៣​នាក់​ទៀត មាន​ឈ្មោះ ខេមា ហៅ ខេមរា អាយុ ២៨​ឆ្នាំ ជា​ពលរដ្ឋ​ខ្មែរ ចំណែក​ឈ្មោះ យិន យ៉ាវ អាយុ ៣៤​ឆ្នាំ និង​ឈ្មោះ ថាច់ ទឺ ជា​ខ្មែរ​កម្ពុជា​ក្រោម។

ទាក់ទង​បញ្ហា​នេះ ភរិយា​របស់​ជន​សង្ស័យ​ឈ្មោះ ថាច់ ទឺ គឺ​លោកស្រី ថាច់ ថា បាន​ថ្លែង​ថា ស្វាមី​គាត់​ត្រូវ​អាជ្ញាធរ​ថៃ ចាប់​ខ្លួន​តាំង​ពី​ថ្ងៃ​ទី៨ មីនា។ ស្វាមី​គាត់​មិន​បាន​ប្រព្រឹត្ត​ដូច​ការ​ចោទ​ប្រកាន់ និង​ចូល​រួម​រណសិរ្ស​រំដោះ​ជាតិ​ខ្មែរ​នោះ​ទេ។ លោកស្រី​បន្ត​ថា ក្រុម​គ្រួសារ​គាត់​ភៀស​ខ្លួន​ទៅ​ប្រទេស​ថៃ ដើម្បី​ជីវភាព​គ្រួសារ និង​ដើម្បី​គេច​ពី​ការ​ធ្វើ​បាប​ពី​សំណាក់​អាជ្ញាធរ​វៀតណាម។

ប្រធាន​សាខា​សហព័ន្ធ​ខ្មែរ​កម្ពុជា​ក្រោម​ពិភពលោក ប្រចាំ​នៅ​កម្ពុជា លោក តាំង សារៈ មាន​ប្រសាសន៍​ថា ជន​សង្ស័យ​ដែល​អាជ្ញាធរ​មាន​សមត្ថកិច្ច​នៃ​ប្រទេស​ទាំង​ពីរ​ចាប់​ខ្លួន គឺ​មិន​បាន​ផ្ដល់​ដំណឹង​ពី​គំនិត​ផ្ដួចផ្ដើម​ណា​មួយ​ដល់​សហព័ន្ធ ឬ​សហគមន៍​ខ្មែរ​កម្ពុជា​ក្រោម​នោះ​ទេ។ ទន្ទឹម​នឹង​គ្នា​នេះ សុំ​ឲ្យ​តុលាការ​ធ្វើ​ការ​ស៊ើប​អង្កេត​ប្រកប​ដោយ​ភាព​ត្រឹមត្រូវ និង​យុត្តិធម៌។

លោក តាំង សារៈ៖ «អង្គការ​សមាគម​ខ្មែរ​កម្ពុជា​ក្រោម ហើយ​និង​សហព័ន្ធ​ចាំ​តាម​ដាន​មើល ថា​តើ​ពួក​គាត់​វា​មាន​ធ្វើ​អ៊ីចឹង​មែន ឬ​យ៉ាង​ម៉េច? បើ​ធ្វើ​មែន មាន​តែ​ឲ្យ​ច្បាប់​គេ​ចាត់​ការ។ បើ​សិន​ជា​គ្មាន​ទេ ទទួល​ការ​ចោទ​មួល​បង្កាច់​អ៊ីចឹង ក៏​សុំ​ឲ្យ​មាន​ការ​ផ្ដល់​យុត្តិធម៌​ឲ្យ​ពួក​គាត់​ទៅ​តាម​ហ្នឹង។ ទី​៣ បើ​គាត់​មាន​ដែរ គ្រាន់​ជា​អ្នក​រងគ្រោះ​ដោយសារ​ការ​ទាក់ទាញ​ពី​មេ​ខ្លោង ក៏​សុំ​ឲ្យ​អាជ្ញាធរ គឺ​ជួយ​សម្រាល​ទោស​ទៅ​តាម​ស្ថានភាព​ទោស»

យ៉ាង​ណា​ក៏​ដោយ ម្នាក់​ក្នុង​ចំណោម ៦​នាក់​នោះ គឺ​មាន​ឈ្មោះ ខេមា ហៅ ខេមរា ធ្លាប់​ជាប់​ពន្ធនាគារ​ខេត្ត​តាកែវ ចំនួន ២​ឆ្នាំ ពាក់ព័ន្ធ​ក្នុង​រឿង​បាច​ខិត្តប័ណ្ណ​ប្រឆាំង​ការ​ដឹកនាំ​របស់​លោក ហ៊ុន សែន ទើប​ចេញ​ពី​ពន្ធនាគារ​កាល​ពី​ថ្ងៃ​ទី២៩ មករា ឆ្នាំ​២០១៣ ក៏​ត្រូវ​ចាប់​ខ្លួន​នៅ​ប្រទេស​ថៃ ដែរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Dararith

ពី Siem Reap!

Million Cambodian who don't like Hun Sen and and Hun Sen himslef also don't somebody who know a lot, criticized him lots about his bad moved. Please look our fish in the River, Please look our forest in the jungle and Please look our Maintain and mine are going to be destroyed by Hun Sen and his fellow.

Mar 19, 2013 09:15 PM

គេហទំព័រ​ទាំងមូល