សាលាឧទ្ធរណ៍​គ្រោង​បើក​សវនាការ​ករណី​លោក ឈូក បណ្ឌិត នៅ​ថ្ងៃ​៣១ តុលា

អតីត​អភិបាល​ក្រុង​បាវិត លោក ឈូក បណ្ឌិត ដែល​តុលាការ​ខេត្ត​ស្វាយរៀង ផ្តន្ទាទោស​ឲ្យ​ជាប់​ពន្ធនាគារ ១៨​ខែ ចំពោះ​ការ​បាញ់​កម្មការិនី​រោងចក្រ​កៅវ៉េ (Kaoway) ៣​នាក់ ឲ្យ​រង​របួស កំពុង​មាន​សេរីភាព​នៅ​ក្រៅ​ពន្ធនាគារ​នៅ​ឡើយ។
ដោយ ទេព សុរ៉ាវី
2013-10-29
អ៊ីម៉ែល
មតិ
Share
បោះពុម្ព
អតីត​អភិបាល​ក្រុង​បាវិត ខេត្ត​ស្វាយរៀង លោក ឈូក បណ្ឌិត ពេល​ចេញ​ពី​បន្ទប់​សវនាការ​សាលាឧទ្ធរណ៍ កាល​ពី​ព្រឹក​ថ្ងៃ​ទី​២៧ កុម្ភៈ ឆ្នាំ​២០១៣។
អតីត​អភិបាល​ក្រុង​បាវិត ខេត្ត​ស្វាយរៀង លោក ឈូក បណ្ឌិត ពេល​ចេញ​ពី​បន្ទប់​សវនាការ​សាលាឧទ្ធរណ៍ កាល​ពី​ព្រឹក​ថ្ងៃ​ទី​២៧ កុម្ភៈ ឆ្នាំ​២០១៣។
RFA/Sochivy

ជន​រងគ្រោះ​នៃ​ការ​បាញ់​ប្រហារ​នោះ អំពាវនាវ​ឲ្យ​សាលាឧទ្ធរណ៍​ជួយ​ផ្តល់​យុត្តិធម៌​ឲ្យ​ពួកគាត់ ដោយ​ត្រូវ​ចាប់​ខ្លួន​លោក ឈូក បណ្ឌិត យក​មក​ទទួល​ទោស​តាម​ច្បាប់។

សាលាឧទ្ធរណ៍​គ្រោង​បើក​សវនាការ​សំណុំ​រឿង​របស់​អតីត​អភិបាល​ក្រុង​បាវិត លោក ឈូក បណ្ឌិត នៅ​ថ្ងៃ​ទី​៣១ ខែ​តុលា ដែល​ប្តឹង​ទាស់​នឹង​សាលក្រម​របស់​សាលា​ដំបូង​ខេត្ត​ស្វាយរៀង ដែល​បាន​កាត់​ឲ្យ​លោក​មាន​ទោស​ពី​បទ​បង្ក​របួស​ស្នាម​ដោយ​អចេតនា។

មេធាវី​មក​ពី​មជ្ឈមណ្ឌល​អប់រំ​ច្បាប់​សម្រាប់​សហគមន៍ ដែល​ជួយ​ការពារ​ក្តី​ឲ្យ​កម្មករ​រោងចក្រ​កៅវ៉េ គឺ​លោកស្រី សារី បុត្រចរិយា មាន​ប្រសាសន៍​ថា បណ្តឹង​ទាស់​របស់​លោក ឈូក បណ្ឌិត ត្រូវ​សាលាឧទ្ធរណ៍​សម្រេច​បើក​សវនាការ​ជម្រះ​នៅ​ម៉ោង ២​រសៀល ថ្ងៃ​ទី​៣១ ខែ​តុលា ខាង​មុខ បន្ទាប់​ពី​បណ្តឹង​នោះ​បាន​ធ្លាក់​ចូល​ក្នុង​ដៃ​សាលាឧទ្ធរណ៍​តាំង​ពី​ចុង​ខែ​មិថុនា។

លោកស្រី​មាន​ជំនឿ​ថា សាលាឧទ្ធរណ៍​នៅ​តែ​ផ្តល់​យុត្តិធម៌​ឲ្យ​កម្មករ​ជា​ជន​រងគ្រោះ ដូចការ​សម្រេច​របស់​សាលា​ដំបូង​ខេត្ត​ស្វាយរៀង៖ «យើង​នឹង​ទទួល​បាន​យុត្តិធម៌​បន្ថែម​ពី​អ្វី​ដែល​យើង​បាន​ទទួល​ពី​តុលាការ​ខេត្ត​ស្វាយរៀង។ កម្រិត​ប៉ុណ្ណា​យើង​មិន​ហ៊ាន​សន្និដ្ឋាន​ទេ ចំនួន​ប៉ុន្មាន​ឲ្យ​ធំ​បំផុត​ទេ តែ​យើង​សង្ឃឹម​ថា យើង​នៅ​តែ​ទទួល​បាន​យុត្តធម៌»

មន្ត្រី​ស៊ើប​អង្កេត​អង្គការ​ការពារ​សិទ្ធិ​មនុស្ស​លីកាដូ លោក អំ សំអាត យល់​ឃើញ​ថា សមត្ថកិច្ច​បាន​ធ្វេសប្រហែស​ក្នុង​ការ​តាម​ច្បាប់​ខ្លួន​លោក ឈូក បណ្ឌិត តាម​សាលក្រម​របស់​ចៅក្រម​សាលាដំបូង​ខេត្ត​ស្វាយរៀង៖ «អ្វី​ដែល​យើង​សោកស្តាយ​បំផុត គឺ​ថា​ទោះ​ជា​ថ្មីៗ​នេះ​ឧបនាយករដ្ឋមន្រ្តី ស ខេង លោក​ចេញ​បទបញ្ជា​ឲ្យ​តាម​ចាប់​ខ្លួន​លោក ឈូក បណ្ឌិត ក៏ដោយ ក៏​មក​ដល់​ពេល​នេះ​លោក ឈូក បណ្ឌិត នៅ​តែ​មាន​សេរីភាព​មិន​ទាន់​មាន​ការ​ចាប់​ខ្លួន​ទេ។ យើង​គិត​ថា មាន​បទបញ្ជា​ក្តី មាន​សវនាការ​ក្តី យើង​មាន​សាលក្រម មាន​បទបញ្ជា។ ប៉ុន្តែ​លោក ឈូក បណ្ឌិត មិន​មាន​ការ​ចាប់​ខ្លួន វា​ហាក់​បី​ដូច​ជា​ល្បែង​មួយ​ដើម្បី​បង្រ្គប់​នីតិវិធី​ធ្វើ​ឲ្យ​ល្អ​មើល​ប៉ុណ្ណោះ មិន​មាន​ចេតនា​ក្នុង​ការ​ស្វែង​រក​យុត្តិធម៌​ឲ្យ​ជន​រង​គ្រោះ​នោះ​ទេ»

លោក ឈូក បណ្ឌិត បន្ត​ស្ថិត​នៅ​ក្រៅ​ឃុំ រី​ឯ​កម្មការិនី​រងគ្រោះ​ដែល​ត្រូវ​លោក ឈូក បណ្ឌិត បាញ់​ឲ្យ​របួស ក៏​បន្ត​រស់​នៅ​ក្នុង​ភាព​ភ័យ​ខ្លាច និង​ខ្វះខាត​ថវិកា​ក្នុង​ការ​ព្យាបាល​នៅ​ពេល​ដែល​ស្នាម​របួស​ធ្វើ​ទុក្ខ។

កម្មការិនី​ម្នាក់​ក្នុង​ចំណោម​កម្មការិនី ៣​នាក់ ដែល​រង​របួស គឺ​លោកស្រី ប៊ុន ចិន្តា បញ្ជាក់​ថា លោកស្រី​នឹង​មក​ចូល​រួម​ក្នុង​សវនាការ​ជម្រះ​ក្តី​នៅ​សាលាឧទ្ធរណ៍។ លោកស្រី​នៅ​តែ​មាន​ទំនុក​ចិត្ត​ចំពោះ​តុលាការ ថា​នឹង​ផ្តល់​យុត្តិធម៌​ឲ្យ​ពួកគាត់​រង​គ្រោះ​ទាំង ៣​នាក់ ពិសេស​ត្រូវ​ចាប់​ខ្លួន​លោក ឈូក បណ្ឌិត យក​មក​ផ្តន្ទាទោស​តាម​ច្បាប់៖ «ពួក​ខ្ញុំ​រាល់​ថ្ងៃ​ភ័យ​ខ្លាច​ណាស់ ព្រោះ​អី​គេ​មិន​ទាន់​ចាប់​ជន​ដៃដល់។ ពួក​ខ្ញុំ​ជា​ជន​ក្រីក្រ ពួក​ខ្ញុំ​ចេះ​តែ​ភ័យ​ខ្លាច​គេ​អ្នក​មាន​លុយ​គេ​ចង់​ធ្វើ​អ្វី​ក៏បាន»

វិទ្យុ​អាស៊ីសេរី មិន​អាច​ទាក់ទង​មេធាវី​ការពារ​ឲ្យ​លោក ឈូក បណ្ឌិត គឺ​លោក ស៊ុន ប៊ុណ្ណារិទ្ធ បាន​ទេ នៅ​ថ្ងៃ​ទី​២៩ ខែ​តុលា ដោយ​លោក​មិន​លើក​ទូរស័ព្ទ។

ចៅក្រម​សាលា​ដំបូង​ខេត្ត​ស្វាយរៀង កាល​ពី​ថ្ងៃ​ទី​២៥ ខែ​មិថុនា បាន​ផ្តន្ទាទោស​ឲ្យ​លោក ឈូក បណ្ឌិត មាន​ទោស​រយៈពេល ១៨​ខែ និង​បាន​ចេញ​ដីកា​ឲ្យ​តាម​ចាប់​ខ្លួន​អតីត​អភិបាល​ក្រុង​បាវិត​រូប​នេះ ឲ្យ​មក​ទទួល​ទោស និង​បាន​បង្គាប់​ឲ្យ​បង់​ប្រាក់​សំណង​ឲ្យ​ជន​រងគ្រោះ ប៊ុន ចិន្តា ចំនួន ២០​លាន​រៀល នុត សុខន ចំនួន ១០​លាន​រៀល និង កែវ នា ចំនួន ៨​លាន​រៀល។

យ៉ាង​ណា សំណង​បណ្ដឹង​រដ្ឋប្បវេណី​នោះ ត្រូវ​បាន​ជន​រងគ្រោះ​អះអាង​ថា ជា​សំណង​តិចតួច​ដែល​មិន​អាច​ទទួល​យក​បាន។ តាម​គម្រោង​នៅ​ក្នុង​សវនាការ​សាលាឧទ្ធរណ៍​ខាង​មុខ មេធាវី​ការពារ និង​ជន​រង​គ្រោះ នឹង​លើក​អំណះអំណាង​មួយ​ចំនួន​ដើម្បី​ស្នើ​សុំ​ឲ្យ​តុលាការ​សម្រេច​បង្គាប់​ឲ្យ​បាន​ប្រាក់​សំណង​ច្រើន​ជាង​មុន៕

កំណត់​ចំណាំ​ចំពោះ​អ្នក​បញ្ចូល​មតិ​នៅក្នុង​អត្ថបទ​នេះ​៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ៕

ព័ត៌មាន (14)
Share

អ្នក​អាន​អនាមិក

បាញ់គេនៅ ក្រៅឃុំ រាប់ឆ្នាំ អោយគ្រហ៊ើៗ ! « និះហើយ និតិរដ្ឋ របស់លោក​ ផៃ ស៊ីផាន ខ្វះភ្នែក ! »

Oct 30, 2013 07:57 AM

អ្នក​អាន​អនាមិក

បណ្ឌឹតនេះធំជាងស្តេចខ្មែរបើមានមនុស្សម៉ាកនេះពាន់នាក់
ប្រទេសនេះស្តេចនឹងរាស្រ្តរាបដូចកន្ទេលល្បីណាស់!!

Oct 30, 2013 07:50 AM

អ្នក​អាន​អនាមិក

stand up together at the same time and kill this gorvenement immediatly,do not wait for the next timme.

Oct 30, 2013 07:23 AM

អ្នក​អាន​អនាមិក

ការយឺតក្នុងការចាប់អ្នកធំៗ.អ្នកក្បត់ជាតិ ដាក់គុកពេលពួកគេធ្វើខុសព្រោះ ទីតាំងគុកទាំងអស់ដែលមាន នៅនិងទាន់សាងបន្ទប់ពិសេស ស្អាត មានពូក សម្រាប់ឃុំអ្នកមានអំណាចទាំងនោះ។ រាជាកំហុសរបស់ប្រមុខរដ្ឋខ្មែរយើង

Oct 30, 2013 02:49 AM

អ្នក​អាន​អនាមិក

ទាំងអស់​គ្រាន់តែជាការពន្យាពេល​ អោយជននេះបានដើរ
សប្បាយខាងក្រៅគុកប៉ុណ្ណោះ បើនៅតែជឿលើតុលាការ ទៀតពិតជាឆ្កួតមិនខាន

Oct 30, 2013 02:45 AM

មើល​មតិ​ទាំង​អស់.

គេហទំព័រ​ទាំងមូល