សភាជាតិ​អនុម័ត​ឲ្យ​សាងសង់​ទំនប់​វារីអគ្គិសនី​សេសាន​ក្រោម​២

សភាជាតិ នៅ​ថ្ងៃ​ទី១៥ ខែ​កុម្ភៈ បាន​អនុម័ត​លើ​សេចក្តី​ព្រាង​ច្បាប់​ដ៏​ចម្រូងចម្រាស​មួយ ដោយ​សំឡេង ៨២ លើ ៩០​សំឡេង ដើម្បី​បើក​ផ្លូវ​ឲ្យ​រដ្ឋាភិបាល​មាន​សិទ្ធិ​ធានា​ទូទាត់​ឲ្យ​ក្រុមហ៊ុន ហាយដ្រូ ផៅវើ ឡូវើ សេសាន​ក្រោម២ (HYDRO POWER LOWER SESAN 2)។
ដោយ សុខ សេរី
2013-02-15
អ៊ីម៉ែល
មតិ
Share
បោះពុម្ព
លោក ហេង សំរិន ប្រធាន​រដ្ឋសភា និង​ជា​ប្រធាន​កិត្តិយស​នៃ​គណបក្ស​ប្រជាជន​កម្ពុជា ក្នុង​កិច្ច​ពិភាក្សា​ស្ដីពី​សេចក្ដី​ព្រាង​ច្បាប់​សាងសង់​ទំនប់​វារីអគ្គិសនី​សេសាន​ក្រោម​២ នា​រដ្ឋសភា កាល​ពី​ថ្ងៃ​ទី១៥ ខែ​កុម្ភៈ ឆ្នាំ​២០១៣។
លោក ហេង សំរិន ប្រធាន​រដ្ឋសភា និង​ជា​ប្រធាន​កិត្តិយស​នៃ​គណបក្ស​ប្រជាជន​កម្ពុជា ក្នុង​កិច្ច​ពិភាក្សា​ស្ដីពី​សេចក្ដី​ព្រាង​ច្បាប់​សាងសង់​ទំនប់​វារីអគ្គិសនី​សេសាន​ក្រោម​២ នា​រដ្ឋសភា កាល​ពី​ថ្ងៃ​ទី១៥ ខែ​កុម្ភៈ ឆ្នាំ​២០១៣។
RFA/Sok Serey

ការ​អនុម័ត​នេះ​ក្រោយ​ពី​រដ្ឋាភិបាល​បាន​ចុះ​ហត្ថលេខា​កាល​ពី​ថ្ងៃ​ទី២៦ ខែ​វិច្ឆិកា ឆ្នាំ​២០១២ កន្លង​ទៅ ដោយ​អនុញ្ញាត​ឲ្យ​ក្រុមហ៊ុន​នេះ​សាងសង់​ទំនប់​វារីអគ្គិសនី​នៅ​ចំណុច​ប្រសព្វ​គ្នា​នៃ​ទន្លេសេសាន​២ និង​ទន្លេ​ស្រែពក នៅ​ខេត្ត​ស្ទឹងត្រែង ចាប់​ពី​ឆ្នាំ​២០១៣ នេះ​ត​ទៅ។

តំណាង​រាស្ត្រ​គណបក្ស សម រង្ស៊ី មិន​បាន​លើក​ដៃ​គាំទ្រ​ឲ្យ​អនុម័ត​លើ​សេចក្តី​ព្រាង​ច្បាប់​សាងសង់​ទំនប់​វារីអគ្គិសនី​សេសាន​ក្រោម២ នោះ​ទេ ផ្ទុយ​ទៅ​វិញ​គណបក្ស​នេះ​បាន​ទទូច​សុំ​ឲ្យ​ពន្យារ​ពេល​នៃ​ការ​អនុម័ត​ច្បាប់​នេះ​ទៅ​ថ្ងៃ​ក្រោយ​ទៀត។

កិច្ច​ពិភាក្សា​រយៈពេល​ជិត ៥ម៉ោង មុន​ការ​អនុម័ត​នោះ បាន​ធ្វើ​ឡើង​ក្នុង​ស្ថានការណ៍​ជជែក​តឹង​សរសៃ​ក និង​តានតឹង​នៅ​ក្នុង​សភាជាតិ នៅ​ថ្ងៃ​ទី១៥ ខែ​កុម្ភៈ។

គម្រោង​សាងសង់​ទំនប់​វារីអគ្គិសនី​ដ៏​ធំ​នោះ គឺ​ត្រូវ​ចំណាយ​ថវិកា​ចំនួន​ជាង ៧៨១​លាន​ដុល្លារ​អាមេរិក។ ទំនប់​នេះ​មាន​ផ្ទៃ​អាង​ទឹក​ទំហំ ៣៣០​គីឡូម៉ែត្រ​ក្រឡា ស្មើ​នឹង​ជាង ៣៦.០០០​ហិកតារ មាន​សមត្ថភាព​ផលិត​ថាមពល​អគ្គិសនី​ចំនួន ៤០០​មេហ្គាវ៉ាត់ (400​MW) ក្នុង​១ឆ្នាំៗ និង​លក់​ចរន្ត​អគ្គិសនី​ក្នុង​តម្លៃ ៦,៩៥​សេន​ដុល្លារ​អាមេរិក ស្មើ​នឹង ២៨០​រៀល​ក្នុង​មួយ​គីឡូវ៉ាត់​ម៉ោង។ សមាជិក​សភា​ខាង​គណបក្ស​ប្រជាជន​កម្ពុជា ក្នុង​សំឡេង​ភាគ​ច្រើន បាន​លើក​ដៃ​អនុម័ត​លើ​សេចក្តី​ព្រាង​ច្បាប់​នោះ។

ក្រុមហ៊ុន​ចំនួន​ពីរ ដែល​បាន​ទទួល​អាជ្ញា​ប័ណ្ណ​សាងសង់​ទំនប់​វារីអគ្គិសនី​នោះ មាន​ដូច​ជា ក្រុមហ៊ុន​ហាយដ្រូ ផៅវើ ឡូវើ សេសាន​ក្រោម២ របស់​ចិន ដែល​មាន​ភាគ​ហ៊ុន​ចំនួន ៩០% សហការ​ជាមួយ​ក្រុមហ៊ុន​មួយ​ទៀត​របស់​វៀតណាម ឈ្មោះ អីវីអិន អ៊ីនធឺណេសិនណល យន់ស្តុក (EVN Int'l Joint Stock Company) ដែល​មាន​ភាគ​ហ៊ុន​ចំនួន ១០%។ ក្រុមហ៊ុន​នេះ​បាន​ទទួល​កិច្ច​សន្យា​ចំនួន ៤០​ឆ្នាំ​ពី​រដ្ឋាភិបាល​កម្ពុជា។

ចំណុច​ដ៏​ចម្រូងចម្រាស​ក្នុង​ការ​ពិភាក្សា​នោះ មាន​ដូច​ត​ទៅ សមាជិក​សភា​ខាង​គណបក្ស សម រង្ស៊ី មាន​លោក សុន ឆ័យ លោក យឹម សុវណ្ណ និង​លោក គីមសួរ ភីរិទ្ធ ជាដើម បាន​ចោទ​ថា គ្មាន​ការ​សិក្សា​ម៉ត់ចត់​ស្ដីពី​ផល​ប៉ះពាល់​ដល់​បរិស្ថាន ដល់​ប្រជាពលរដ្ឋ គ្មាន​ដំណោះស្រាយ​សមរម្យ​ដល់​ប្រជាពលរដ្ឋ និង​ការ​ទទួល​អាជ្ញា​ប័ណ្ណ​នោះ គឺ​គ្មាន​តម្លាភាព។

ប៉ុន្តែ សមាជិក​សភា​ខាង​គណបក្ស​ប្រជាជន​កម្ពុជា មាន​លោក ជាម យៀប លោក ប៉ែន បញ្ញា និង​រដ្ឋមន្ត្រី​ក្រសួង​ឧស្សាហកម្ម រ៉ែ និង​ថាមពល លោក ស៊ុយ សែម បាន​អះអាង​ថា ការ​សិក្សា​បាន​ធ្វើ​ឡើង​ដោយ​ម៉ត់ចត់​ណាស់​តាំង​ពី​ឆ្នាំ​២០០៦ កន្លង​មក ហើយ​សំណង​នានា​ត្រូវ​បាន​ដោះស្រាយ​សមរម្យ​ជូន​ប្រជាពលរដ្ឋ​ចំនួន ៣​ឃុំ​នៅ​ទី​នោះ។ រដ្ឋាភិបាល​រំពឹង​ថា នឹង​ទទួល​បាន​ប្រាក់​ចំណូល​ជា​មធ្យម​ចំនួន​ជិត ៣០​លាន​ដុល្លារ​អាមេរិក ក្នុង​មួយ​ឆ្នាំៗ​ពី​ទំនប់​វារីអគ្គិសនី​នេះ។

រដ្ឋមន្ត្រី​ក្រសួង​ឧស្សាហកម្ម រ៉ែ និង​ថាមពល លោក ស៊ុយ សែម បាន​មាន​ប្រសាសន៍​សម្ដែង​ការ​សាទរ​យ៉ាង​ខ្លាំង​ក្រោយ​ពី​សភាជាតិ​បាន​ផ្តល់​ការ​អនុម័ត​នោះ​ថា គម្រោង​សាងសង់​ទំនប់​វារីអគ្គិសនី​សេសាន​ក្រោម​២ នេះ គឺ​ជួយ​ដល់​កំណើន​សេដ្ឋកិច្ច​ជាតិ នៅ​គ្រា​ដែល​កម្ពុជា កំពុង​តែ​ត្រូវ​ការ​ថាមពល​អគ្គិសនី​យ៉ាង​ខ្លាំង។

លោក ស៊ុយ សែម៖ «បាន​រួម​ចំណែក​ធ្វើ​ឲ្យ​រាជ​រដ្ឋាភិបាល​អាច​ធ្វើ​ការ​អភិវឌ្ឍ​ផ្គត់ផ្គង់​អគ្គិសនី​ឲ្យ​មាន​ការ​រីក​ចម្រើន​គួរ​ឲ្យ​កត់​សម្គាល់ ស្រូប​ទាញ​បាន​នូវ​ការ​ចាប់​អារម្ភ​ចូល​មក​វិនិយោគ បង្កើត​រោងចក្រ​ឧស្សាហកម្ម​បាន​រាប់​ពាន់​កន្លែង និង​កំពុង​តែ​ទាក់​ទាញ​ក្រុម​អ្នក​វិនិយោគ​នានា រាប់​ទាំង ជប៉ុន អាមេរិក អឺរ៉ុប នឹង​មក​វិនិយោគ​នៅ​ព្រះរាជាណាចក្រ​កម្ពុជា យើង​ត​ទៅ​ទៀត។ យើង​ខ្ញុំ​មាន​ការ​ជឿជាក់​យ៉ាង​ពិត​ប្រាកដ​ថា វិស័យ​អគ្គិសនី​នៃ​ព្រះរាជាណាចក្រ​កម្ពុជា នឹង​មាន​ការ​ផ្លាស់​ប្ដូរ​រីក​ចម្រើន ដែល​មិន​ធ្លាប់​ឃើញ​ពី​មុន​មក ទាំង​បញ្ហា​ផ្គត់ផ្គង់ ទាំង​ក្នុង​បញ្ហា​សន្តិសុខ​ថាមពល ទាំង​ក្នុង​បញ្ហា​ស្ថិរភាព និង​ទាំង​ក្នុង​បញ្ហា​ថ្លៃ​អគ្គិសនី»

ផ្ទុយ​ពី​ការ​សាទរ​នេះ ប្រធាន​ក្រុម​តំណាង​រាស្ត្រ​គណបក្ស សម រង្ស៊ី លោក សុន ឆ័យ បាន​មាន​ប្រសាសន៍​សម្ដែង​ការ​សោកស្ដាយ​យ៉ាង​ខ្លាំង ដោយ​លោក​គិត​ថា មាន​អំពើ​ពុក​រលួយ និង​ការ​ឃុបឃិត​គ្នា​លើ​គម្រោង​នេះ។

លោក សុន ឆ័យ៖ «យើង​ទៅ​តាម​ដាន។ យើង​អាច​ធ្វើ​កម្មវិធី​ចុះ​ទៅ​ពិនិត្យ​ជាក់ស្តែង​ក្នុង​ការ​អនុវត្ត​គម្រោង​ថា តើ​ពលរដ្ឋ​ដែល​ប៉ះពាល់​នោះ​ទទួល​បាន​អ្វី​ដូច​បាន​ចែង​នៅ​ក្នុង​សេចក្តី​ប្រកាស និង​សេចក្តី​ថ្លែង​ហេតុ​របស់​រាជ​រដ្ឋាភិបាល ឬ​អត់? ទៅ​តាម​ដាន​មើល​ថា តើ​ដី ៥​ហិកតារ មាន​ការ​ឈូស​ឆាយ​ស្អាត​នោះ​នៅ​ឯណា? ថា​ផ្ទះ​តម្លៃ ២៥.០០០​ដុល្លារ​អាមេរិក នោះ​នៅ​ឯ​ណា មាន​រូបភាព​យ៉ាង​ដូចម្តេច? ហើយ​ពលរដ្ឋ​នោះ​មាន​សាលារៀន​តាម​គម្រោង ឬ​អត់? នេះ​ជា​ចំណុច​ចាំបាច់​ដែល​យើង​ត្រូវ​តែ​តាម​ដាន​មើល។ ចំណុច​ទី២​ទៀត គឺ​ពិនិត្យ​លើ​ភាព​ជាក់ស្តែង​នៅ​ក្នុង​ការ​បំផ្លាញ​ព្រៃ​ឈើ»

នៅ​មុន​ការ​អនុម័ត​នោះ តំណាង​ប្រជាពលរដ្ឋ​ជន​ជាតិ​ដើម​ភាគ​តិច​ចំនួន ១២​នាក់ តំណាង​ប្រជាពលរដ្ឋ​នៅ​ឃុំ​ចំនួន​៣ នៅ​ខេត្ត​ស្ទឹងត្រែង មក​ដាក់​ញត្តិ​រួច​ហើយ​ជូន​សភាជាតិ ដើម្បី​សុំ​ឲ្យ​ដោះស្រាយ​ផល​ប៉ះពាល់​ដូច​ការ​រើ​ភូមិ រើ​ទី​សក្ការៈ​បូជា រើ​វត្ត​អារាម និង​រើ​ផ្ទះ​សម្បែង​ជាដើម ប៉ុន្តែ​សមាជិក​សភា​ខាង​គណបក្ស​ប្រជាជន​កម្ពុជា បាន​អះអាង​ថា គេ​បាន​សន្យា​ដោះស្រាយ​តាម​សំណូម​ពរ។

រហូត​មក​ដល់​ពេល​នេះ កម្ពុជា មាន​គម្រោង​សាងសង់​ទំនប់​វារីអគ្គិសនី​ចំនួន​៧ ហើយ ដូច​ជា​ទី១ វារីអគ្គិសនី​គីរីរម្យ១ កម្លាំង ១២​មេហ្គាវ៉ាត់​នៅ​ខេត្ត​កំពង់ស្ពឺ។ ទី២ វារីអគ្គិសនី​ភ្នំ​កំចាយ កម្លាំង ១៩២,៣​មេហ្គាវ៉ាត់ នៅ​ខេត្ត​កំពត។ ទី៣ វារីអគ្គិសនី​គីរីរម្យ៣ កម្លាំង ១៨​មេហ្គាវ៉ាត់ នៅ​ខេត្ត​កោះកុង។ ទី៤ វារីអគ្គិសនី​នៅ​ស្ទឹង​អាតៃ កម្លាំង ១២០​មេហ្គាវ៉ាត់ នៅ​ខេត្ត​ពោធិ៍សាត់ នឹង​សាងសង់​ហើយ​នៅ​ចុង​ឆ្នាំ​២០១៣។ ទី៥ វារីអគ្គិសនី​ឫស្សីជ្រំ​ក្រោម កម្លាំង ៣៣៨​មេហ្គាវ៉ាត់ នៅ​ខេត្ត​កោះកុង នឹង​សាងសង់​ហើយ​នៅ​ចុង​ឆ្នាំ​២០១៤។ ទី៦ វារីអគ្គិសនី​នៅ​ស្ទឹង​តាតៃ នៅ​ខេត្ត​កោះកុង កម្លាំង ២៤៦​មេហ្គាវ៉ាត់ នឹង​សាងសង់​ហើយ​នៅ​ចុង​ឆ្នាំ​២០១៥ និង​ទី៧ ចុង​ក្រោយ​នេះ វារីអគ្គិសនី​សេសាន​ក្រោម២ នៅ​ខេត្ត​ស្ទឹងត្រែង កម្លាំង ៤០០​មេហ្គាវ៉ាត់ នឹង​សាងសង់​ហើយ​នៅ​ចុង​ឆ្នាំ​២០១៧។

គម្រោង​សាងសង់​ទំនប់​វារីអគ្គិសនី​ទី៧ នេះ គឺ​ក្រោយ​ពី​ប្រទេស​វៀតណាម បាន​សាងសង់​ទំនប់​វារីអគ្គិសនី​ចំនួន​៧ នៅ​ទន្លេ​សេសាន​ភាគ​ខាង​លើ និង​ទំនប់​វារីអគ្គិសនី​ចំនួន​៤ ទៀត នៅ​ទន្លេ​ស្រែពក ភាគ​ខាង​លើ​កម្ពុជា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (7)
Share

អ្នក​អាន​អនាមិក

Ta heng chage village with a chomviet what village do you recived from youne? can you tell us . ata kanhchas kbort chydone ang . it is a time for you to go to thannoruuk.

Jun 17, 2013 07:11 PM

Castro De La Monreo

ពី Paris, France

This is not the first time to oppose whatever invester-goverment projects just put upfront of the word corruption, corruption and corruption...sic! This is a political game, campaign season is coming soon. Being an oppositon party's member have to say something to get attention and support from some foreigners. Papis, please do what you gotta do but don't step on your own tails.

Feb 17, 2013 01:24 PM

អ្នក​អាន​អនាមិក

ថៃឈ្លោះ ប្រឆាំងគ្នារាល់ថ្ងៃ តែសេដ្ឋកិច្ច និងការអភិវឌ្ឌនរបស់គេនៅតែទៅមុខ អត់ថយ។ ដោយឡែក ខ្មែរយើង គឺប្រឆាំងរាល់ការរកសុី អភិវឌ្ឌន និងអ្វីៗទាំងអស់ នេះពិតជាប្រឆាំងបែបឆ្កួតមែន។

Feb 16, 2013 07:38 PM

អ្នក​អាន​អនាមិក

យើងឮតែការប្រើពាក្យអភិវឌ្ឍគ្រប់គម្រោងរបស់រដ្ឋាភិបាល ដែលគ្រាន់តែជាការរំពឹកទុកសម្រាប់ថ្ងៃអនាគត។ ពេលណា បានច្បាប់បោះត្រាជ័រពីសភាត្រាជ័រទាំងពីរហើយ ប្រជាជនរស់នៅតំបន់អភិវឌ្ឍនោះ
នឹងទទួលការរងទុក្ខទោសដោយសារមន្រ្តីមានរូបរាងជាមនុស្សចិត្តជាសត្វតិរិច្ឆានម៉ាស្រឡាញ់!!!

Feb 16, 2013 04:37 PM

អ្នក​អាន​អនាមិក

សភាជាតិដែលមកពីបក្សប្រជាជន ជាសភាទីងមោងធ្វើអ្វីតែងផ្គាប់ចិត្តចិន និងយួន

Feb 15, 2013 11:59 PM

មើល​មតិ​ទាំង​អស់.

គេហទំព័រ​ទាំងមូល